جارقىن دا جىلى بەينەلەرگە قاراپ وتىرىپ, وتكەن عاسىردىڭ ءدال ورتاسىندا, ناقتى ايتار بولساق 1955 جىلدارى ومىراۋىندا رەسپۋبليكا جوعارعى كەڭەسى دەپۋتاتىنىڭ بەلگىسى بار قازكسر مادەنيەت ءمينيسترى ءىلياس وماروۆتىڭ ۇلتتىق ونەرىمىزدىڭ ابىرويىن اسىرىپ, بۇكىل وداققا تانىمال مايتالمانداردىڭ سۋرەت كورمەسىن ۇيىمداستىرعانى ەسىمىزگە تۇسەدى.
سۋرەتتەن كورىپ وتىرعاندارىڭىزداي, ولاردىڭ اراسىندا زاڭعار جازۋشى, لەنيندىك سىيلىقتىڭ يەگەرى مۇحتار اۋەزوۆ, تالانتتى اقىندار ءابدىلدا تاجىباەۆ پەن ديقان ءابىلوۆتى انىق بايقاۋعا بولادى. البەتتە, ۇلى مۇقاڭداردىڭ بەينەسىن بولاشاق ۇمىتا قويماس, ماسەلە وسىناۋ تۇلعالاردىڭ تالانتىن تاپ باسىپ تانىپ, شىعارماشىل جانداردىڭ شىندىق ءۇشىن شىرىلداعان بوزتورعاي ءۇنىن بىردەن تۇسىنەتىن ءىلياس اعا وماروۆتاي بيلىك وكىلىنىڭ بەينەسى مەن بەرەكەلى ىستەرىن بۇگىنگى جاستارعا ۇلگى ەتكىمىز كەلەدى.
«ومىردە كرەسلونى كوركەيتەتىن ادامدار بولادى, كرەسلو ارقىلى ءوزىن كوركەيتەتىن ادامدار بولادى» دەپ سوتسياليستىك ەڭبەك ەرى عابيت مۇسىرەپوۆ باعالاعانداي, ءىلياس اعا مينيستر كرەسلوسىن كوركەيتىپ, ھاس تالانتتاردى ۇنەمى تانىپ, قولداپ وتىرعان. ارالدىڭ قۇم باسقان ءشولدى اۋىلىندا تۋىپ, شۇرايلى شىعارما جازىپ جۇرگەن جاس تالاپ زەينوللا شۇكىروۆتىڭ جىر جولدارىن ءباسپاسوز بەتتەرىنەن تامسانا وقىعان بويدا قىزىلورداداعى اسقار توقماعامبەتوۆكە قوڭىراۋ شالىپ: «وسى بالاعا كوز قىرىڭدى سالا جۇرگەيسىڭ!» دەۋىنىڭ ءوزى نەگە تۇرادى؟ سىرلى سۋرەتكە زەر سالعان سايىن, ءىلياستاي ازاماتتاردىڭ الاش بالاسىنا دەگەن اقجولتاي جىلى تىلەكتەرىن ىشتەي سەزىنىپ, تەرەڭ ويعا شوماسىڭ...
قاجى قورعان ۇلى,
قازاقستاننىڭ ەڭبەك سىڭىرگەن مادەنيەت قايراتكەرى
