تەاتردىڭ ادەبيەت ءبولىمى مەڭگەرۋشىسى نۇرلان ءسادىر مەن مادەنيەت سالاسىنىڭ ۇزدىگى, وسى ۇجىمدا كوپ جىل قىزمەت ەتكەن تاجىريبەلى ءارتىس نۇرلىگۇل جۇباتوۆانىڭ قالامىنان تۋعان جاڭا تۋىندىدا اقىن بەينەسى بىرنەشە قىرىنان اشىلعان. نازىكجاندى اقىننىڭ ليريكالىق بەينەسى بىردە ءورشىل كۇرەسكەرگە اينالىپ, ماحامبەت رۋحىمەن تىلدەسەدى. بىردە ساياساتقا ارالاسقان قايراتكەرلىگى دە كورىنەدى.
– فاريزا اپاي پارلامەنت دەپۋتاتى بولعان كەزىندە «قازاقستان رەسپۋبليكاسىنداعى انا مەن بالانى قورعاۋ تۋرالى» زاڭ جوباسىن دايىنداعان ەكەن. «نەكە جانە وتباسى تۋرالى» زاڭدى ازىرلەۋگە دە اتسالىسقان. قويىلىمدا اقىننىڭ حالىق قالاۋلىسى رەتىندە اتقارعان وسى ىستەرىن دە كورسەتىپ وتتىك. ءبىر قىزىعى, بۇل قويىلىمنىڭ ستسەناريى بۇدان بىرنەشە اي بۇرىن دايىندالدى عوي. ودان كەيىن ەلىمىزدە بولعان وزگەرىستەر, اسىرەسە كوپ بالالى, از قامتىلعان وتباسىلاردى قولداۋعا باعىتتالعان شارالار قولعا الىنعان تۇستا ساحناداعى فاريزا اپايدىڭ انا مەن بالانى قورعاۋعا قاتىستى ءىس-ارەكەتى وتە ەرەكشە قابىلدانادى ەكەن. قويىلىمنىڭ وسى تۇسىندا كورەرمەن ەرىكسىز قول شاپالاقتاپ وتىردى, – دەيدى نۇرلان ءسادىر.
بۇل قويىلىم – نۇرلىگۇل جۇباتوۆانىڭ رەجيسسەر رەتىندەگى تۇڭعىش جۇمىسى. سۋرەتشىسى مۇرات مامبەتوۆ تە «ونەر سالاسىنىڭ ۇزدىگى» اتانعان جاس ونەرپاز. ساحنانىڭ بەزەندىرىلۋى, دەكوراتسيا مەن بي قويىلىمدارى اقىن ولەڭدەرىمەن ۇندەسىپ, ادەمى گارمونيا قۇرادى. ونىڭ ۇستىنە باستى ءرولدى سومداعان قازاقستاننىڭ ەڭبەك سىڭىرگەن قايراتكەرى گۇلجيان شىنتەمىر اقىن فاريزا وڭعارسىنوۆانىڭ ءبىتىم-بولمىسىن جان دۇنيەسىنەن شىعارىپ كورسەتە ءبىلدى. ايتا كەتەيىك, ەكىنشى قۇرامدا باستى ءرولدى رەجيسسەر نۇرلىگۇل جۇباتوۆانىڭ ءوزى ويناپ شىقتى. كيەلى ساحنادا پوەزيا پاتشالىعى سالتانات قۇرعان اسەرلى ءسات بولدى.
– جانارىندا جاسىن ويناپ, تۇيدەك-تۇيدەك جىر اعىنىنا شىداي الماي شيىرشىق اتقان ەرەكشە تۇلعانىڭ وسىلايشا ورالۋىنىڭ ءوزى ءبىر دۇنيە. جانرى دا ەرەكشەلەۋ. «ايالاپ وتەم...» دەگەن اتىنان باستاپ قولمەن ۇستاپ, كوزبەن كورۋگە كەلمەيتىن, كەلمەيتىن ەمەس-اۋ, قيمايتىن, تەك جۇرەكپەن عانا سەزىنۋگە بولاتىن نازىكتىك, قايسارلىق, رۋx ءتىل قاتتى. ولەڭمەن ورىلگەن, ادەمى قيالمەن استاسقان اقىن ءومىرىنىڭ بەينەسىن كوردىك, – دەيدى اقىن, قازاقستان جازۋشىلار وداعىنىڭ مۇشەسى داريعا مۇشتانوۆا پرەمەرا تۋرالى.
قازبەك قۇتتىمۇرات ۇلى,
«Egemen Qazaqstan»
باتىس قازاقستان وبلىسى
