ەلدىڭ الەۋمەتتىك-ەكونوميكالىق وركەندەۋىن, حالقىنىڭ باياندى باقىتىن ويلاعان نۇرسۇلتان ءابىش ۇلىنىڭ كەمەل ساياساتىنىڭ ارقاسىندا بۇگىنگىدەي جەتىستىككە قول جەتكىزدىك. بۇل ورايدا اتقارعان ەڭبەگى وراسان. سەنىم بيىگىنەن كورىنگەن تۇلعانىڭ بيلىك باسىنداعى باسشىلارعا دۇرىس جول كورسەتۋى – ابدەن قۇپتارلىق ءىس. كوپتى كورگەن ادام رەتىندە ونىڭ تاڭداۋىنا ەشقانداي كۇمان بولماۋى ءتيىس ەكەنىن باسا ايتقىم كەلەدى. كورەگەن باسشى, سۇڭعىلا ساياساتكەر, قارىمدى قايراتكەرگە ەلىمىزدىڭ ءار ازاماتىنىڭ قۇرمەتى ەشقاشان ورتايمايدى. دامىعان وتىز ەلدىڭ قاتارىنا قوسىلۋ ءۇشىن ونىڭ باستاماسىمەن ەلىمىزدە قولعا الىنعان باعدارلامالار, ستراتەگيالىق جوسپارلار ءساتتى جۇزەگە اسىپ كەلەدى. وعان ۇلەس قوسۋ – ءبارىمىزدىڭ مىندەتىمىز.
پارلامەنت وتىرىسىندا قازاقستان پرەزيدەنتى قاسىم-جومارت توقاەۆتىڭ استانا قالاسىنىڭ اتاۋىن نۇر-سۇلتان دەپ وزگەرتۋ تۋرالى ۇسىنىسىن سولتۇستىكقازاقستاندىقتار دا ءبىراۋىزدان قولدادى. كەزىندە استانانى ارقانىڭ توسىنە اۋىستىرۋ توسىن وقيعاداي اسەر ەتكەنى ءبارىمىزدىڭ ەسىمىزدە. كوبىمىز مەملەكەت اۋقىمىنان تىس, ويعا سىيمايتىنداي ۇسىنىس رەتىندە قابىلداعانىمىز راس. قازىر قاراپ وتىرسام, استانانى كوشىرۋ پروتسەسى تۇتاس داۋىرلىك ەپوپەيا ىسپەتتەس. جاڭا ەلوردانىڭ جىلناماسىن, تاريحي شەجىرەسىن ەلباسى ۇعىمىنان بولە-جارۋ مۇمكىن ەمەس. از عانا ۋاقىتتىڭ ىشىندە ساۋلەت ونەرىنىڭ جاۋھار تۋىندىسىنا اينالىپ,ۇزدىك ۇلگىدەگى رۋحاني, مادەني شاھارلارمەن تەڭەستى. ەركە ەسىلدىڭ جاعاسىندا بوي كوتەرگەن اسەم استانامىزعا ەلباسى ەسىمىنىڭ بەرىلۋى زاڭدىلىق دەر ەدىم. بۇدان بىلاي وبلىس ورتالىعىنداعى ەڭ ۇزىن كوشەلەردىڭ ءبىرى دە ەلباسى ەسىمىمەن اتالادى.
حالقىمىزدىڭ باستى بايلىعى – تاۋەلسىزدىگى. اتا-بابالارىمىز عاسىرلار بويى ارمانداپ كەلگەن ەگەمەندىككە قول جەتكىزگەن نۇرسۇلتان ءابىش ۇلىن قالاي ۇلىقتاساق تا جاراسادى. سونىڭ بىرەگەيى – ەلوردا ەندى نۇر-سۇلتان دەپ اتالعانىنا بەك قۋانىشتىمىز.
ەسكەندىر ەلەۋسىزوۆ,
وبلىستىق ارداگەرلەر كەڭەسىنىڭ توراعاسى
سولتۇستىك قازاقستان وبلىسى
