كوميتەت توراعاسى اسقار بەيسەنباەۆ شارانى اشا كەلىپ, ۇلت كوشباسشىسى ن.نازارباەۆ قاۋىپسىزدىك كەڭەسىنىڭ وتىرىسىندا كوممۋنالدىق قىزمەتتەر باعاسىنىڭ جوعارى ەكەنىن اتاپ وتكەنىن, سونداي-اق وتكەن جىلعى جولداۋدا ايتىلعان ەلەكتر مەن جىلۋ ەنەرگياسىنىڭ قازىرگى تاريفتەرىن قالىپتاستىرۋ جانە مونوپوليستەردىڭ ينۆەستيتسيالىق مىندەتتەمەلەرىن باقىلاۋ جونىندەگى وزەكتى ماسەلەلەرگە نازار اۋداردى.
سەناتور س.ەڭسەگەنوۆ پارلامەنت تابيعي مونوپوليالار سۋبەكتىلەرىنىڭ قىزمەتىنىڭ اشىقتىعىن ارتتىرۋعا جانە تاريفتىك ەسەپ-قيساپتار مەن ينۆەستيتسيالىق باعدارلامالاردى ىسكە اسىرۋدى باقىلاۋدى كۇشەيتۋگە باعىتتالعان «تابيعي مونوپوليالار تۋرالى» زاڭ قابىلداعانىن اتاپ ءوتتى. ودان باسقا, پارلامەنت دەپۋتاتتارى بيزنەس-ورتانى جانە ساۋدا قىزمەتىن دامىتۋ تۋرالى زاڭ اياسىندا تابيعي مونوپوليالار سۋبەكتىلەرى مەن الەۋمەتتىك ماڭىزى بار نارىقتار قىزمەتتەرىنە باعالاردىڭ ءوسۋىن شەكتەۋگە باعىتتالعان ەرەجەلەردى ۇسىنعان بولاتىن.
ءمينيستردىڭ ورىنباسارى س.جۇمانعارين ءوز بايانداماسىندا تابيعي مونوپوليالار سۋبەكتىلەرى قىزمەتىنىڭ نەگىزگى كورسەتكىشتەرى مەن باعا بەلگىلەۋدى جانە ينۆەستيتسيالىق مىندەتتەمەلەردى مەملەكەتتىك باقىلاۋدى جەتىلدىرۋ جونىندەگى ۋاكىلەتتى ورگان قابىلداعان شارالار تۋرالى حاباردار ەتتى. وسى جۇمىستاردىڭ ناتيجەسىندە جىلۋمەن جابدىقتاۋ, سۋ جەتكىزۋ, كارىز, ەلەكتر جانە گازبەن قامتاماسىز ەتۋگە ارنالعان كوممۋنالدىق قىزمەتتەرگە تاريفتەر تومەندەتىلگەنى ايتىلدى.
شاراعا قاتىسۋشىلار تابيعي مونوپوليالار سۋبەكتىلەرىنىڭ باسقا دا ماسەلەلەرىن, كورسەتىلەتىن قىزمەتتەردىڭ باعاسىن بەلگىلەۋ ءتارتىبىن, ينۆەستيتسيالىق باعدارلامالاردى ىسكە اسىرۋدى, سونداي-اق وسى سالاداعى مەملەكەتتىك رەتتەۋدىڭ تيىمدىلىگىن ارتتىرۋدى تالقىلادى.
كەزدەسۋدىڭ قورىتىندىسى بويىنشا كوميتەت قاتىسۋشىلاردىڭ ەسكەرتۋلەرىن ەسكەرە وتىرىپ, تابيعي مونوپوليالار سۋبەكتىلەرىن رەتتەۋدى جەتىلدىرۋگە, باعا بەلگىلەۋگە جانە ينۆەستيتسيالىق مىندەتتەمەلەردى مەملەكەتتىك باقىلاۋعا باعىتتالعان ۇسىنىستار ازىرلەيتىن بولادى.
