ايماق باسشىسى قۇمار اقساقالوۆ بۇل باعىتتا ناقتى جۇمىستار جۇرگىزىلىپ, بارلىق قىزمەتتەر جوعارى دايىندىق رەجيمىنە كوشكەنىن اتاپ ءوتتى. كوكتەمگى سۋ تاسقىنىن ەڭسەرۋگە 1400 ادام, 730 تەحنيكا مەن 353 موتوپومپا جۇمىلدىرىلاتىن بولادى. بىلتىر سۋ وتكىزگىش 20 قۇبىر سالىنسا, بيىل تاعى 27-ءسى ىسكە قوسىلادى. ەلدى-مەكەندەردەن 800 مىڭ تونناعا جۋىق قار شىعارىلىپ, اۆتوجولداردا 2 مىڭ قۇبىر تازارتىلدى.
قۇمار ىرگەباي ۇلى اۋىلدارداعى بارلىق ۇيلەردى تەكسەرۋگە تاپسىرما بەردى.
«بىردە-ءبىر باسپانا نازاردان تىس قالماۋى ءتيىس. كوشە بويلارىنداعى قاردى سىرتقا شىعارۋ جايى قاناعاتتاندىرمايدى. كۇن كۇرت جىلىسا, قارعىن سۋدىڭ قاۋپى ەسەلەنە تۇسەتىنىن ەسكەرىڭىزدەر. سوندىقتان سۋ باسۋ قاۋپىن سەيىلتۋدىڭ بارلىق مۇمكىندىكتەرى قاراستىرىلۋى قاجەت», دەدى ول.
وبلىس ورتالىعىنداعى شەتكەرى ىقشام اۋدانداردا سۋدى سورۋ جۇمىستارىنا بىرقاتار سىن ايتىلدى. كارىزدىك جۇيە تەك ورتالىق كوشەلەردە عانا تازارتىلعان. جەكە كاسىپورىندارمەن كەلىسىم-شارتقا وتىرىپ, ولاردى تارتۋ قاجەتتىگى اتاپ كورسەتىلدى . مەملەكەتتىك جانە بيۋدجەتتىك ۇيىمداردىڭ اۋماقتارىندا دا قار بارشىلىق. قار شىعارۋ جۇمىستارىنا قوسىمشا كۇشتەردى تارتۋدى تاپسىرىلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
