ورتالىق مۋزەي مەن ماجارستان باس كونسۋلدىعى اراسىنداعى مادەني ىنتىماقتاستىق بايلانىس جىلدان-جىلعا نىعايا تۇسۋدە. ماسەلەن, سوڭعى جىلداردىڭ وزىندە مۋزەيگە كەلۋشىلەر ماجارستاننىڭ تاريحى, مادەنيەتى تۋرالى سىر شەرتكەن: «ماجارستان عىلىمىنىڭ مەرەكەسى», «ماجارستان شىعىستانۋشىلارى» سىندى كورمەلەرمەن تانىستى. قالىپتاسقان ءداستۇردى جالعاستىرعان ورتالىق مۋزەي ماجارستان باس كونسۋلدىعىمەن بىرلەسىپ «بۇعىلار جولى» كورمەسىن كەلۋشىلەردىڭ نازارىنا ۇسىندى. كورمە اڭشىلىق جانە تابيعاتتى قورعاۋمەن كاسىبي تۇردە اينالىساتىن ودون بلاۋماننىڭ فوتو شىعارماشىلىعىنا ارنالدى.
كورمەدەن جابايى اڭداردىڭ ءومىر ءسۇرۋ ورتاسىنداعى ءتۇرلى ساتتەرىن بەينەلەيتىن تۇسىرىلىمدەردى تاماشالاۋعا بولادى. فوتوسۋرەتشىنىڭ شىعارماشىلىق تاقىرىبى بۇل جولى ماجار ەلىنىڭ ماقتانىشى, تابيعاتىنىڭ ءىنجۋ-مارجانى بۇعىلار مەن ەلىكتەرگە ارنالعان. ودون بلاۋمان تەك قانا فوتوسۋرەتشى ەمەس, سونىمەن قاتار كينوتۇسىرىلىمدەرمەن دە اينالىسادى. قازىرگى تاڭدا سۋرەتشى DVD فورماتتا 55 فيلم ءتۇسىرىپ, كورەرمەندەرگە تارتۋ ەتتى. فيلمدەر اۋستريا, گەرمانيا, نيدەرلاند, يتاليا, بەلگيا ەلدەرىندە كورسەتىلىپ زور قوشەمەتكە يە بولعان. ونىڭ فيلمدەرى «اڭشىلىق, بالىق اۋلاۋ» تەلەارناسىندا ءجيى كورسەتىلەدى. بلاۋمان اڭشىلىق مەكتەپتەرى ءۇشىن بىرقاتار ارنايى وقۋ فيلمدەرىن جانە اڭشىلىق كاسىبىمەن اينالىساتىن كومپانيالاردىڭ جارنامالارىن ءتۇسىردى.
كورمە ەكسپوزيتسياسىندا كەلۋشىلەر تاڭىرقاي قارايتىن كانىگى فوتوسۋرەتشى ودون بلاۋماننىڭ 65 تۋىندىسى بار. ونىڭ ارقايسىسى ۆەنگريانىڭ اسەم تابيعاتى, جانۋارلار الەمىمەن تانىستىرادى. الىس ءالپى تاۋىن جاڭعىرىقتىرعان ۇندەرى, جەر تارپىعان ساتتەرى كوز الدىڭا ەلەستەيدى. نەگە ەكەنىن بۇعىلاردىڭ تامساندىراتىن كەيپىن وزگەشە ءبىر ىڭكارلىكپەن اسپەتتەگەنىن كورەسىز.
بۇعىلاردىڭ تاڭسىق جولى ءسىزدىڭ دە تاڭدايىڭىزدى قاقتىراتىنى راس.
ساپارباي پارمانقۇل,
«Egemen Qazaqstan»
الماتى
