وتىرىستى اشقان «Nur Otan» پارتياسى توراعاسىنىڭ ءبىرىنشى ورىنباسارى قازىرگى تاڭدا قازاقستان حالقىنىڭ تاريحي كەزەڭدى باستان كەشىرىپ جاتقانىن ايتتى. سونداي-اق ول ەلباسىنىڭ ءوزىنىڭ پرەزيدەنتتىك وكىلەتتىگىن توقتاتۋ تۋرالى شەشىمى ءبىر ساتتە قابىلدانباعانىن, ول ءۇشىن تۇڭعىش پرەزيدەنتىمىز ۇزاق ويلانىپ, بارلىق ماسەلەنى سارالاپ, سالماقتاعانىنا نازار اۋداردى.
– ەلباسى قاشاندا ەل مەن حالىقتىڭ مۇددەسىن ءبىرىنشى كەزەككە قويىپ, ءاردايىم دۇرىس شەشىمدەر قابىلدايدى. قازاقستان حالقى ءۇشىن تۇڭعىش پرەزيدەنتىمىزدىڭ ەسىمى ءاردايىم مەملەكەتتىلىك, ەگەمەندىك جانە تاۋەلسىزدىك سياقتى اسا ماڭىزدى قۇندىلىقتارمەن ءبىر قاتاردا تۇرادى. قازىردىڭ وزىندە ەلباسىنىڭ ەسىمى تاۋەلسىز مەملەكەتىمىزدىڭ نەگىزىن قالاۋشى, بارلىق رەفورمالاردىڭ اۆتورى, الەمدىك دەڭگەيدەگى ساياساتكەر رەتىندە تاريحىمىزعا التىن ارىپتەرمەن جازىلاتىنى ءسوزسىز, – دەدى م.اشىمباەۆ.
سونىمەن قاتار «Nur Otan» پارتياسى توراعاسىنىڭ ءبىرىنشى ورىنباسارى ەلباسىنىڭ قازاقستاندى كەڭەس وداعىنىڭ ارتتا قالعان رەسپۋبليكالارىنىڭ بىرىنەن زاماناۋي, دامىعان, بۇكىل الەم بىلەتىن الدىڭعى قاتارلى مەملەكەتكە اينالدىرعانىن ايتتى. ونىڭ سوزىنشە, ەلباسىمىزدىڭ ەكونوميكالىق جانە ساياسي رەفورمالارى مەن اۋقىمدى جاڭعىرۋ باعدارلاماسى ەلىمىزدىڭ جان-جاقتى دامۋىن قامتاماسىز ەتتى.
– حالىقتىڭ ءال-اۋقاتىنىڭ ەسەلەپ ءوسۋى دە نۇرسۇلتان ءابىش ۇلىنىڭ ەرەن ەڭبەگىنىڭ باستى جەتىستىكتەرىنىڭ ءبىرى. تۇڭعىش پرەزيدەنتىمىز ۇنەمى حالىقتىڭ ءومىر ءسۇرۋ ساپاسىن ارتتىرۋعا, جاستار مەن كوپ بالالى وتباسىلاردى قولداۋعا, ءبىلىم بەرۋ مەن دەنساۋلىق ساقتاۋ سالالارىن دامىتۋعا كوڭىل ءبولىپ, باستى نازاردا ۇستاپ كەلدى, – دەدى م.اشىمباەۆ.
سونداي-اق ول قازىرگى تاڭدا بۇكىل الەم ەلىمىزدى بىتىمگەرشىلىك باستامالارى ارقىلى دا وتە جاقسى تانيتىنىن جانە استانامىزدىڭ ەڭ وزەكتى جاھاندىق ماسەلەلەردى تالقىلاپ, وڭ شەشىم شىعاراتىن حالىقارالىق ورتالىققا اينالعانىنا نازار اۋداردى.
– نۇرسۇلتان ءابىش ۇلى نازارباەۆ قازاقستان تاريحىندا تاۋەلسىز مەملەكەتتىڭ نەگىزىن قالاعان, قازاقتىڭ مەملەكەتتىلىگىن قايتا جانداندىرعان ۇلى تۇلعا رەتىندە ماڭگى قالادى. سول سەبەپتى, قازىرگىدەي تاريحي كەزەڭدە قازاقستاندىق قوعام بىرلىكتى تۋ ەتىپ, ەلباسىنىڭ ستراتەگيالىق ساياساتىنىڭ اياسىندا ءارى قاراي بىرىگۋى ءتيىس جانە قوعامىمىز تۇڭعىش پرەزيدەنتىمىز انىقتاپ بەرگەن جولمەن ءجۇرىپ, ءوزىنىڭ بىرتۇتاستىعىن كورسەتۋى قاجەت, – دەدى م.اشىمباەۆ.
ودان بولەك, «Nur Otan» پارتياسى توراعاسىنىڭ ءبىرىنشى ورىنباسارى ەلباسىنىڭ ەرىك-جىگەرى مەن تاباندىلىعىنىڭ ارقاسىندا تاۋەلسىز مەملەكەت بولىپ قالىپتاسقان قازاقستاننىڭ بارلىق جەڭىستەرى مەن جەتىستىكتەرى تۇڭعىش پرەزيدەنتىمىزدىڭ ەسىمىمەن تىعىز بايلانىستى ەكەنىن تىلگە تيەك ەتتى. سوندىقتان ماۋلەن اشىمباەۆ نۇرسۇلتان نازارباەۆتىڭ الداعى ۋاقىتتا دا ەلباسى, قاۋىپسىزدىك كەڭەسىنىڭ توراعاسى, «Nur Otan» پارتياسىنىڭ توراعاسى, قازاقستان حالقى اسسامبلەياسىنىڭ توراعاسى, كونستيتۋتسيالىق كەڭەستىڭ مۇشەسى رەتىندە ەلدىڭ ستراتەگيالىق دامۋىنا ايرىقشا ىقپال ەتەتىن ۇلى تۇلعا بولىپ قالاتىنىن, ونىڭ ءوز وكىلەتتىگىن توقتاتۋ تۋرالى شەشىمى دە زاڭعا سايكەس ەكەنىن ايتتى.
– بۇل يگى ءىس ىشكى تۇراقتىلىقتى نىعايتىپ, قازاقستاننىڭ حالىقارالىق ابىروي-بەدەلىن ارتتىرا تۇسەدى. ەلباسىنىڭ بۇل تاريحي شەشىمى بولاشاق ساياساتكەرلەرگە ۇلكەن ۇلگى-ونەگە ەكەنى ءسوزسىز. وسىلايشا قازاق ەلى زاماناۋي, قۇقىقتىق جانە دەموكراتيالىق مەملەكەت قۇرۋ جولىندا اسا ماڭىزدى قادام جاسادى, – دەگەن م.اشىمباەۆ وسىنداي ساتتە بارشا قازاقستاندىقتار جۇدىرىقتاي جۇمىلىپ, بىرلىك پەن تۇراقتىلىقتىڭ جارقىن ۇلگىسىن كورسەتۋ كەرەكتىگىن ايتتى.
سونداي-اق استانامىزعا ەلباسى ەسىمىن بەرۋ ەلىمىزدىڭ دامۋ جولىندا تۇڭعىش پرەزيدەنت ساياساتىنىڭ ودان ءارى جالعاساتىنىن كورسەتەتىن ماڭىزدى شارا ەكەنىن ايتقان م.اشىمباەۆ وسىلايشا قازاقستاندىقتار ن.نازارباەۆتىڭ تاۋەلسىز قازاقستاننىڭ نەگىزىن قالاۋداعى جانە ونىڭ استاناسىن سالۋداعى ەرەن ەڭبەگىنە قۇرمەت كورسەتىپ وتىرعانىن جەتكىزدى.
«Nur Otan» پارتياسى توراعاسىنىڭ ءبىرىنشى ورىنباسارى ەل دامۋىنىڭ جاڭا كەزەڭىندەگى تاريحي شەشىمدى بارلىق نەگىزگى ساياسي پارتيالار مەن قوعامدىق كۇشتەر قولداپ وتىرعانىن, وعان دەموكراتيالىق كۇشتەردىڭ جالپىۇلتتىق كواليتسياسىنىڭ بۇگىنگى وتىرىسى دالەل ەكەنىن تىلگە تيەك ەتتى.
وتىرىسقا ەلدەگى جەتەكشى پارتيالاردىڭ باسشىلارى, پارلامەنت دەپۋتاتتارى, قازاقستان حالقى اسسامبلەياسىنىڭ, كاسىبي جانە قوعامدىق بىرلەستىكتەردىڭ وكىلدەرى قاتىستى. جيىن بارىسىندا كواليتسيا مۇشەلەرى ەلوردامىزعا ەلباسى ەسىمىن بەرۋ تۋرالى ءوز ويلارىن ورتاعا سالىپ, پىكىرلەرىمەن ءبولىستى. اتاپ ايتقاندا, قازاقستان كوممۋنيستىك حالىق پارتياسىنىڭ حاتشىسى, ءماجىلىس دەپۋتاتى جامبىل احمەتبەكوۆ, «اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى, پارلامەنت سەناتىنىڭ دەپۋتاتى ءالي بەكتاەۆ, «بىرلىك» ساياسي پارتياسىنىڭ توراعاسى سەرىك سۇلتانعالي, حالىق قاھارمانى, «قارۋلى كۇشتەردىڭ ارداگەرلەرى» رەسپۋبليكالىق قوعامدىق بىرلەستىگى ۇيلەستىرۋ كەڭەسىنىڭ توراعاسى مۇحتار التىنباەۆ, ەلباسىنىڭ بەس الەۋمەتتىك باستاماسىنىڭ جۇزەگە اسىرىلۋىن باقىلاۋ جونىندەگى قوعامدىق كەڭەستىڭ توراعاسى, پارلامەنت سەناتىنىڭ دەپۋتاتى باقىتجان جۇماعۇلوۆ, «اق جول» دەموكراتيالىق پارتياسى توراعاسىنىڭ ورىنباسارى قازىبەك يسا, «اتامەكەن» ۇلتتىق كاسىپكەرلەر پالاتاسىنىڭ باسقارما توراعاسى ابىلاي مىرزاحمەتوۆ, قازاقستان رەسپۋبليكاسى كاسىپوداقتار فەدەراتسياسىنىڭ توراعاسى باقىتجان ءابدىرايىم جانە «Qazaqstan ardagerleri» قاۋىمداستىعىنىڭ توراعاسى, پارلامەنت ءماجىلىسىنىڭ دەپۋتاتى باقىتبەك سماعۇل ءسوز الىپ, ەلباسى ەسىمىنىڭ ەلوردامىزعا بەرىلۋى ەل دامۋىنىڭ جاڭا كەزەڭىن انىقتايتىن اسا ماڭىزدى قادام ەكەنىن ايتتى.
ءىس-شارا سوڭىندا بارشا قازاقستاندىقتى قازاقستاننىڭ تۇڭعىش پرەزيدەنتى ايقىنداعان ەلدىڭ ستراتەگيالىق باسىمدىقتارىنا سوزبەن دە, ىسپەن دە تولىق قولداۋ كورسەتۋگە جانە ەلباسىنىڭ تاۋەلسىزدىكتى كۇشەيتۋگە, ەلدى جۇيەلى جاڭعىرتۋعا, سونداي-اق ءاربىر قازاقستاندىقتىڭ ءال-اۋقاتىن ارتتىرۋعا باعىتتالعان ساياساتىن بىرلەسىپ جالعاستىرۋعا, استانامىزدىڭ اتاۋىن وزگەرتۋ تۋرالى تاريحي شەشىمگە ءۇن قوسۋعا شاقىرعان ۇندەۋ قابىلداندى.
سەرىك ابدىبەك,
«Egemen Qazaqstan»
