مادەنيەت جانە سپورت ءمينيسترى ارىستانبەك مۇحامەدي ۇلىنىڭ ۇسىنىسىمەن بيىلعى جىلدان باستاپ ناۋرىزدى جاڭا تۇرپاتتا تويلاۋ – مۇقتاج جاندارعا, كوپبالالى انالارعا, قارتتار مەن ارداگەرلەرگە قايىرىمدىلىق قامقورلىق تانىتۋ ۇلگىسىندە اتاپ وتۋگە باعىتتالعان بولاتىن. وسى ماقساتتى كوزدەگەن ونەر وشاعى قالاداعى №3 ارنايى الەۋمەتتىك قىزمەتتەر كورسەتۋ ورتالىعىنا بارىپ, قارتتارعا قۇرمەت جاسادى.
– قاريالاردى قولداۋ قوعامعا ورتاق پارىز. تاعدىردىڭ سان قيلى جولى وسى مەكەمەگە توعىستىرعان قامكوڭىل جانداردىڭ كوڭىلىن اۋلاپ, جىلىلىق سىيلاعىمىز كەلدى. بۇل كەيىنگى جاستارعا ۇلگى بولىپ, قوعامدا جاپپاي بەلەڭ السا كوپتەگەن يگى ىستەر جاسالعان بولار ەدى, – دەيدى قر ەڭبەك سىڭىرگەن قايراتكەرى, جامبىل اتىنداعى قازاق مەملەكەتتىك فيلارمونياسىنىڭ ديرەكتورى اسقار بورىباەۆ.
مەرەكەگە وراي قاريالارعا ءتۇرلى سىيلىقتار تابىس ەتىلدى. قايىرىمدىلىق ءىس-شارا فيلارمونيا ارتىستەرىنىڭ ارنايى ازىرلەنگەن كونتسەرتتىك باعدارلاماسىنا ۇلاستى.
ارمان وكتيابر,
«ەگەمەن قازاقستان»
الماتى
