بۇل كەزدەسۋ ۇلتتىق قۇراما جانە جاڭادان تاعايىندالعان باس باپكەر ميحال بيلەك ءۇشىن رەسمي كەزدەسۋدەگى العاشقى ويىنى ەدى. ياعني, فۋتبولشىلار مەن جاڭا جاتتىقتىرۋشىنىڭ ناعىز سىنالاتىن ءساتى. 2019 جىلدىڭ باسىندا باس باپكەر بولىپ تاعايىندالعان چەح مامانى اقپان ايىندا تۇركيادا مولدوۆا قۇراماسىنا قارسى جولداستىق كەزدەسۋ وتكىزىپ, ۇلتتىق قۇراما فۋتبولشىلارىن ءبىر تەكسەرىپ العان-دى. بيلەك ەلىمىزدىڭ باس قۇراماسىن بۇعان دەيىن باسقارعان جاتتىقتىرۋشىلارعا قاراعاندا از ۋاقىتتىڭ ىشىندە رەسمي كەزدەسۋ وتكىزسە دە, توپ-50 قۇرامانىڭ قاتارىنداعى كوماندانى جەڭدى.
شوتلاندياعا قارسى كەزدەسۋ الدىندا ميحال بيلەك جۋرناليستەرمەن تىلدەسكەندە فۋتبولشىلار جانكۇيەرلەرگە توسىن سىي دايىنداپ جاتقانىن ايتقان ەدى. ء«بىز شوتلانديا قۇراماسىنىڭ ۇلتتار ليگاسىنداعى بىرنەشە ويىنىن كوردىك. جيناقى كوماندا ەكەنىن, دوپتى ءوز ايماعىنان شابۋىلشىلارعا جىلدام جەتكىزەتىنىن بايقادىم. دەگەنمەن, ەرتەڭ ءبىزدىڭ جىگىتتەر جانكۇيەرلەرگە توسىن سىي دايىنداۋدا».
ماتچ الدىندا قازاقستان قۇراماسىنىڭ ويىنشىلار ءتىزىمى شىعىسىمەن ەكس-باس باپكەر ستويلوۆتىڭ كەزىندە كوبىنە قوسالقى قۇرامدا وتىرعان بىرنەشە فۋتبولشىنى بايقادىق. قاقپانى قورعاۋ «ورداباسى» قاقپاشىسى دميتري نەپوگودوۆقا سەنىپ تاپسىرىلسا, ورتالىق قورعاۋشى بولىپ تاعى ءبىر شىمكەنت كومانداسىنىڭ ويىنشىسى تەمىرلان ەرلانوۆ شىقتى. سونىمەن قاتار سول قاپتالداعى قورعاۋشى رەتىندە «قايرات» ويىنشىسى يان ۆوروگوۆسكي ورنالاستى. ال جارتىلاي قورعانىستا نيدەرلاندىنىڭ «حەراكلەس» كلۋبىندا وينايتىن الەكساندر مەركەل مەن «استانا» فۋتبولشىسى يۋري پەرتسۋح تا ءبىرىنشى مينۋتتان باستاپ نەگىزگى قۇرامدا شىقتى. قالعان فۋتبولشىلار بۇعان دەيىن دە نەگىزگى قۇرامدا شىعىپ جۇرگەن بولاتىن. شوتلاندياعا قارسى ويىندا تەمىرلان ەرلانوۆ ۇلتتىق قۇراماداعى دەبيۋت ماتچىن وتكىزسە, الەكساندر مەركەل اراعا ءتورت جىل سالىپ ۇلتتىق قۇراماعا قايتا ورالدى. ءبىر قىزىعى, شوتلانديا قۇراماسىن جەڭۋگە ءبىز ەسىمىن اتاعان فۋتبولشىلاردىڭ سەپتىگى كوپ بولدى.
ماتچتىڭ العاشقى 5 مينۋتىندا ەكى قۇراما دا ءبىر-ءبىرىن الىستان بايقاسىپ ءجۇردى. ال ويىننىڭ 6-مينۋتىندا وتانداستارىمىزدىڭ العاشقى شابۋىلى بىردەن گولعا اينالدى. الەكساندر مەركەلدىڭ اۋەلەتە اسىرعان دوبىنا ءبىرىنشى يۋري پەرتسۋح جەتىپ, ەسەپتى اشتى. ەسەپتە العا شىققان قازاقستاندىق ويىنشىلار 27 مىڭ جانكۇيەرلەر جينالعان «استانا ارەنادا» وتە سەنىمدى قيمىلداي باستادى. كەزدەسۋدىڭ 10-مينۋتىندا يسلامبەك قۋاتتان پاس العان يان ۆوروگوۆسكي قۇرامامىزدىڭ ەكىنشى گولىن سوعىپ, جانكۇيەرلەردى ءبىر جەلپىندىرىپ تاستادى. بۇل گولدان كەيىن فۋتبولشىلارىمىزدىڭ جەڭىسكە دەگەن ۇمتىلىسى ارتا ءتۇسىپ, قورعانىس پەن شابۋىلدا ءساتتى ويىن كورسەتە باستادى.
كەزدەۋدىڭ ەكىنشى تايمى دا العاشقى ءبولىمنىڭ ستسەناريىمەن باستالدى. ەكىنشى تايمنىڭ 6-مينۋتىندا, ال جالپى كەزدەسۋدىڭ 51-مينۋتىندا باقتيەر زاينۋتدينوۆ قازاقستان قۇراماسىنىڭ ويىنداعى ءۇشىنشى گولىن سوقتى. زاينۋتدينوۆقا ناتيجەلى پاس اسىرعان عافۋرجان سۇيىمباەۆ ەكەنىن ايتا كەتەيىك. ءۇشىنشى گولدان كەيىن شوتلانديا قۇراماسى ويىن تىزگىنىن ءوز قولىنا الاتىن شىعار دەپ ويلاعانبىز. بىراق ءبىزدىڭ فۋتبولشىلار ءوز پوزيتسياسىندا وتە ساۋاتتى ويناپ, قارسىلاستاردىڭ ادىمىن اشتىرمادى. ناتيجەسىندە, كەزدەسۋ 3:0 ەسەبىمەن قازاقستان قۇراماسىنىڭ جەڭىسىمەن اياقتالدى.
ء«ى» توبىندا سىنعا ءتۇسىپ جاتقان قازاقستان-شوتلانديا قۇراماسىنىڭ كەزدەسۋى اياقتالا سالىسىمەن كيپر مەن سان-مارينو اراسىنداعى ماتچ باستالدى. بۇل ويىندا كيپر فۋتبولشىلارى 5:0 ەسەبىمەن جەڭىسكە جەتتى. ال ءبىزدىڭ توپتىڭ ۇزدىكتەرى سانالعان بەلگيا مەن رەسەي فۋتبولشىلارى بريۋسسەلدە كەزدەستى. فيفا رەيتينگىندە كوش باستاپ تۇرعان بەلگيا اتالعان ماتچتا 3:1 ەسەبىمەن سولتۇستىكتەگى كورشىمىزدى جەڭىپ كەتتى.
«چەمپيونات» سايتى قازاقستاننىڭ شوتلانديا قۇراماسىن جەڭگەنىن سەنساتسياعا باعالاپ, ءبىزدىڭ قۇراماعا تاڭعالعاندارىن جازادى. سونداي-اق رەسەي قۇراماسىنىڭ باس باپكەرى ستانيسلاۆ چەرچەسوۆ ءۇشىن قازاقستانعا قارسى ويىن 2018 جىلعى الەم چەمپيوناتىنان كەيىنگى ەڭ ماڭىزدى كەزدەسۋ بولماق دەيدى. ال اتى الەمگە ايگىلى Eurosport باسىلىمى قازاقستاندىق فۋتبولشىلارىنىڭ شوتلانديا قاقپاسىنا سوققان گولدارى ادامعا ناعىز ەستەتيكالىق ءلاززات سىيلادى دەگەن ماتەريال جاريالادى.
ءالي بيتورە,
«Egemen Qazaqstan»
