ەلوردانى نۇر-سۇلتان ەسىمىمەن اتاۋ تۋرالى باستامانى قولدايمىن. ەلىمىزدىڭ بارشا ازاماتتارى دا وسى پىكىردى قۋاتتايدى دەپ ويلايمىن. ارينە, اتالعان ماسەلەدە باسقا دا كوزقاراستار بار. ياعني, ءبىز دەموكراتيالىق قوعامدا ءومىر سۇرەمىز, سوندىقتان ازاماتتار وسى جانە باسقا دا ماسەلەلەر بويىنشا وزدەرىنىڭ كوزقاراستارى مەن پىكىرلەرىن اشىق ايتادى. وسىعان وراي, ءدال مۇنداي كوڭىل كۇيدىڭ استانانى اۋىستىرعان ساتتە دە بولعانىن ەسكە سالعىم كەلەدى. بۇدان بىردەڭە شىعاتىنىنا سەنگەندەر وتە از بولدى. سول سياقتى اقمولا اتاۋىن استاناعا اۋىستىرعان كەزدە دە كۇمان كەلتىرۋشىلەر كوپ بولدى. سوندىقتان كەز كەلگەن شەشىمنىڭ جاقتاۋشىلارى دا, قارسىلارى دا بولاتىنىن تۇسىنگەن ابزال. بۇل رەتتە اتالعان باستامانى ەلباسىمىزدىڭ ايرىقشا تاريحي ەڭبەگىنە ۇلتىمىزدىڭ العىسى دەپ باعالاۋ زاڭدىلىق دەپ ويلايمىن.
نۇرسۇلتان ءابىش ۇلى تاۋەلسىز قازاقستاننىڭ نەگىزىن قالاۋشىسى, قالىپتاستىرۋشى عانا ەمەس, تاۋەلسىز قازاقستاننىڭ سيمۆولىنا اينالعان جاڭا استانانىڭ ىرگەتاسىن قالاعان باس ساۋلەتشىسى دە. ەگەر دە ونىڭ ەرەكشە ەرىك-جىگەرى, كورەگەندىلىگى, توزىمدىلىگى بولماسا, جاڭا استانانىڭ قۇرىلىسى دا, قازىرگى اڭگىمەمىزدىڭ دە نوبايى بولماس ەدى.
سول سەبەپتى بارلىق ازاماتتاردىڭ ەلباسىنا دەگەن شىنايى ادالدىعى مەن قولداۋىن كورسەتەتىن ۋاقىت كەلدى.
ايدا بالاەۆا,
قازاقستان رەسپۋبليكاسى پرەزيدەنتى اكىمشىلىگىنىڭ ىشكى ساياسات ءبولىمىنىڭ باسشىسى
