«نازارباەۆتىڭ جەتىستىكتەرى ونىڭ قازاقستان تاريحىنداعى ەڭ ءىرى ساياساتكەر ەكەنىن كورسەتەدى. ول كەڭەس وداعى ىدىراعانعا دەيىن دە ەلدى باسقارعان. ونىڭ كۋاگەرى بولدى. قازاقستان تاۋەلسىزدىك العاننان كەيىن نازارباەۆ ءوز ەلىنىڭ جاعدايىن ودان ءارى جاقسارتۋ ءۇشىن دامۋدىڭ قولايلى جولىن تاڭدادى. بۇل قازاقستاندى ورتالىق ازياداعى ەڭ بەدەلدى ەلگە اينالدىردى», دەيدى باسىلىم.
سونداي-اق Global Times ن.نازارباەۆ نارىقتىق ەكونوميكاعا كوشۋ ارقىلى تاۋەلسىزدىكتىڭ العاشقى جىلدارىنداعى ءتۇرلى قيىندىقتاردى ەڭسەرگەنىن اتاپ كورسەتكەن.
«نازارباەۆ ەكونوميكانى دامىتۋ جونىندەگى بىرقاتار ستراتەگيالاردى ازىرلەدى. سونىڭ ناتيجەسىندە قازاقستان جان باسىنا شاققاندا ءىجو-ءى 10 000 اقش دوللارىنان اساتىن الەمنىڭ 50 جەتەكشى ەلىنىڭ قاتارىنا كىردى. قازاقستاننىڭ ەندىگى مىندەتى – الەمنىڭ ەڭ ۇزدىك 30 ەلىنىڭ قاتارىنا كىرۋ. قازاقستان بۇل اتقا لايىق دەرجاۆاعا اينالدى», دەپ اتاپ وتكەن ماقالا اۆتورى.
بۇدان بولەك باسىلىم ەلباسىنىڭ سىرتقى ساياساتتا ارتاراپتاندىرىلعان جانە تەڭدەستىرىلگەن ديپلوماتيالىق ستراتەگيانى جاقتاعانىن كەلتىرەدى. سونىڭ ناتيجەسىندە ورتالىق ازياداعى كورشى ەلدەرمەن قارىم-قاتىناس دامىپ, تاريحتان قالعان شيەلەنىستەر وڭ شەشىمىن تاپقان.
«نازارباەۆ تاۋەلسىز مەملەكەتتەر دوستاستىعىنا, ۇجىمدىق قاۋىپسىزدىك تۋرالى شارت ۇيىمىنا جانە ەۋرازيالىق ەكونوميكالىق وداققا كىرۋ, سونداي-اق رەسەيمەن بايلانىستى دامىتۋ سياقتى وڭىرلىك قاتىناستاردى جاقسارتۋعا باعىتتالعان بىرقاتار تەتىكتەر مەن ۇسىنىستارعا باستاماشىلىق ەتتى. ەۋروپالىق دەرجاۆالارمەن جانە اقش-پەن جاقسى قارىم-قاتىناستا بولۋدى قولدادى. نازارباەۆ بىرنەشە رەت اقش پەن ەۋروپالىق ەلدەرگە ءىس-ساپارمەن باردى. قىتايمەن جان-جاقتى ارىپتەستىك قارىم-قاتىناس ورناتتى. شانحاي ىنتىماقتاستىق ۇيىمىمەن جانە حالىقارالىق ىنتىماقتاستىقتىڭ ارتۋى ءۇشىن ء«بىر بەلدەۋ, ءبىر جول» باستاماسى بويىنشا قازاقستاننىڭ كەڭىستىگىن كەڭەيتتى», دەلىنگەن Global Times گازەتىندە جاريالانعان ماقالادا.
سونداي-اق Global Times باسىلىمى قازاقستاننىڭ ابىرويى تىكەلەي ن.نازارباەۆپەن بايلانىستى ەكەنىن ايتادى.
«قازاقستاننىڭ داڭقى كوپ جاعدايدا نازارباەۆقا بايلانىستى دەپ ايتۋعا بولادى. ەندى قازاقستاننىڭ ورتالىق ازيادا جەتەكشى ءرول يەلەنىپ, باسقا ءىرى دەرجاۆالاردىڭ اراسىندا تەپە-تەڭدىك ساقتاي وتىرىپ دامۋ ماسەلەسى الداعى كۇننىڭ ەنشىسىندە», دەپ تۇيىندەيدى ماقالا اۆتورى.
