ەندى اۋەجايداعى ساتۋشىسىز دۇكەندە كەز كەلگەن جولاۋشى ارنايى تولەم جاشىگىنە اقشاسىن قالدىرىپ, قالاعان نارسەسىن الا الادى. ياعني, ساتىپ الۋشىلار دۇكەندە ساتۋشىنىڭ جوقتىعىنا قاراماستان, ادالدىق قاعيداسىنا وراي وزدەرىنە وزدەرى قىزمەت ەتەدى.
مۇنداي دۇكەندەردىڭ اشىلۋى قوعام مەن ازاماتتار اراسىنداعى ادامگەرشىلىك قاسيەتتەرىن دامىتۋعا, مەيىرىمدى, ادال بولۋعا جانە ءوزىن-ءوزى دامىتۋعا باعىتتالعان. سونىمەن بىرگە, اقتاۋ قالاسى تەك جۇمىس بابىمەن كەلەتىن شەتەلدىكتەر ءۇشىن ەمەس, سونداي-اق, تۋريستەر ءۇشىن دە سۇيىكتى قالاعا اينالعاندىقتان, كەلگەن قوناقتاردىڭ جاقسى اسەرمەن قايتقانى دا ماڭىزدى.
-بۇرىن ادالدىق دۇكەندەرى ەسەنوۆ ۋنيۆەرسيتەتى (Yessenov University) مەن قازاقستان تەڭىز ۋنيۆەرسيتەتىندە اشىلعان بولاتىن. مۇنداي دۇكەندەردى اشۋ ەڭ الدىمەن, بارلىق ازاماتتاردا جاقسى مورالدىق قاسيەتتەردى قالىپتاستىرۋعا باعىتتالعان. اتالعان فاكتورلار سىبايلاس جەمقورلىققا قارسى يممۋنيتەتتى كوتەرۋگە تىكەلەي اسەر ەتەتىنىن اتاپ وتكىم كەلەدى. بۇل بىرتىندەپ قوعامدا سەنىمدىلىكتىڭ ارتۋىنا جانە كەز كەلگەن ازاماتقا ءوزىن ادال تۇلعا رەتىندە قالىپتاسۋعا مۇمكىندىك بەرۋ بولىپ تابىلادى, دەيدى قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتىنىڭ باسشىسى ن.جاننازاروۆا.
ايتا كەتۋ قاجەت, اۋەجاي تەرمينالىنىڭ وتكىزۋ قابىلەتتىلىگى, ياعني سىيىمدىلىعى ساعاتىنا 450 جولاۋشىنى قۇرايدى. اقتاۋ اۋەجايى ارقىلى كەلىپ-كەتۋشىلەردىڭ سانى ىشكى جانە حالىقارالىق رەيستەردى قوسا العاندا كۇنىنە 2 مىڭنان استام ادامدى قۇرايدى.
قازىرگى تاڭدا اۋەجاي استانا جانە الماتى اۋەجايلارىنان كەيىن, تاسىمال كولەمى بويىنشا قازاقستان رەسپۋبليكاسىندا ءۇشىنشى ورىندا تۇر. اۋەجايدا قازاقستاندىق جانە شەتەلدىك اۆياكومپانيالار قىزمەت كورسەتەدى, ولار 8 ىشكى جانە 16 حالىقارالىق باعىتتار بويىنشا ۇشۋلاردى ورىندايدى. اقتاۋ قالاسىنان ماسكەۋ, ىستامبۋل, باكۋ جانە كيەۆ قالالارى ارقىلى الەمنىڭ كەز كەلگەن نۇكتەcىنە جەتۋگە بولادى. سونىمەن بىرگە, اقتاۋ حالىقارالىق اۋەجايى جەر ۇستىندە قىزمەت كورسەتۋ كەزىندە قاۋىپسىزدىكتى قامتاماسىز ەتۋ ستاندارتتارىنا جانە ساپا مەنەدجمەنت ستاندارتتارى جۇيەسىنە سايكەس, ISAGO سەرتيفيكاتىن العان قازاقستانداعى جالعىز اۋەجاي بولىپ تابىلادى جانە ISO- 9001 ساپا مەنەدجمەنتى جۇيەسىنىڭ سەرتيفيكاتىن يەلەنگەن.
وسىعان دەيىن اۋەجاي «تمد ەلدەر اراسىندا ەڭ ۇزدىك اۋەجاي» بايقاۋىندا «تمد ەلدەر اراسىندا قارقىندى دامۋشى اۋەجاي» نوميناتسياسىندا جەڭىمپاز بولدى. سونداي-اق, 2018 جىلدىڭ قىركۇيەك ايىندا «اقتاۋ حالىقارالىق اۋەجايى» اق جالپى سوماسى 28,72 ملرد تەڭگەنى قۇرايتىن اۋەجاي قۇرىلىسى مەن پايدالانۋ جوباسىن سىبايلاس جەمقورلىققا قارسى سۇيەمەلدەۋ بويىنشا كەلىسىمگە قول قويىلعان بولاتىن.
گۇلايىم شىنتەمىرقىزى,
«Egemen Qazagstan»
ماڭعىستاۋ وبلىسى
