قازاقستان • 19 ناۋرىز، 2019

ءبىلىم ءمينيسترى «ناۋرىز كانيكۋلىن» ەنگىزۋگە قاتىستى پىكىر ءبىلدىردى

1884 رەتكورسەتىلدى

ءبىلىم جانە عىلىم ءمينيسترى كۇلاش ءشامشيدينوۆا III جانە IV توقسان اراسىنداعى دەمالىستاردى بەرى قاراي جىلجىتىپ، وقۋشىلار مەن ستۋدەنتتەرگە ناۋرىز مەيرامىن تويلاۋعا 10 كۇن بەرۋ ماسەلەسىنە قاتىستى پىكىر ءبىلدىردى. بۇل تۋرالى قازاقپارات حابارلادى.

اتالعان ۇسىنىستى مادەنيەت جانە سپورت ءمينيسترى ارىستانبەك مۇxامەدي ۇلى جاساعان بولاتىن.

«مىسالى، كۇنتىزبەلىك جاڭا جىل - 1 قاڭتار ءوزىنىڭ مىقتى يدەولوگياسىمەن، سان الۋان بەلگىلەرىمەن وتباسىلىق مەرەكەگە اينالعانى ءمالىم. بۇل ورايدا، ستۋدەنتتەر مەن وقۋشىلاردىڭ ۇلتتىق مەيرامدى وتباسىندا، جاقىندارىنىڭ جانىندا قارسى الۋعا مۇمكىندىك تۋعىزۋ ماقساتىندا 14-23 ناۋرىز ارالىعىندا (10 كۇن) ناۋرىز دەمالىسى بەلگىلەنۋى ءتيىس. بۇل جەردە مەكتەپ وقۋشىلارىنىڭ بۇرىنعى 24 ناۋرىز بەن 1 ءساۋىر ارالىعىنداعى ءىىى-توقسان دەمالىسى ون كۇنگە جىلجىپ، ولار وسى ناۋرىز مەيرامىن وتباسىمەن، اعايىن-تۋمالارىمەن قارسى الۋعا مۇمكىندىك الار ەدى»، - دەپ جازدى ا.مۇxامەدي ۇلى الەۋمەتتىك جەلىدەگى پاراقشاسىندا. 

ونىڭ سوزىنە قاراعاندا، ونكۇندىك دەمالىستى بەرى قاراي جىلجىتسا، III جانە IV توقساننىڭ تەپە-تەڭدىگىن دە ساقتاۋعا مۇمكىندىك بار. ماسەلەن، III توقسان 10 قاڭتار مەن 24 ناۋرىز ارالىعىنداعى 74 كۇندى قامتيدى، ال IV توقسان 1 ءساۋىر مەن 24 مامىردى الىپ وتىر. ول - 54 كۇن. جاڭا نۇسقا بويىنشا وقۋشىلار مەن ستۋدەنتتەردىڭ 10 كۇندىك دەمالىسى بەرى قاراي جىلجىپ، 14-24 ناۋرىزعا كەلسە، ءىىى توقسان (64 كۇن) جانە ءىV توقسان (61 كۇن) تەڭەسەدى. ال قازاقستاندىقتار ناۋرىز مەيرامىن جاڭاشا تويلاي الادى. 

ءبىلىم جانە عىلىم ءمينيسترى كۇلاش ءشامشيدينوۆانىڭ ايتۋىنشا، اتالعان ماسەلەنى جان-جاقتى زەردەلەۋ كەرەك. سەبەبى وقۋ باعدارلاماسىنا سايكەس، ءاربىر توقساننىڭ ءوز جوسپارى بار.

ء«بىز ونى ءالى قاراعان جوقپىز، قاراۋىمىز قاجەت. 10 كۇندى جىلجىتۋ بولعانىمەن، بىزدە ناقتى وقۋ باعدارلاماسى بار. ال III توقساننىڭ جوسپارىن اياقتاۋ قاجەت. ەگەر ونى وزگەرتەتىن بولساق، وقۋ باعدارلاماسىنىڭ ماتەريالىن II توقسانعا كوتەرۋىمىز كەرەك نەمەسە IV توقسانعا ءتۇسىرۋىمىز كەرەك. سول سەبەپتى ونىڭ ءبارىن قاراماي، قازىر بىردەن اۋىستىرا سالامىن دەپ ەشكىم ايتا المايدى. وقۋ باعدارلاماسىن ءاربىر سىنىپ بويىنشا قاراۋ قاجەت. ء اربىر سىنىپتىڭ باعدارلاماسىن جەكە-جەكە قاراۋىمىز كەرەك»، - دەدى ك.ءشامشيدينوۆا.

سوڭعى جاڭالىقتار

ۇقساس جاڭالىقتار