جينالعان كوپشىلىك جىل باسىنىڭ باستى ءدامى – ناۋرىز كوجەدەن ءدام تاتتى. كۇبىدەن تۇسكەن ماي مەن تابادا پىسكەن ىستىق نان, باۋىرساقتان اۋىز ءتيدى. اقساقالداردىڭ اق باتاسىن العان كوش-كەرۋەندى شىمكەنت قالاسى ارداگەرلەر كەڭەسىنىڭ توراعاسى يسامۋددين رىسباي مەن ارداگەر جۋرناليست بايدۋللا قونىسبەك باستاپ شىقتى. مەرەكەلىك ءىس-شارادا قالالىق قازاقستان حالقى اسسامبلەياسى توراعاسىنىڭ ورىنباسارى ءمۇراتالى قالمۇراتوۆ, قوعام قايراتكەرى بايدۋللا قونىسبەك جۇرتشىلىقتى ۇلىستىڭ ۇلى كۇنىمەن قۇتتىقتاپ, ىزگى نيەتتەرىن ءبىلدىردى.
– ناۋرىزدىڭ تاريحى 5 مىڭ جىلدان جالعاسىپ كەلەدى. بۇل مەرەكە ورتا ازيا مەملەكەتتەرىندە كەڭ كولەمدە تويلانادى. يۋنەسكو كولەمىندە 2009 جىلدان بەرى بۇكىل دۇنيەجۇزىلىك مەرەكە بولىپ اتالىپ كەلەدى. بۇگىن دە سالت-ءداستۇر ورتالىعى مەن قازاقستان حالقى اسسامبلەياسىنىڭ ۇيىتقى بولۋىمەن وسىناۋ يگى ءىس-شارا وتۋدە. ەلىمىزدىڭ ىرىسى مول بولسىن! قازاقستاندى مەكەندەيتىن 100-دەن اسا ەتنوس وكىلدەرىنىڭ تاتۋلىعى بەرىك بولسىن! – دەدى م.قالمۇراتوۆ.
ءبىرىنشى قاتاردا قوس تۇيە, ودان كەيىن كۇيمەلەر, اتتىلاردىڭ سوڭىنان جاستار قاز-قاتار تىزبەكتەلىپ, «اق بۇركۋ» ءراسىمىن وتكىزۋ ءۇشىن دەندروساياباققا توقتادى. قالا تۇرعىندارىنا مەرەكەلىك كوڭىل-كۇي سىيلاۋدى كوزدەگەن كەرۋەنشىلەر جول-جونەكەي حالىق اندەرى مەن كۇيلەرىنەن شاشۋ شاشىپ, باۋىرساق تاراتتى.
ايرىقشا ءسان-سالتاناتى جاراسقان كوش-كەرۋەن سوڭىندا قازاقستان حالقى اسسامبلەياسى عيماراتىنىڭ الدىنا تابان تىرەدى. ارنايى داستارحان جايىپ, قالا تۇرعىندارىنا ناۋرىز كوجە تاراتىلدى. سونداي-اق تۇركى حالىقتارىنىڭ ناۋرىزدى تويلاۋداعى ەرەكشەلىكتەرىن ايشىقتايتىن كورمە مەن كونتسەرتتىك باعدارلاما جۇرتشىلىقتىڭ نازارىنا ۇسىنىلدى.
