19 ناۋرىز، 2019

حالىقارالىق ديالوگ: قوسىمشا ءبىلىم كوكجيەكتەرى

797 رەتكورسەتىلدى

وقۋشىلار سارايىندا «قوسىمشا ءبىلىم بەرۋ: بولاشاققا كوزقاراس» اتتى حالىقارالىق قۇرىلىمدىق ديالوگ ءوتتى. 

وعان ءبىلىم جانە عىلىم مينيسترلىگىنىڭ جاۋاپتى ماماندارى، «Nur Otan» پارتياسىنىڭ ۇلتتىق كاسىپكەرلەر پالاتاسىنىڭ، اتا-انالار ۇيىمىنىڭ، ەۋرازيالىق قاۋىمداستىعىنىڭ رەسەي، بەلارۋس جانە قىرعىزستانداعى وكىلدەرى،  مەكتەپتەر باسشىلارى  مەن ۇكىمەتتىك ەمەس ۇيىمداردىڭ جەتەكشىلەرى قاتىستى.

پارلامەنت سەناتىنىڭ دەپۋتاتى ساۋلە ايتباەۆا ەلىمىزدە مەكتەپتەن تىس 1303 ۇيىم مەن ءبىلىم وردالارىندا 63 مىڭنان استام ۇيىرمە جۇمىس ىستەيتىنىن جەتكىزدى. بالالاردىڭ 82،8 پروتسەنتى قوسىمشا بىلىممەن قامتىلعان. ء«تورتىنشى ونەركاسىپتىك رەۆوليۋتسيا جاعدايىندا دامۋدىڭ جاڭا  مۇمكىندىكتەرى» جولداۋى اياسىندا  60 مىڭنان  استام وقۋشى باراتىن 17 تەحنوپارك پەن  16  بيزنەس-ينكۋباتور اشىلدى. ۇستىمىزدەگى جىلى  تەحنوپاركتەرىنىڭ سانى – 25، بيزنەس-ينكۋباتورلار 18-گە جەتكىزىلىپ،  120 مىڭ بالانى قامتيتىن بولادى.

وبلىس اكىمىنىڭ ورىنباسارى ماديار قوجاحمەت ءوز سوزىندە قوسىمشا ءبىلىم بەرۋدىڭ ماڭىزىنا توقتالدى.

«بىلتىر پايدالانۋعا بەرىلگەن وقۋشىلار سارايى قوسىمشا ءبىلىم بەرۋدىڭ زور مۇمكىندىكتەرىنە جول اشىپ وتىر . مۇندا قازاقستان مەن رەسەيدىڭ حV وڭىرارالىق ىنتىماقتاستىق فورۋمى ءوتتى. بۇدان وزگە  مادەني جانە ىسكەرلىك قارىم-قاتىناستاردىڭ ورتالىعىنا اينالعانىن ايتا كەتكەن ءجون. وڭىرىمىزدە 40 مىڭنان استام بالا قوسىمشا بىلىممەن قامتاماسىز ەتىلسە، پەتروپاۆلدا وقۋشىلاردىڭ 90 پروتسەنتى ساباقتان تىس ۇيىرمەلەرگە قاتىسادى»، دەدى ماديار دۇيسەنباي ۇلى.

ءبىلىم باسقارماسىنىڭ باسشىسى گۇلميرا كارىموۆا جينالعانداردى وقۋشىلار سارايىنىڭ جۇمىسىمەن تانىستىردى.

شارا بارىسىندا ەرەكشە ءبىلىم بەرۋ قاجەتتىلىكتەرى بار بالالاردى وقىتۋدا قولدانىلاتىن يننوۆاتسيالار، Win-win ستراتەگياسى، بەينەلەۋ ونەرىندە ءىت-تەحنولوگيالاردى پايدالانۋ جايلى كەڭىنەن ماعلۇماتتار بەرىلدى. سونداي-اق، جيىندا بالالاردى وقىتۋدا تەحنيكالىق جانە كاسىپكەرلىك باعىتتارىنىڭ زاماناۋي ۇلگىلەرىن، جالپى ورتا جانە قوسىمشا ءبىلىمنىڭ ءتۇرلى كىرىكتىرىلۋ فورمالارىن ەنگىزۋ ماسەلەلەرى تالقىلاندى. سونىمەن قاتار جاسوسپىرىمدەردىڭ اراسىندا STEM-ءبىلىم بەرۋ جۇيەسىن دامىتۋ، ساندىك-قولدانبالى ونەردى، ءان مەن ءبيدى ەستەتيكالىق تاربيە بەرۋدە ۇتىمدى قولدانۋ جايلى ايتىلدى.

حالىقارالىق ديالوگ سوڭىندا قوسىمشا ءبىلىم بەرۋدىڭ دامۋ باعىتتارىن انىقتايتىن ءتيىستى ۇسىنىمدار ازىرلەندى.

ءومىر ەسقالي،

«ەگەمەن قازاقستان»

سولتۇستىك  قازاقستان وبلىسى

سوڭعى جاڭالىقتار

تەاتردىڭ ونلاين تارتۋى

رۋحانيات • كەشە

ءۇي جانۋارىنان ۆيرۋس جۇعا ما؟

كوروناۆيرۋس • كەشە

ۇقساس جاڭالىقتار