كەنەن اتامىز جامبىل وبلىسى قورداي اۋدانىنىڭ ماتىبۇلاق ەلدى مەكەنىندە دۇنيەگە كەلگەن. عاسىرعا جۋىق عۇمىر كەشكەن ابىز قاريانىڭ باسقاسىن ايتپاعاندا, 1916 جىلى ۇلت-ازاتتىق قوزعالىسقا قاتىسىپ, ءوزى شىعارعان «بۇلبۇل» ءانى, ۇلى وتان سوعىسى جىلدارىنداعى جالىندى جىرلارى سول زاماننىڭ بوياماسىز كوركەم بايانى ىسپەتتەس. قوعام قايراتكەرى, عالىم مىرزاتاي جولداسبەكوۆتىڭ ايتۋىنشا, كەنەن اتامىز قازاقتىڭ رۋحاني قازىنا قورىنا 100-دەن استام ءان, ولەڭ-جىر, ەپيكالىق داستان قوسقان ەكەن.
مادەني شارانى اشىپ, كورمە تاماشالاۋعا كەلگەن قاۋىمعا قۇتتى بولسىن ايتقان ۇلتتىق مۋزەي ديرەكتورىنىڭ ورىنباسارى اباي ساتىبالدين, بۇگىنگى كوپشىلىك نازارىنا ۇسىنىلىپ وتىرعان قۇندى جادىگەرلەر قورداي اۋداندىق ك.ازىرباەۆ اتىنداعى ادەبي-مەموريالدىق مۋزەي قورىنان اكەلىنگەنىن جانە مادەنيەت جانە سپورت مينيسترلىگى مەن وبلىس اكىمدىگى بيىل اقىننىڭ شىعارماشىلىعىن جان-جاقتى ناسيحاتتاۋ ماقساتىندا ەلىمىزدىڭ 9 قالاسىندا 13 ءىس-شارا جوسپارلاپ وتىرعانىن جەتكىزدى.
كورمەنى تاماشالاۋعا جينالعان جۇرت سورەدەن كەنەن اتامىزدىڭ ءومىر جولىنا قاتىستى فوتوسۋرەتتەردى, ناقتىراق ايتساق, اتاقتى جىرشى نارتاي بەكەجانوۆپەن بىرگە تۇسكەن سۋرەتى (1949 ج), جازۋشى ءسابيت مۇقانوۆپەن قاتار تۇرعان بەينەسى (1967 ج), 75 جىلدىق مەرەيتويىندا اكادەميك احمەت جۇبانوۆ اقىنعا دومبىرا سىيلاپ تۇرعان ءساتى, 90 جىلدىق تويىندا كسرو حالىق ءارتىسى بيبىگۇل تولەگەنوۆانىڭ قۇتتىقتاپ كەلۋى, ت.ب. فوتو قۇجاتتاردى تاماشالادى.
سونىمەن قاتار اقىننىڭ پ ۇلىشتەن تىگىلگەن مامىق جاعالى جاسىل شاپانى, ءوزى ۇستاعان دومبىراسى, 1974 جىلى 14 ماۋسىمدا اقىنعا بەرىلگەن لەنين وردەنى, ءتىرى كۇنىندە ءوزى تۇتىنعان بۇيىمدار – كوزاينەك, قالامساپ, قولساعات, كىسە بەلدىك قاتارلى جادىگەرلەر دە كورمە تورىنەن ورىن الىپتى. جينالعان جۇرتشىلىق جوعارىداعى جادىگەرلەردى تاماشالاۋمەن قاتار, مەرەيتوي قارساڭىندا تۇسىرىلگەن «الاتاۋدىڭ اقيىعى» اتتى دەرەكتى ءفيلمدى كورىپ, كوزايىم بولدى.
بەكەن قايرات ۇلى,
«Egemen Qazaqstan»
