شىمكەنت قالالىق پوليتسيا دەپارتامەنتى ەڭبەكشى اۋداندىق پوليتسيا باسقارماسىنىڭ پوليتسيا مايورى جاندوس سۇلتانوۆقا الاياقتىق ءىستى قىسقارتىپ بەرۋى ءۇشىن 400 مىڭ تەڭگە پارا سىياقى بەرمەك بولعان.
الايدا, جاندوس ايبار ۇلى «ارام ولجادان» باس تارتىپ, ءوزىنىڭ اتا زاڭ الدىندا ادال ەكەندىگىن دالەلدەدى.
شىمكەنت قالاسى پوليتسيا دەپارتامەنتى تاراتقان مالىمەتكە سۇيەنسەك, اتالعان ءىس 20 اقپاندا ەڭبەكشى اۋداندىق پوليتسيا باسقارماسىندا ورىن العان.
قازىرگى تاڭدا بۇل جايتقا قاتىستى شىمكەنت قالاسى پوليتسيا دەپارتامەنتىنىڭ وزىندىك قاۋىپسىزدىك باسقارماسىمەن قر قك-ءنىڭ 367-بابىنىڭ 1 بولىگى «مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن لاۋازىمدى تۇلعانىڭ جەكە وزىنە نەمەسە دەلدال ارقىلى پارا بەرۋ» بويىنشا قىلمىستىق ءىس قوزعالىپ, سوتقا دەيىنگى تەرگەپ-تەكسەرۋ امالدارى جۇرگىزىلۋدە.
ال, زاڭسىزدىقتىڭ جولىن كەسكەن قالالىق پوليتسيا دەپارتامەنتىنىڭ ەڭبەكشى اپب تەرگەۋ ءبولىمىنىڭ باستىعى پوليتسيا مايورى جاندوس سۇلتانوۆقا قر ۇكىمەتىنىڭ 2015 جىلعى 30-جەلتوقسانداعى №1131 قاۋلىسىمەن بەكىتىلگەن «سىبايلاس جەمقورلىق قۇقىق بۇزۋشىلىق فاكتىسى تۋرالى حابارلاعان نەمەسە سىبايلاس جەمقورلىققا قارسى ءىس-قيمىلعا وزگە دە جولمەن جاردەمدەسەتىن ادامداردى كوتەرمەلەۋ قاعيدالارىنا» سايكەس, دەپارتامەنت باسشىلىعى تاراپىنان قارجىلاي سىياقى تابىستالدى.
نۇرشات توكەن,
«Egemen Qazaqstan»
شىمكەنت
