سول كەزدە قازاقستان ءبىلىم جانە عىلىم ءمينيسترى ءبىلىم مازمۇنىن جاڭارتۋ جاعدايىندا بالالار مەن وقۋشى جاستاردىڭ تاربيەسىندەگى يدەولوگيا مەن ستراتەگياسىن انىقتاۋدى ماقسات ەتكەن «تاربيەنىڭ تۇجىرىمدىق نەگىزدەرىن» بەكىتكەن ەدى. وسى قۇجاتتا ادامي جانە ۇلتتىق قۇندىلىقتارعا, پاتريوتتىق تاربيەگە, ەڭبەككە جانە ادام قۇقى مەن ەركىندىگىنە باسىمدىق بەرىلدى.
بۇگىنگى جاستار وسى تاربيە باعىتى مەن ءبىلىم ۇدەسىنەن قانشالىقتى شىعىپ وتىرعانىن انىقتاۋ ءۇشىن قر مەملەكەتتىك قىزمەت جانە سىبايلاس جەمقورلىققا قارسى ءىس-قيمىل اگەنتتىگىنىڭ وبلىس بويىنشا دەپارتامەنتى «سانالى ۇرپاق» فرونت-وفيسىمەن بىرلەسە وتىرىپ, ەلىمىزدە ءبىرىنشى رەت سىبايلاس جەمقورلىققا قارسى وليمپيادا وتكىزدى. بۇل باستامانى وبلىس وڭىرىندەگى بارلىق جوعارى وقۋ ورىندارى مەن قوعامدىق ۇيىمدار قولدادى. وليمپياداعا وبلىس وڭىرىندەگى بارلىق جوعارى وقۋ ورىندارىنان 50 ستۋدەنت قاتىستى.
وليمپياداعا قاتىسۋشىلار سىبايلاس جەمقورلىققا قارسى ءىس-قيمىلدى رەتتەيتىن ەلىمىزدىڭ جانە حالىقارالىق زاڭنامالارىنان ءبىلىمىن تەكسەرۋ ءۇشىن بىرنەشە سۇراقتارعا جاۋاپ بەرۋى ءتيىس بولدى. تاقىرىپتاردىڭ ءبىرى ستۋدەنتتەردەن مەملەكەتتىك قىزمەت سالاسىنداعى رەفورما وزەكتىلىگىنە قاتىستى ەسسە جازۋدى تالاپ ەتتى. دەپارتامەنت باستىعىنىڭ ورىنباسارى ەرلان سالىقباەۆتىڭ ايتۋىنشا, بۇگىندە سىبايلاس جەمقورلىققا توزبەۋ ءومىردىڭ بارلىق سالاسىن قامتيدى. بۇل باعىتتاعى اقپاراتتار مەن زاڭنامالار تالابىن قوعامنىڭ ءار ازاماتىنا جەتكىزەتىن تابىستى ساياسات ۇلتتىڭ تۇراقتى دامۋىنا كەپىلدىك بەرەدى.
وليمپيادا قورىتىندىسى بويىنشا ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ ستۋدەنتى ايىم بەركەنوۆا ءبىرىنشى ورىندى, ز.الدامجار اتىنداعى قوستاناي الەۋمەتتىك-تەحنيكالىق ۋنيۆەرسيتەتىنىڭ ستۋدەنتى كاميلا ءابىلدينوۆا ەكىنشى, ءىىم ش.قابىلباەۆ اتىنداعى قوستاناي اكادەمياسىنىڭ تىڭداۋشىسى اسەت ناۋرىزباەۆ ءۇشىنشى ورىندى جەڭىپ الدى.
ءنازيرا جارىمبەت,
«ەگەمەن قازاقستان»
قوستاناي
