قاتىسۋشىلار ەكى جاس ساناتى بويىنشا سىنعا ءتۇستى. 10 مەن 14 جاس ارالىعى جانە 15-تەن 18 جاسقا دەيىن. بايقاۋدىڭ تىنىسى جىل ساناپ كەڭىپ, قاتىسۋشىلاردىڭ قاتارى كوبەيىپ كەلەدى. بيىلعى بايقاۋعا 88 جاس سۋرەتشى قاتىسۋدا. جارىس ۇلگىسىنە سايكەس پورترەت, ناتيۋرمورت, پەيزاج جانرلارى بويىنشا ءۇي جۇمىسى جانە دە ۇلى دالانىڭ جەتى قىرى, جاستار ەلىمىزدىڭ بولاشاعى: ۇزدىك لايفحاك جانرلارى بويىنشا 3 ساعات ىشىندە قاتىسۋشىلار تۋىندىلارىن ۇسىنۋى كەرەك.
–داستۇرگە اينالعان «بوياۋلار قۇپياسى» سوڭعى ەكى جىلدا «رۋحاني جاڭعىرۋ» باعدارلاماسى اياسىندا ءوتىپ جاتىر. ءبىرىنشى كەزەڭنىڭ قورتىندىسىن بەزبەندەگەن قازىلار جاس سۋرەتشىلەردىڭ ءتاپ-ءتاۋىر شىڭدالىپ قالعاندىعىن ايتىپ وتىر. ءبىزدىڭ مىندەت –ۇزدىگىن انىقتاپ, ونەرگە دەگەن قۇلشىنىستارىن ارتتىرۋ,–دەيدى ونەرپاز دارىندى بالالارمەن جۇمىس جۇرگىزۋ جونىندەگى وبلىستىق وقۋ-ادىستەمەلىك ورتالىعى ديرەكتورىنىڭ ورىنباسارى باقىت قوسقۇلاقوۆا.
قورشاعان ورتاسىن, ءوزىنىڭ دۇنيەتانىمىن, بالا قيالىنىڭ ۇشقىر ويلارىن قاعاز بەتىنە تۇسىرۋگە تالپىنعان جاس سۋرەتشىلەردىڭ تاڭداپ العان تاقىرىپتارى بۇگىنگى قورشاعان ورتا سەكىلدى جان-جاقتى, ءارى سان بوياۋلى. اقمولا وبلىسى ءبىلىم باسقارماسى جانىنداعى ونەرپاز دارىندى بالالارمەن جۇمىس جۇرگىزۋ جونىندەگى وبلىستىق وقۋ-ادىستەمەلىك ورتالىعىنىڭ مۇرىندىق بولۋىمەن وتەتىن اتالمىش بايقاۋ داستۇرگە اينالعان.
–مەنىڭ بۇگىنگى بايقاۋعا تاڭداپ العان تاقىرىبىم « ۇلى دالانىڭ استاناسى» دەپ اتالادى. مەن اۋداندىق سايىستان 1- ءشى ورىن الىپ, وبلىستىق بايقاۋدا باعىمدى سىناۋعا مۇمكىندىك الدىم. مەن بۇل جەرگە كەلگەنىمنىڭ باستى ماقساتى جەڭىۋ ەمەس, دوستارمەن تانىسىپ, شىعارماشىلىعىمدى شىڭداۋ ءۇشىن كەلدىم,–دەيدى بايقاۋعا قاتىسۋشى ساندۋعاش سەيىلوۆا.
–مەن يندۋكتيۆتىك كەسكىندەمە بويىنشا ەڭبەك دايىنداۋدامىن. وسى باعىتتا ەكى جىل كولەمىندە اينالىسىپ ءجۇرمىن. ال, جالپى سۋرەت سالىپ جۇرگەنىمە 14 جىلداي ۋاقىت بولدى. قازىرگى سالىپ جاتقان تۋىندىم « ۇلى دالانىڭ جەتى قىرى» تاقىرىبىندا,–دەيدى بايقاۋعا قاتىسۋشى اناستاسيا سولوۆەۆا.
تالعامى تاۋداي جاس سۋرەتشىلەردىڭ قيالىنا قانات ءبىتىرىپ, سامعار كوگىنە ەركىن قالىقتاۋ ماقساتىندا ۇيىمداستىرۋشىلار ارنايى شەبەرلىك سىنىبىن دا نازاردان تىس قالدىرماعان. بايقاۋعا قاتىسقان 88 ۇمىتكەردىڭ 12- ءسى جۇلدەلى ورىندارعا يە بولسا, قالعان بارلىق جاس سۋرەتشىلەر ماراپاتتالىپ, باعالى سىيلىقتار تابىستالدى.
بايقال ءبايادىل,
«Egemen Qazaqstan»
اقمولا وبلىسى
