ون جاسىنان باستاپ جانارىنىڭ دۇرىس كورمەيتىنىن اڭعارعان عالىمنىڭ اتا-اناسى دارىگەرلەردىڭ كومەگىنە جۇگىنگەنىمەن, جاسالعان ەم-دومنىڭ دا جاقسى ناتيجەسى بولا قويمايدى.
الايدا بالا كوڭىل جاسىمادى. سەگىزىنشى سىنىپتان باستاپ زاعيپ جانە كوزى ناشار كورەتىن بالالارعا ارنالعان جامبىل وبلىستىق «بولاشاق» مەكتەپ-ينتەرناتىندا وقۋىن جالعاستىردى. «مەنىڭ ارماندارىمنىڭ ىرگەتاسى وسى مەكتەپتە قالاندى», دەيدى عالىم اداي ۇلى.
مەكتەپتى اياقتاعاننان كەيىن اتا-اناسىمەن بىرگە الماتىعا قونىس اۋدارعان عالىمنىڭ دەنساۋلىعىنا وراي جوعارى وقۋ ورنىنا تەست تاپسىرۋعا دا مۇمكىندىگى شەكتەلدى. كوڭىلى قۇلازىعانىمەن دە وڭتۇستىك استانانىڭ جايما-شۋاق كۇندەرى ونى بارىنشا مەيىرىم قۇشاعىنا تارتىپ اكەتكەندەي اسەرلەندىردى. وسىلايشا قالا ومىرىنە بىرتە-بىرتە بويى ۇيرەنە باستاعان ول قاراپ وتىرماي, كۇزەتشى بولىپ جۇمىسقا ورنالاستى. قولى قالت ەتكەندە بارار جەرى – كىتاپحانا. سوندا وتەتىن تەگىن كۋرستاردىڭ بىردە-ءبىرىن قالدىرمايدى. ەندىگى ءومىردىڭ ءمانى وسى كىتاپ الەمىنىڭ ىشىندە بۇعىپ جاتقانداي كورىنەتىن. كوپ ۇزاماي جۇمىسپەن قامتۋ ورتالىعى ارقىلى رۋحاني ورتانىڭ ءبىر مۇشەسىنە اينالدى. عالىمنىڭ كىتاپحاناداعى ەڭبەك جولىندا گۇلبارشىن راحىمبەردىقىزىنداي بىلىكتى باسشىنىڭ ەڭبەگى زور. مۇنداعى جۇمىستىڭ بارلىعىن دا ىنتا-جىگەرىمەن اتقاراتىن ەڭبەكقورلىعىنا وراي عالىمعا رەسپۋبليكالىق زاعيپ جانە كورۋ قابىلەتى تومەن ازاماتتارعا ارنالعان كىتاپحانادان شىعاتىن «ربنسگ-ۆەستي» گازەتىن شىعارۋ جاۋاپكەرشىلىگى جۇكتەلدى. وسىلايشا جانارىن جاس جۋعان ساتتەر جانىنا جىلىلىق ۇيالاتقان ۇجىمنىڭ ومىرىمەن استاسىپ كەتتى.
ىسكەر مامانعا قاشاندا سۇرانىس جوعارى ەمەس پە؟ كەلىسىمشارتى اياقتالعان سوڭ, سۇيىكتى ءىسىن استاناداعى «ورتالىقتاندىرىلعان كىتاپحانالار جۇيەسى» كوممۋنالدىق مەملەكەتتىك مەكەمەسىنە قاراستى كوزى كورمەيتىن جانە ناشار كورەتىن ازاماتتارعا ارنالعان ارنايى كىتاپحاناسىنىڭ «دىبىس جازۋ ستۋدياسى جانە برايل» كىتاپتارىن شىعارۋ بولىمىندە كىتاپحاناشى بولىپ جالعاستىرعان جاس مامان كومەككە مۇقتاج بالالاردى نازارىنان تىس قالدىرماۋدى ءومىرىنىڭ ءبىر بولشەگىنە اينالدىردى. سالاعا قاتىستى ءبىلىمىن جەتىلدىرىپ, كوكشەتاۋ قالاسىنداعى اقان سەرى اتىنداعى مادەنيەت كوللەدجىن, ودان كەيىن ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىن «كىتاپحانا ءىسى» ماماندىعى بويىنشا ءتامامداپ شىعادى.
ۇلكەن ىزدەنىس پەن قاجىرلى ەڭبەگىمەن العا جىلجىعان عالىم اداي ۇلى استانا قالاسىنداعى №10 گيمنازيادا زاعيپ جانە كوزى ناشار كورەتىن بالالاردى برايل قارپىنە ۇيرەتە باستادى. ەكى باعانعا ورنالاسقان نۇكتەلەردى ساۋساقپەن عانا سەزىنىپ, الەمنىڭ بار قيمىلىن تانۋ ءۇشىن ۇلكەن ەرىك-جىگەردى تالاپ ەتەتىن برايل ءالىپبيىن مەڭگەرۋ وڭاي ەمەس-ءتى. وسىدان كەيىن ارنايى ۇيىرمە ۇيىمداستىرىپ, ساباقتاردى تەگىن وتكىزۋ تۋرالى وي كەلدى.
بۇگىندە كوزى كورمەيتىن جانە ناشار كورەتىن ازاماتتارعا ارنالعان ارنايى كىتاپحانانىڭ باسشىسى عالىم نۇرلانوۆ كومەككە مۇقتاج جاندار ءۇشىن قازاق تىلىندەگى باسىلىمداردىڭ تاپشىلىعىنا قىنجىلادى. وسى ورايدا برايل قارپىمەن باسۋعا ماماندانعان ارنايى باسپاحانا اشىپ, قازاق ءتىلدى كىتاپتاردىڭ جارىققا شىعۋىنا قولداۋ بولسا دەگەن ۇسىنىسىن ەلباسىنىڭ الدىندا دا جەتكىزگەن جاس باسشى زاعيپتارعا ارنالعان كىتاپتاردىڭ باسىم كوپشىلىگى رەسەيدەن اكەلىنەتىندىگىن جەتكىزدى. «برايل قارپىن ۇيرەتۋ بويىنشا قازاق تىلىندەگى كىتاپتار قورى از. وقىرماندار تاراپىنان قازاقتىڭ جاس اقىن-جازۋشىلارىنىڭ شىعارمالارىنا دەگەن سۇرانىس جوعارى. وسى باعىتتا ەلىمىزگە بەلگىلى جاس قالامگەرلەرمەن, سونداي-اق قازاقستان جازۋشىلار وداعىمەن دە كەلىسسوزدەر جۇرگىزۋ جولعا قويىلىپ كەلەدى», – دەيدى عالىم اداي ۇلى. بۇگىندە مىڭنان استام وقىرمانى بار كىتاپحانا وقىرماندارىنىڭ دەنى 18 جاستان جوعارى بولسا, الداعى ۋاقىتتا جاسوسپىرىمدەر مەن بالالاردى دا قامتۋ جوسپارلانىپ وتىر. سەبەبى زاماناۋي تەحنولوگيالار قارىشتاپ دامىپ كەلە جاتقانىمەن دە, جاس بۋىننىڭ كىتاپقا دەگەن قىزىعۋشىلىعى جوعارى.
وسىلايشا جاس مامان الەمنىڭ اسەمدىگىن تانۋعا ۇمتىلعان كومەككە مۇقتاج جاندارعا برايل قارپىنىڭ وقۋ ادىستەمەسىن ۇيرەتىپ, «ساۋساق ۇشىنداعى الەم» ۇيىرمەسىندە ارنايى سينتەزاتور ارقىلى كومپيۋتەرلىك ساۋاتتارىن ارتتىرۋعا ىقپال ەتىپ كەلەدى.
«بولاشاق» كورپوراتيۆتىك قورىنىڭ قولداۋىمەن اشىلعان دىبىس جازۋ ستۋدياسىندا بۇگىندە جۇزدەن استام كىتاپ جازىلعان. وسى قارقىننان تانباساق, وقىرماندارىمىزدىڭ بارلىق سۇرانىسىن قاناعاتتاندىراتىن دارەجەگە جەتەمىز. الداعى ۋاقىتتا ەلەكتروندى جۋرنالداردى زاماناۋي تاسىلدەر ارقىلى مەڭگەرۋ دە جوسپارلانىپ وتىر. بۇل باعىتتا مەملەكەتتىك قولداۋدىڭ ىقپالى زور. قازىرگى كەزدە كىتاپحانا وقىرماندارىنىڭ سوڭعى ۇلگىدەگى كومپيۋتەرلەرمەن وزدەرىنە قاجەت كىتاپتاردى برايل قارپىنە اۋىستىرىپ, پرينتەر ارقىلى قولدارىنا ۇستاپ, سەزىنىپ وقي الاتىن مۇمكىندىگى بار. الداعى ۋاقىتتا «Youtube» دەربەس كانالىن اشىپ, ونەرگە جاقىن جانداردىڭ شىعارمالارىن دىبىس جازۋ ستۋدياسى ارقىلى وڭدەپ, ينتەرنەتكە سالۋ, مۋزىكالىق باعىتتا تەگىن ساباق وتكىزۋ دە جوسپاردا بار», دەپ جىگەرلەنەدى عالىم.
كومەككە مۇقتاج جاندارعا كومەكتەسىپ جۇرگەن عالىم اداي ۇلىنىڭ بۇگىندە جەتكەن جەتىستىكتەرى از ەمەس. «اق تاياق» فەستيۆالىنىڭ برايل جۇيەسى بويىنشا «وقۋ مەن جازۋ» اتالىمىندا گران-پري يەگەرى بولسا, جەڭىل اتلەتيكادان مۇمكىندىگى شەكتەۋلى جاندار اراسىندا وتكەن ء«ۇمىت» سپارتاكياداسىنىڭ كۇمىس جۇلدەگەرى. ەڭبەك جولىندا اقپاراتتىق تەحنولوگيا سالاسىنداعى جەتىستىكتەرى ءۇشىن العان ماراپاتتارىنا قاراي وتىرىپ, جانى دارحان, جۇرەگى جومارت, ەڭ باستىسى, كوكىرەك كوزىنىڭ قۇدىرەتى ارقاسىندا اينالاسىنا شۋاق سىيلاپ جۇرگەن عالىمدى قاجىماس قايراتتىڭ يەسى دەگەن بولار ەدىك.
ەلۆيرا سەرىكقىزى,
«ەgemen Qazaqstan»
الماتى
