تانىم • 19 اقپان، 2019

جاڭا ەسىمدەر تۋرالى وي...

370 رەتكورسەتىلدى

بىلتىردان بەرى ەلباسىمىزدىڭ تىكەلەي تاپسىرماسىمەن جۇزەگە اسىرىلعان، ادام كاپيتالىن قايتسەك دامىتامىز دەگەن ويعا تىكەلەي قاتىسى بار اۋقىمدى دا عيبراتتى جوبالاردىڭ ءبىرى - «100 جاڭا ەسىم» جوباسى.

كەشە، جەكسەنبىنىڭ كەشىندە «حابار» ارناسىندا كورسەتىلگەن، ەلىمىزدىڭ مارتەبەسىن كوتەرۋگە اتسالىسقان مەملەكەتىمىزدەگى جاس ازاماتتاردىڭ پىكىرى، بۇگىنگى ءومىرى، بولاشاققا قاراعان باعىتى تەرەڭ ويعا جەتەلەدى. 
بايقاعانىڭىزداي، وسى پوست ەلىمىزدىڭ بۇگىنگى كەلبەتى مەن بولمىسىن ايشىقتايتىن جاس عۇمىرىن ەڭبەككە ارناعان ارداقتى زامانداستار تۋرالى بولماق.
كەيىپكەرلەردىڭ قاتال تاڭداۋدان وتكەندىگى، ايتقان سالماقتى ويلارى، دارا جولدارى، «ەلىم، جەرىم» دەپ سوققان جۇرەك لۇپىلدەرى – ەرتەڭگى كۇنگە تەگەۋرىڭدى قۋات بەرگەندەي.

جوبانى قاراپ وتىرعاندا كوزىمە ەرىكسىز جاس ءۇيىرىلدى. ول قۋانىشتىڭ نەمەسە قايعىنىڭ جاسى ەمەس، ول ۇلت مۇراتى جولىنداعى كەيىپكەرلەردىڭ جۇرەگى مەن ساناسىنداعى كۇشتى دە قۋاتتى جىگەردىڭ وشپەگەڭدىگىن كورسەتەتىن، نەمەسە قيلى-قيلى تاريحي كەزەڭدەردى، نەبىر كۇردەلى داۋىرلەردى باستان وتكەرگەن ءتوزىمدى حالىقتىڭ  تاۋەلسىزدىكتە تۇساۋىن كەستىرىپ، تاۋەلسىزدىكپەن ەسەيگەن ۇرپاعىنىڭ جىگەرلى دە نامىستى ۇنىنەن تەربەلگەن جۇرەك سەزىمدەرى ەدى...
سونىمەن:
ەڭ باستىسى شارا جۇرگىزۋشىسى، بەلگىلى جۋرناليست، مەديا سالاسىنىڭ جۇيرىگى ماحاببات ەسەن – ءار كەيىپكەردىڭ ءومىرى مەن ءجۇرىپ وتكەن جولىن ءوزىنىڭ جۇرەگىنەن وتكىزىپ، كورەرمەنگە ۇسىنۋى جوبانىڭ پاراساتتىلىعىن كوتەرە ءتۇستى. قازاق تىلىندە ەركىن سويلەۋى دە ءبىراز ادامعا ۇلگى بولارى انىق. بەيبىتشىلىك تۋرالى ايتقان، جالپى شارانى جۇرگىزۋ بارىسىندا ايتىلعان كوپتەگەن ويلارى ادامگەرشىلىك نيەتىنەن تۋىنداعان قوعامدا ورىن العان جاتتاندى پىكىرلەردەن بيىك جاڭا زيالى كوزقاراس بولدى دەگەن ويدامىن.
پاراليمپيادا چەمپيونى، الەم كۋبوگىنىڭ ءتورت دۇركىن يەگەرى، ءجۇزۋشى ەرجان سالىمگەرەۆتى تىڭداعاندا، كومەيىڭە وكسىك تىعىلادى. سەبەبى، قاتىگەز تاعدىردىڭ قيىندىعىنا سىنباعان باتىر مىنەزىنە ءتانتى بولاسىن. ترانسفورماتورعا ويناپ، بالا كەزدە تاعدىر سوققىسىن العان ەرجاننىڭ ءومىر بويى مويىماي، قاجىر، جىگەر، نامىس سەكىلدى ماقساتكەرلىك قاسيەتتەرىن شىڭداۋى قانداي ەرلىك دەسەڭىزشى؟! ەرجاننىڭ بويىنداعى اسىل قاسيەتتەردىڭ ءتۇپ توركىنىندە سۇراپىل سوعىستاردان جەڭىسپەن ورالعان اتا-بابالارىمىزدىڭ بيىك بولمىسى جاتسا كەرەك. تەرەڭگە جەتەلەگەن ويلار كوپ، سەبەبى ۇرپاق ساناسىندا كەز-كەلگەن پروتسەستىڭ، مەيلى ول جاقسى نەمەسە جامان بولسا دا وشپەس ءىز قالدىراتىن گەنەتيكالىق جادىسى بار. بۇگىنگى جاستاردىڭ بۇل تاعدىردان الار ونەگەسى كوپ دەپ ويلايمىن. ەرجاننىڭ ارماندارى ورىندالسىن!

كەلەسى كەيىپكەر، نەيروحيرۋرگ مىڭجىلقى بەردىقوجاەۆ. جاڭا ەسىم دەسە، جاڭا ەسىم. اتىن «مىڭجىلقى» دەپ قويعان اتا-باباسىنىڭ دا حالقىمىزدىڭ ۇلىلىعىن دارىپتەيتىن تەكتى ادامدار ەكەندىگى ويعا كەلدى. سونشاما ميلليمەتر قۇرالمەن نارەستەگە وتا جاسايتىن ەپتى دە ىجداعاتتى، ءتوزىمدى دە شىدامدى، جۇرەكتى دە رۋحتى مىڭجىلقىعا تەك جاقسىلىقتار تىلەيمىن!

ءبىلىمدى دە بىلىكتى، رۋحى وياۋ، جانىن شۇبەرەككە ءتۇيىپ، ار جولىندا قىزمەت ەتىپ جۇرگەن اسكەري، حالىقارالىق فوتوجۋرناليست نازگۇل كەنجەتايدى دا تەبىرەنبەي قاراۋ مۇمكىن بولمادى. وتكەنى، بارشامىزعا كەيدە قولدا بار بەيبىتشىلىك وزدىگىنەن بولا قالعان نەمەسە وسى سارىندا دامي بەرەتىن ۇزدىكسىز پروتسەسس رەتىندە كورىنەدى. حالىقتى جاۋگەرشىلىكتەن ساقتاپ قالۋدا ەلدىگىمىزدىڭ باستى تۇلعاسى مەملەكەت باسشىسى نۇرسۇلتان نازارباەۆتىڭ كورەگەن ديپلوماتيالىق ساياساتى تاۋەلسىزدىگىمىزدىڭ ماڭىزدى شەجىرەسى ەكەندىگىن سانا ەلەگىنەن تاعى دا سان مارتە وتكىزىپ، تولىققاندى تۇيسىنەسىڭ.  

اقىن، ءمولدىر مىسانىڭ «تاۋەلسىزدىك – انالارىمىزدىڭ اق ارمانى مەن بابالارىمىزدىڭ اق باتاسىمەن كەلگەن كيەلى ۇعىم. ءبىز، تاۋەلسىزدىك تۋدىرعان ەسىمدەرمىز. الاشتىڭ رۋحى بوپ قايناعان قارا قازانىنىڭ سۋى سارقىلعان جوق. بۇگىندە، مەن سياقتى قالام تەربەپ جۇرگەن جاستار، سول قاسيەتتى سۋدىڭ ءبىر-ءبىر ءمولدىر تامشىسى»، – دەپ سويلەگەندە، ەلەڭ ەتە قالدىق. بالكىم، گاۋھارداي اسىل، سىناپتاي جۇيرىك، قورعاسىنداي سالماقتى اقىن اپالارىمىزدىڭ ءىزىن جالعاعان جاڭا بۋىن وكىلىنىڭ داۋسىن ەستىگەننەن بولار. حالقىمىزدىڭ سارقىراما سۋداي ارىندى ءسوز بايلىعى ەندىگى جەردە ءمولدىر سەكىلدى جاس اقىندارىمىزعا امانات! 

ەلىمىزدىڭ 100 جاڭا ەسىمى ادامگەرشىلىك پەن ازاماتتىقتىڭ، باتىرلىق پەن ىرىلىكتىڭ ۇلگىسى رەتىندە جاستارىمىزعا ونەگە بولسىن!

جۇلدىز سۇلەيمەنوۆا

سوڭعى جاڭالىقتار

ۇقساس جاڭالىقتار