فلەش-موبقا كلينيكادا ەمدەلىپ جاتقان كىشكەنتاي پاتسيەنتتەردى قولداۋ ءۇشىن ورتالىقتىڭ بارلىق ونكو-گەماتولوگ دارىگەرلەرى قاتىستى. قوعامنىڭ نازارىن قاتەرلى ىسىكپەن كۇرەسكە اۋدارۋ, الدىن الا تەكسەرىلۋگە شاقىرۋ, بۇل اۋرۋدى جەڭۋگە بولاتىنىن كورسەتۋ ماقساتىندا وتكەن شارا اياسىندا «Help today» قوعامدىق ۇيىمىنىڭ جانە ەرىكتىلەردىڭ قولداۋىمەن ارنايى بەينەروليك دايىندالدى. فلەش-موب, بۇگىنگى تىلمەن ايتقاندا challenge - جاقسىلىق ەستافەتاسى رەتىندە قازاق ونكولوگيا جانە راديولوگيا عىلىمي-زەرتتەۋ ينستيتۋتىنا بەرىلدى.
ونكولوگ-دارىگەرلەر: «قاتەرلى ىسىك - سوڭعى ۇكىم ەمەس, اتى جامان اۋرۋدى جەڭۋگە بولادى, ءاربىر بالانىڭ ءومىرى ءۇشىن كۇرەسۋگە مىندەتتىمىز جانە كۇرەسە الامىز! ەڭ باستىسى ومىرگە دەگەن قۇشتارلىقتى جوعالتپاۋ كەرەك», دەيدى.
رەسمي دەرەكتەرگە سۇيەنسەك, جىلىنا ەلىمىز بويىنشا قاتەرلى ىسىككە شالدىققان 600-دەن اسا بالا انىقتالعان. جىلىنا ورتا ەسەپپەن العاندا رەسپۋبليكالىق ورتالىقتاردا قاتەرلى ىسىككە شالدىققان 5000-عا جۋىق بالا ەمدەلەدى.
«وسىدان 25 جىل بۇرىن ەلىمىزدە بالالار لەيكەمياسى مۇلدەم ەمدەلمەيتىن قاتەرلى اۋرۋلاردىڭ ءبىرى بولاتىن. ول كەزدەرى بۇل دياگنوزبەن اۋىرعان بالالار 3-6 ايعا جەتپەي اۋىر قان كەتۋ مەن ءتۇرلى اسقىنۋلاردان قايتىس بولاتىن. ونكوگەماتولوگيا ءبولىمى قان ساسيتىن. ول كەزدەرى دياگنوزدى دا تۋرا ايتپايتىن. ەمدەلۋشىنىڭ كىتاپشاسىنا تەك, قىسقاشا – ول دەپ جازاتىنبىز. ال قازىر اشىق تۇردە جازامىز, ايتامىز. اتا-انالارمەن دە, بالالارمەن دە اشىق تۇردە سويلەسەمىز, اۋرۋ تۋرالى ءتۇسىندىرىپ ايتامىز. قازىر ونكوگەماتولوگيا بولىمىندە كەرىسىنشە, بالالاردىڭ كۇلكىسىن ءجيى ەستيتىن بولدىق. بالالار بيلەيدى, ءان ايتادى, ويىن زالدارىندا وينايدى, ارنايى اشىلعان سمارت-سىنىبىندا بىلىمدەرىن جەتىلدىرەدى. ءجىتى لەيكوز – ۇكىم ەمەس, قازىرگى كۇنى كوپ جاعدايدا ەمدەلىپ كەتۋدە. ەڭ قيىن 90-جىلدارى ءبىز نەمىس ماماندارىمەن ارىپتەستىك ورناتتىق, سونىڭ ارقاسىندا BFM باعدارلاماسى ەنگىزىلدى. قازىرگى كۇنى ءبىز بۇكىل الەمدە قولدانىلاتىن وسى باعدارلامامەن ەمدەۋدەمىز. ءۇمىتىمىز جوعالعان سول جىلدارى ەلىمىزدە كەر گەرمانيا قايىرىمدىلىق ۇيىمىنىڭ قولداۋىمەن العاش رەت زاماناۋي قۇرال جابدىقتارمەن جابدىقتالعان ونكوگەماتولوگيالىق ورتالىقتار اشىلا باستادى. قازاقستانداعى بالالار ونكوگەماتولوگيالىق قىزمەتىنىڭ دامۋىنا بىردەن-ءبىر ەڭبەك سىڭىرگەن جانداردىڭ ءبىرى, قازاق ەلىنەن شىققان, قاراعاندى مەديتسينالىق ۋنيۆەرسيتەتىنىڭ تۇلەگى – بالالار ونكولوگى ۆالەنتين گەراين. ول كوپ جىل ءبىزدىڭ دارىگەرلەرگە كومەك قولىن سوزىپ, ماماندارىمىزدىڭ بىلىكتىلىكتەرىن ارتتىرۋعا اتسالىستى, سونىڭ ارقاسىندا كوپتەگەن بالالارىمىز امان قالدى. ول ناعىز كەڭجۇرەكتى, قايىرىمدى, ەڭ مەيىرىمدى جان. ءبىز وعان جانە بارشا نەمىس ماماندارىنا العىسىمىزدى بىلدىرەمىز. بۇگىنگى كۇنى ءجىتى لەيكوزعا شالدىققان بالالاردىڭ ءومىر ءسۇرۋى 76 پايىزدى قۇرايدى. 2013 جىلدان بەرى ىسىكتەردى ەمدەۋدىڭ جاڭا ادىستەرى قولدانىلۋدا. 2012 جىلدان بەرى بالالارداعى گەموپوەزدىك ءدىڭ جاسۋشالارىن ترانسپلانتاتسيالاۋ ەنگىزىلدى, وسى جىلدان بەرى سۇيەك كەمىگىنىڭ ىشىندەگى اللوترانسپلانتاتسيا جانە اۋتوترانسپلانتاتسيا وتاسى 150-دەن اسا بالاعا جاسالدى. كورسەتىلەتىن مەديتسينالىق قىزمەتتەرگە قولجەتىمدىلىك پەن ساپاسى جاقسارۋدا. بالالاردىڭ وڭالتۋ جايى دا قاراستىرىلعان», دەيدى پەدياتريا جانە بالالار حيرۋرگياسى عىلىمي ورتالىعىنىڭ باسشىسى ريزا بورانباەۆا.
فلەش-موب سوڭىندا دارىگەرلەر, شاراعا اتسالىسقان قايىرىمدى جاندار مەن قوعامدىق ۇيىمداردىڭ وكىلدەرى بالالار مەن اتا-انالارعا اق تىلەكتەرىن ءبىلدىرىپ, تەزىرەك ساۋىعىپ كەتۋلەرىن تىلەدى.
قازىرگى تاڭدا مەديتسينا قاتەرلى ىسىك اۋرۋىن دا ەمدەۋگە بولاتىنىن دالەلدەدى. بۇگىنگى كۇنى ول دەرتتى جەڭىپ, قالىپتى ءومىر ءسۇرىپ جاتقان ازاماتتار وتە كوپ. ماماندار, قاتەرلى دەرتكە شالدىققان بالالار اينالاسىنداعى جانداردىڭ قولداۋىن سەزىنسە, مىقتى بولا تۇسپەك, دەيدى. ەندەشە, بالالارىمىزعا ۇنەمى قولداۋ كورسەتىپ جۇرەيىك!
