جۇرتشىلىق ءبىر-ءبىرىن جۇباتا ءجۇرىپ كوز جۇمعان سابيلەر ءۇشىن اللادان دۇعا تىلەپ, ولاردىڭ اتا-اناسىنا, اعايىن-تۋىستارىنا كوڭىل ايتىپ, سابىرلى بولۋعا شاقىرۋدا, قولدارىنان كەلگەن كومەگىن ۇسىنىپ, وزدەرىنىڭ شىنايى نيەتتەرىن بىلدىرۋدە. قارالى وتباسىنا مەملەكەت باسشىسى ن.نازارباەۆ كوڭىل ايتتى. سونداي-اق ۇكىمەت مۇشەلەرى, دەپۋتاتتار مەن ورتالىق مەملەكەتتىك ورگانداردىڭ, ساياسي پارتيالاردىڭ, ازاماتتىق قوعامنىڭ وكىلدەرىنەن باستاپ قاراپايىم جۇرتشىلىققا دەيىن كوڭىل ايتۋدا.
پارلامەنت سەناتىنىڭ توراعاسى ق.توقاەۆ ءوزىنىڭ تۋيتتەردەگى پاراقشاسىندا: «استاناداعى ءورتتىڭ سالدارىنان بەس بالانىڭ قازا بولعانى تۋرالى قارالى حابار قابىرعامدى قايىستىردى. بۇل ناعىز قاسىرەت. قازا بولعانداردىڭ تۋىستارىنا قايعىرىپ كوڭىل ايتامىن» دەي كەلە, بۇل وقيعا ءتيىستى مەملەكەتتىك ورگاندارعا جانە جالپى قوعامىمىزعا ساباق بولۋى تيىستىگىن اتاپ كورسەتتى.
ال «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ: «راسىمەن, بەس بىردەي ءبۇلدىرشىننىڭ قاپىدا قازا بولۋى تۇتاس حالىقتىڭ قابىرعاسىن قايىستىرىپ جىبەردى. وكىنىشتەن وزەگىمىز ورتەنەدى. بىراق امال جوق. ەندى وسىنداي قاسىرەتتىڭ قايتالانباۋى ءۇشىن ارەكەت ەتۋىمىز كەرەك, – دەپ جازدى فەيسبۋك الەۋمەتتىك جەلىسىندە. – بۇل جايت قوعامداعى كەيبىر وزەكتى ماسەلەلەردىڭ كەزەك كۇتتىرمەي شەشۋدى قاجەت ەتەتىنىن كورسەتىپ بەردى. شىن مانىندە, كوپ بالالى وتباسىلارعا جۇيەلى قولداۋ كورسەتۋ, جۇمىس ىستەيتىن انالارعا لايىقتى جاعداي جاساۋ جانە بالالار قۇقىعىن قورعاۋ ماسەلەسىندە ءالى دە بولسا جەتىلدىرەتىن تۇستاردىڭ بار ەكەنى ءسوزسىز. سوندىقتان دا حالىقتىڭ جاردەماقى, باسپانا ماسەلەسىنە قاتىستى ايتىپ, جازىپ جاتقان سوزدەرى ورىندى. وسىعان وراي «نۇر وتان» پارتياسى بۇل باعىتتاردا ناقتى ۇسىنىستار دايىنداۋدا. الداعى ۋاقىتتا سول بويىنشا ۇكىمەتپەن بىرلەسىپ جۇمىس ىستەپ, جاعدايدىڭ جاقسارۋىنا ءوزىمىزدىڭ ۇلەسىمىزدى قوسامىز دەپ سەنەمىن. سونىمەن بىرگە پارتيا جانىنان بالالار قۇقىعىن قورعاۋ جونىندەگى كەڭەس قۇرۋ تۋرالى شەشىم قابىلدانعانىن جەتكىزگىم كەلەدى. وسى باعىتتا دا بۇكىل قوعام بولىپ جۇمىلىپ, وسكەلەڭ ۇرپاقتىڭ جارقىن بولاشاعى جولىندا بىرلەسىپ جۇمىس ىستەيىك».
ارينە, «تاس تۇسكەن جەرىنە اۋىر». سوندىقتان كوز جۇمعان سابيلەردىڭ اتا-اناسىنىڭ قانداي كۇي كەشكەنىن سوزبەن ايتىپ جەتكىزۋ قيىن. ونى ءبارىمىز تۇسىنەمىز.
قابىرعانى قايىستىرىپ, جاس وسكىندەردى جالماپ كەتكەن بۇل وقيعا استانادا بولعاندىقتان, قالا اكىمى باقىت سۇلتانوۆ ۇكىمەت وتىرىسىندا باقىتسىزدىققا دۋشار بولعان وتباسىنا جان-جاقتى قولداۋ مەن كومەك جاسالاتىنىن مالىمدەدى.
– بۇگىندە استانا قالاسى اكىمدىگى تاراپىنان ءتيىستى بارلىق جاردەم بەرىلۋدە. ارنايى كوميسسيا قۇرىلدى. قازىر اتا-انالارىمەن دە جۇمىس ىستەپ جاتىرمىز. ودان ءارى قانداي جاردەم كورسەتىلەتىندىگى كەلەسى شارالاردا شەشىمىن تابادى. جان-جاقتى كومەك كورسەتىلەدى, – دەدى قالا اكىمى. ونىڭ ايتۋىنشا, وسى ىسپەتتەس جاعدايلاردىڭ الدىن الۋ ءۇشىن اۋدان اكىمدەرىنە, توتەنشە جاعدايلار دەپارتامەنتىنىڭ, پوليتسيا دەپارتامەنتىنىڭ باسشىلارىنا بىرلەسىپ تۇنگى رەيد جۇرگىزۋ جۇمىستارى تاپسىرىلدى. ال كۇندىزگى بارلىق وت جاعىپ وتىرعان جەر ۇيلەر مەن نىساندارداعى تۇرعىندارعا ءورت قاۋىپسىزدىگى ەرەجەلەرىن ساقتاۋ ءتۇسىندىرىلىپ, تەكسەرۋ جۇرگىزۋ جۇمىستارى جالعاسادى.
ايتا كەتەيىك, استانا قالاسى كوكتال-1 شاعىن اۋدانى شىڭعىستاۋ كوشەسىندە بولعان ورتتەن قازا تاپقان بۇلدىرشىندەردىڭ ۇلكەنى 13-تە, ال ەڭ كىشىسى ءۇش ايلىق بولعان. قازا بولعان بالالاردىڭ اكەسى تەحنيكالىق قىزمەت كورسەتۋ ستانساسىندا ىستەيدى ەكەن. تۇندە جۇمىس بەرۋشىسى ونى شۇعىل ىستەرمەن جۇمىس ورنىنا شاقىرتىپ العان. ال پوليەتيلەن كاسىپورىندارىنىڭ بىرىندە ىستەيتىن اناسى تۇنگى اۋىسىمدا بولىپتى. ورتەنگەن ءۇي بالالاردىڭ اناسىنىڭ ۇلكەن اپاسىنا تيەسىلى كورىنەدى. ءورتتىڭ شىعۋ سەبەپتەرى انىقتالۋدا.
«قايعىنى بولىسسە ازايادى» دەگەن حالقىمىز وسى كۇندەرى ءبىر كىسىدەي ىنتىماق تانىتىپ, قارا جامىلعان وتباسىنا رۋحاني قولداۋدان بولەك, ماتەريالدىق كومەك ۇيىمداستىرۋعا دا جۇمىلا كىرىسىپ جاتقانىن اتاپ ءوتۋ كەرەك. مىسالى, قمدب توراعاسىنىڭ ءبىرىنشى ورىنباسارى, نايب ءمۇفتي ناۋرىزباي قاجى تاعان ۇلى استاناداعى «ازىرەت سۇلتان» مەشىتىنىڭ ۇيىمداستىرۋىمەن جينالىپ جاتقان قاراجاتقا باسپانا الىپ بەرىلەتىنىن ايتتى. بۇدان بولەك, ءتۇرلى دەڭگەيلى مەكەمەلەردەن, مەشىتتەردەن, جەكەلەگەن ازاماتتاردان بەس ءبۇلدىرشىننىڭ اتا-اناسىنىڭ ەسەپ-شوتىنا قارجى سالىپ جاتقان, ءبىر كۇندىك ەڭبەكاقىسىن اۋدارۋعا اسىققان ازاماتتاردىڭ قاراسى قالىڭ. وسى رەتتە «Egemen Qazaqstan» گازەتىنىڭ ۇجىمى دا قارا جامىلعان وتباسىنىڭ قايعىسىنا ورتاقتاسىپ, كوڭىل ايتادى جانە ءبىر كۇندىك جالاقىلارىن ەسەپ-شوتىنا اۋدارادى. جاراتۋشى يەمىز كۇناسىز بالدىرعانداردىڭ الدارىنان جارىلقاسىن, اتا-اناسىنا سابىر بەرسىن.
جولدىباي بازار,
«Egemen Qazaqstan»
