...ءوتىنىش بىلدىرەدى
بابا مۇراسى باسپادا قالىپ قويماسا
كوپتەن بەرى قولىما قالام الماپ ەدىم. بيىلعى جىلى 160 جىلدىعى تويلانعالى وتىرعان اۋليە بابامىز ءماشھۇر ءجۇسىپ كوپەي ۇلىنىڭ شىعارمالار جيناعى باسپادا جاتىر دەپ ەستىپ, مازام كەتتى. ونسىز دا كوپ جىلدار بويى كەشەۋىلدەتىپ مەكتەپ باعدارلاماسىنا ەنگەن شىعارمالارىن وقۋعا 10-سىنىپتا 4 ساعات قانا بولىنەدى. سوعان قاراماستان ۇستازدار قاۋىمى ء«ماشھۇرتانۋ» كۋرسىن وتكىزىپ, ء«ماشھۇر وقۋلارىنا» وقۋشىلاردى قاتىستىرىپ, ءتىپتى عىلىمي جوبالاردى دا جازعىزىپ جۇردىك. وسى رەتتە بابامىزدىڭ شوبەرەسى نارتاي قۋاندىق ۇلى مەن «اۋلەتتىك ارحيۆتەگى» ماتەريالداردىڭ كومەگىنە سۇيەندىك. قۋاندىق اعامىزدىڭ كوزى تىرىسىندە ۇرپاعىمەن جازعان رۋحاني مۇرانى جاس ۇرپاققا جەتكىزىپ, پايدالانسا دەگەن نيەتپەن وسى ماقالانى جازىپ وتىرمىز. قۋاندىق پازىل ۇلىنىڭ ءوزىنىڭ ىزدەسەڭ تاپتىرمايتىن ادىستەمەلىك, تاربيەلىك ءمانى زور كىتاپتارىن دا جارىق كۇندە شام الىپ تابا المايسىڭ. ول دا باسپادا جاتىر. مۇمكىن قالتالى ازاماتتار تابىلىپ قالار! اۋليە بابامىزدىڭ كىتابىن تەك وبلىستىڭ وقىرماندارى مەن جاس ۇرپاق قانا ەمەس, سەمەيدە تۇراتىن, قۋاندىق پازىل ۇلىنان ءبىلىم العان ءبىز سياقتى شاكىرتتەرى, بۇگىنگى زەينەتكەرلەر دە قولداپ وتىرعانىن جەتكىزگىم كەلەدى.
تۇرسىن قومشابايقىزى,
زەينەتكەر ۇستاز
...وي بولىسەدى
ەكولوگيالىق مادەنيەت قالىپتاستىرايىق
ادام – تابيعاتتىڭ اجىراماس بولىگى. سوندىقتان حالقىمىزدا «جەر-انا» دەگەن ەگىز ۇعىم قالىپتاسقان. «جەر شوقتىعى كوكشەتاۋ», «جەر ءجانناتى – جەتىسۋ» دەپ, بابالارىمىز تۋعان جەرگە, تابيعاتقا دەگەن ىستىق ماحابباتىن بىلدىرگەن. سوندىقتان ورمان-توعايلاردى ساقتاپ, قورشاعان ورتانىڭ, وزەن مەن كولدەردىڭ لاستانباۋىنا ەرەكشە ءمان بەرگەن. «سۋ ىشكەن قۇدىعىڭا تۇكىرمە», «بۇلاق كورسەڭ – كوزىن اش» دەپ جاس ۇرپاقتىڭ بويىنا تابيعاتتى قورعاۋدىڭ تاربيەسىن سىڭىرگەن.
ادام مەن تابيعاتتىڭ ۇندەستىگى ەكولوگيالىق مادەنيەتتىڭ نەگىزىن قۇرايدى. مۇنداي ۇندەستىك قوعامدىق سانانىڭ وسكەلەڭدىگىن سيپاتتايدى. وكىنىشكە قاراي, ەكولوگيالىق مادەنيەتتىڭ نەگىزىن ساقتاي الماي جاتقانىمىزعا اياق باسقان سايىن كوز جەتكىزۋدەمىز.
سۇلۋلىعى مەن تابيعي كوركىنە تازا اۋاسى, كاۋسار بۇلاقتارى مەن وزەن-كولدەرى جاراسقان ەلىمىزدىڭ ۇلى دالاسى قازىرگى كەزدە ەكولوگيالىق اپات الاڭىنا اينالىپ وتىر. ەكولوگيالىق مادەنيەتتىڭ بيىگىنە جەتۋ ءۇشىن ءبىلىمدى بولۋ جەتكىلىكسىز. ءبىلىم بايلىعىنا رۋحاني بايلىقتىڭ قوسىلۋى عانا ادامدى شىنايى مادەنيەتتى ەتەدى. ونداي ادامنىڭ ەكولوگيالىق مادەنيەتى دە بيىك بولادى. سوندىقتان مادەنيەتتى ۇرپاقتى تاربيەلەۋ ءۇشىن ايانباي ەڭبەك ەتۋ كەرەك.
ا.كامزينا,
مۇعالىم
پاۆلودار وبلىسى,
ماي اۋدانى
...قىنجىلادى
ساياباعىندا باقىراۋىق اندەر شىرقالادى
استانانىڭ «جەرۇيىق» اتتى ساياباعىنا جولداسىممەن بىرگە بارىپ جۇرگەن كەزىمىزدە ءبىر كۇنى بىزبەن ەرىپ جۇرگەن كىشكەنتاي نەمەرەمىز تۇسىنىكسىز تىلدەگى اندەردى ەستىپ, شىداماي ايعاي سالدى: «وسى ءبىز, قازاقپىز, قازاقپىز دەيسىزدەر, نەگە انا تىلىمىزدە اندەر ايتىلمايدى؟». ساسقاننان ءبىز سانجارعا: «اسىقپا, قازاقتىڭ ءانى دە, دومبىرانىڭ داۋىسى دا ءالى شىعادى», دەدىك. وكىنىشكە قاراي, بۇل كۇنى دە, سوڭعى كۇندەرى دە باسقا دا ساياباقتارعا بارعاندا انا تىلىمىزدەگى اندەردى ول دا, ءبىز دە ەستىگەن جوقپىز.
شىنىندا, استانادا عانا ەمەس, كەيبىر باسقا قالالاردىڭ ساياباعىنا بارساڭ دا ءوزىمىزدىڭ تىلدە ەمەس, باسقا تىلدە جىن سوققان, باقىراۋىق اندەر سايراپ تۇرادى. وسىنداي كەزدە ءوزىڭدى باسقا ەلدىڭ ادامى سەكىلدى سەزىنۋگە ءماجبۇر بولاسىڭ. ماسەلەن, كوپ ۋاقىت گەرمانيا جەرىندە اسكەري قىزمەتىمدى اتقارۋعا تۋرا كەلدى, سول كەزدە ساياباعىنا بارا قالساڭ تەك نەمىس تىلىندە عانا اندەرىن ەستيسىڭ. جاقىنداعى ەلدەر دە سولاي. ءبىز نەدەن, كىمنەن ۇيالامىز, قورقامىز؟!
ء«وز ءۇيىم – ولەڭ توسەگىم» دەپ جاستارعا ءجيى ايتقاننان گورى, ىسكەرلىگىمىزدى تاربيە-تالىمنەن دەپ, نەگە كورسەتپەسكە؟ ءبىر سوزبەن, جۇرت بالا-نەمەرەلەرىمەن, ءبىزدىڭ ەلگە كەلگەن قوناقتار بولسىن ساياباقتارعا سەرۋەندەۋگە ءجيى بارادى, سوندا شىركىن قۇرمانعازى, داۋلەتكەرەي, دينا, ءشامشىنىڭ, اسەتتىڭ, باسقا اتاقتى كومپوزيتورلاردىڭ كۇيلەرى, اندەرى شىرقالسا قانداي عانيبەت! قازاقشىلىعىمىزدى قانداي ادام بولسىن سەزىنىپ, ءبىر جاسايدى. ول ءۇشىن اكىمدىكتەر ارقىلى ماسەلەنى شەشۋگە بولادى عوي.
ساپارعالي جاعىپاروۆ,
اسكەري جۋرناليست
استانا
...سەنىم ارتادى
جاستار تەاترىنا ساتتىلىك تىلەيمىز
ماڭعىستاۋ اۋدانىندا اۋداندىق جاستار رەسۋرستىق ورتالىعى جانىنان اۋەسقوي ارتىستەردەن قۇرالعان «جالىن» جاستار تەاترى قۇرىلعان بولاتىن. ماقسات – «رۋحاني جاڭعىرۋ» باعدارلاماسى اياسىندا اۋىل جاستارىنىڭ شىعارماشىلىق الەۋەتىن پايدالانا وتىرىپ, قوعامداعى جاستار اراسىندا كەزدەسەتىن كەلەڭسىز جايتتاردى ساحنالاۋ, جاستار كوزىمەن كورەرمەندەرگە جەتكىزۋ, وي سالۋ, پىكىر قالىپتاستىرۋ.
«تەاتر اشۋ – جاستار ورتالىعىنىڭ باسشىسى, جازۋشى-پۋبليتسيست اللابەرگەن قونارباەۆتىڭ يدەياسى. جىلدىڭ باسىندا مەكتەپ وقۋشىلارى مەن كوللەدج ستۋدەنتتەرى اراسىندا كاستينگ جاريالاپ, ونشاقتى جاستى ىرىكتەگەن بولاتىنبىز. جاستاردىڭ تالابى تاۋداي بولعاسىن جانە اۋەسقوي جاستار بولعاندىقتان ازىرگە قىسقا ۋاقىتتاعى قويىلىمداردى ۇسىنۋدى ويلاستىرىپ وتىرمىز. العاشقى قويىلىم ا.قونارباەۆتىڭ «الدانىش» دراماسى. بۇل دراما قازىرگى تۇيتكىلگە اينالعان مەكتەپ جاسىنداعى وقۋشى قىزداردىڭ جۇكتى بولىپ, ەرتە انا اتانۋىنا قاتىستى دۇنيە», دەيدى تەاتر رەجيسسەرى دينا جولداسبايقىزى.
جۇرتتىڭ جۇرەگىنەن ورىن الىپ, كوپتىڭ كوڭىلىنەن شىعۋدى مۇرات ەتكەن جاستار تەاترىنا ساتتىلىكتەر تىلەيمىز.
قالامپىر تولەگەنقىزى
ماڭعىستاۋ وبلىسى
