ەۋروپالىق كومپانيالار توبى سالعان «SES Saran» كۇن ەلەكتر ستانساسىنىڭ قۋاتى 100 مەگاۆاتتى قۇرايدى. بۇل دەگەنىڭىز, ەنەرگيا نىسانى 40 مىڭنان استام تۇرعىنى بار ساران سياقتى 10 قالانى ەلەكتر قۋاتىمەن قامتاماسىز ەتە الادى دەگەن ءسوز. اتالعان كومپانيالار توبى مۇنىمەن عانا شەكتەلىپ قالمايدى, بولاشاقتا ولار تاعى دا وسىنداي بىرقاتار جوبانى جۇزەگە اسىرۋدى كوزدەپ وتىر.
جاڭا ستانسانىڭ تۇساۋى كەسىلمەي تۇرىپ وبلىس اكىمى ەرلان قوشانوۆ پەن جوبا يەسى, «Sonnenenergie» اق-تىڭ باس ديرەكتورى يان زوننەنشاين ءوزارا ارىپتەستىك تۋرالى مەموراندۋمعا قول قويعان بولاتىن. قۇجات بويىنشا ەۋروپالىق كومپانيالار توبى الداعى ۋاقىتتا بالاما قۋات كوزدەرىن وندىرۋگە باعىتتالعان قۇنى 500 ملن اقش دوللارى بولاتىن جوبالاردى جۇزەگە اسىرماق.
– ءبىزدىڭ نەگىزگى جۇمىس باعىتىمىز كۇن ەنەرگياسىن الۋ, دەگەنمەن اتالعان جوبالاردىڭ باعىتى ءالى ناقتى انىقتالعان جوق. قاراعاندى وبلىسى – ۇلكەن وندىرىستىك ءوڭىر, مۇندا ەنەرگيا كوزدەرى اسا قاجەت. ەل ۇكىمەتىنىڭ ينۆەستورلارعا جاساپ وتىرعان جاعدايى, وبلىس باسشىسىنىڭ قولداۋى, بيزنەسمەندەردىڭ ۇسىنىستارى, تاريحي بايلانىس وسى ءوڭىردى تاڭداۋعا سەبەپ بولدى, – دەگەن «Sonnenenergie» اق-تىڭ باس ديرەكتورى يان زوننەنشاين ءسوزىنىڭ جانى بار. نەگە دەسەڭىز, وبلىستا ينۆەستيتسيا سالىپ, سونىڭ جەمىسىن جەرگىلىكتى حالىقپەن بىرگە كورەم دەگەن كومپانيالارعا جاعداي بارىنشا جاسالعان. مىسالى, ينۆەستور بۇل وڭىردە جەرگىلىكتى اتقارۋشى بيلىك تاراپىنان قۋاتتى قولداۋ كورەدى: قاجەتتى جەر تەلىمدەرىمەن, ينفراقۇرىلىمدىق قاجەتتىلىكتەرمەن, باسقا كومەكتەرمەن تولىق قامتاماسىز ەتىلەدى.
سارانداعى كۇن ەلەكتر ستانساسىنىڭ اشىلۋ سالتاناتىنا ەنەرگەتيكا ءمينيسترى قانات بوزىمباەۆپەن بىرگە قاتىسقان وبلىس اكىمى ەرلان قوشانوۆ وڭىردە ينۆەستيتسيالىق جوبالاردىڭ ءساتتى ىسكە اسىپ جاتقاندىعىن اتاپ ءوتتى.
– بۇل قاراعاندى وبلىسى ءۇشىن ماڭىزدى وقيعا. از ۋاقىت ىشىندە سالىنعان جوبا ىسكە قوسىلىپ وتىر. ەلباسىنىڭ قولداۋىمەن وبلىسىمىزدا الەۋەتى جوعارى جوبالار قولعا الىنعان, بۇگىندە 33 ينۆەستيتسيالىق ءىرى جوبا ىسكە اسىرىلۋدا. ونىڭ ون جەتىسى شەتەلدىك كاپيتالمەن ىسكە قوسىلادى. 1 تريلليون تەڭگەگە 9 مىڭ جۇمىس ورنى اشىلادى. سونىڭ ءبىرى – بۇگىنگى سارانداعى كۇن ەلەكتر ستانساسى. ەلباسىنىڭ 2030 جىلعا دەيىن بالاما ەنەرگيا كوزدەرىنىڭ ۇلەسىن 30 پايىزعا جەتكىزۋ تۋرالى تاپسىرماسى بار. ءبىز سول تاپسىرمالاردى ورىنداي وتىرىپ, باستى ماقساتقا جەتۋ جولىنداعى ۇلكەن قادامدى بۇگىن جاسادىق. وبلىس بويىنشا وسىنداي ەكى جوبا ىسكە اسىپ جاتىر. بۇل جۇمىستار ءارى قاراي جالعاسادى, – دەدى ە.قوشانوۆ.
«SES Saran» كۇن ستانساسى 164 گەكتار اۋماقتى الىپ جاتىر. مۇندا 307 مىڭ ۆولتايكالىق پانەلدەر ورناتىلعان. پايدالانۋ مەرزىمى 40 جىلعا جەتەتىن پانەلدەردىڭ مەتالل قورشاۋى جوق كۇن باتارەياسىنىڭ سوڭعى بۋىنى ەكەنىن ايتا كەتكەن ءجون. ياعني, ونىڭ ۇستىنە قار ءۇيىلىپ قالمايدى, جاڭبىر دا ەش زيان كەلتىرمەستەن جەرگە اعىپ كەتىپ وتىرادى. بۇلتتى كۇندەردىڭ وزىندە پانەلدەر 10-15 مەگاۆاتت قۋات وندىرەدى.
ستانساداعى ەلەكتر قۋاتىن ءوندىرۋدىڭ ءبىر جىلدىق مولشەرى 145 ملن كۆت/ساعاتتى قۇرايدى. قۇرىلىس الاڭىندا 400-گە جۋىق جۇمىسشى ەڭبەك ەتتى, ولاردىڭ قاتارىندا ساران قالاسىنىڭ دا تۇرعىندارى بار. سونىمەن قاتار شەف-مونتاج جۇمىستارىنا گەرمانيا, فرانتسيا, پولشا, بەلارۋس جانە ۋكراينادان كەلگەن ماماندار اتسالىستى.
قاراعاندى وبلىسىنا جۇمىس ساپارىمەن كەلگەن ەنەرگەتيكا ءمينيسترى ق.بوزىمباەۆ بالاما ەنەرگيا كوزدەرىن تابۋدىڭ «جاسىل ەكونوميكا» جوباسىن دامىتۋداعى زور قادام ەكەنىن اتاپ ءوتتى.
– سىزدەردى ۇكىمەت اتىنان بۇگىنگى ماڭىزدى شارامەن قۇتتىقتايمىن. وزدەرىڭىزگە بەلگىلى, ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋىندا قۋات ستانسالارىندا جاڭعىرمالى ەنەرگيا كوزدەرى مەن گازدى گەنەراتورلار ۇلەسىن ارتتىرۋ قاجەتتىگى ايتىلدى. «جاسىل ەكونوميكانى» دامىتۋ باعىتىندا ماڭىزدى شارالار قولعا الىنۋدا. كومىرسۋتەكتى دامۋ باعىتىندا بىرقاتار كەشەندى شارالار قابىلداۋدى قاجەت ەتەدى. بۇل رەتتە ۇلتتىق ەكونوميكانىڭ ەنەرگيا تيىمدىلىگىن ارتتىرۋعا ىقپال ەتەمىز, – دەدى مينيستر.
سارانداعى جاڭا كۇن ستانساسىنىڭ ەلەكتر قۋاتى «SES Saran» جشس مەن «KEGOC» كومپانياسىنىڭ ەسەپ-قارجى ورتالىعى اراسىندا جاسالعان كەلىسىمشارتقا ساي تۇراقتى باعامەن ساتىلاتىن بولادى.
شەتەلدىك ينۆەستورلار قاراعاندى ءوڭىرىنىڭ كليماتتىق جاعدايى كۇن ەنەرگياسىن قۋات كوزىنە اينالدىرۋعا وتە ءتيىمدى ەكەنىن ايتادى. سول سەبەپتى ولار وبلىستا كۇن ەلەكتر ستانسالارىن كوپتەپ سالۋعا نيەتتەنىپ وتىر. ال مۇنىڭ ەكونوميكالىق دامۋى قارقىندى, ءوندىرىس ورىندارى كوپتەپ اشىلىپ, يننوۆاتسيالىق باعدارلامالار جارىسا جۇزەگە اسىرىلىپ جاتقان وبلىستىڭ ەلەكتر قۋاتىنا دەگەن سۇرانىسىن بارىنشا قاناعاتتاندىرۋعا ىقپال ەتەرى ءسوزسىز.
قايرات ءابىلدا,
«Egemen Qazaqstan»
قاراعاندى وبلىسى
