پرەزيدەنت سونداي-اق ءار جولداۋىندا باستى نازارداعى ماسەلە رەتىندە «ەلىمىزدىڭ ەرتەڭگى بولاشاعى – ۇستازداردىڭ قولىندا» دەپ ەل ۇستازدارىنا سەنىم ارتىپ وتىرادى. ول سەنىمگە جەتۋ, ياعني, وركەنيەتتى ەلدەر قاتارىنان كورىنۋ ءۇشىن, زامان تالابىنا ساي ءبىلىم قاجەت ەكەنى بىلگىلى.
قاي ەلدىڭ دە ءوسىپ-وركەندەۋى, عالامدىق دۇنيەدە وزىندىك ورنىن الۋى ۇلتتىق ءبىلىم جۇيەسىنىڭ دەڭگەيىنە, دامۋ باعىتىنا بايلانىستى. «ۇرپاعى ءبىلىمدى حالىقتىڭ بولاشاعى بۇلىڭعىر بولمايدى» دەگەندەي, جاس ۇرپاققا ساپالى, ءمان-ماعىنالى, ونەگەلى تاربيە مەن ءبىلىم بەرۋ – قازىرگى ۋاقىتتىڭ باستى تالابى. ءاربىر وقۋشىنى وقىتىپ تاربيەلەۋگە بايلانىستى ماسەلەلەردى وزدىگىمەن جانە شىعارماشىلىق ىنتامەن شەشۋگە قابىلەتتى جاڭاشىل مۇعالىمنىڭ ءرولى ەرەكشە.
بۇگىندە ۇستاز الدىنا قويىلاتىن تالاپ ەرەكشە. سوندىقتان مۇعالىم ءاردايىم ىزدەنىپ, ءبىلىمىن جەتىلدىرىپ, جاڭالىققا اۋەس بولۋعا ءتيىس. عىلىم مەن بىلىمگە قويار تالاپ ارتىپ, وقۋ جۇيەسى دە كۇردەلەنگەن شاقتا جاڭا قوعام مۇعالىمىنە جۇكتەلەر جۇمىس ەسەلەنە تۇسپەك. ءبىلىم بەرۋ مازمۇنى جاڭارىپ, جاڭاشا كوزقاراس پايدا بولدى.
جاڭارتىلعان ءبىلىم بەرۋدىڭ ماڭىزدىلىعى – وقۋشى تۇلعاسىنىڭ ۇيلەسىمدى قولايلى ءبىلىم بەرۋ ورتاسىن قۇرا وتىرىپ, سىن تۇرعىسىنان ويلاۋ, زەرتتەۋ جۇمىستارىن جۇرگىزۋ, تاجىريبە جاساۋ, اكت-نى قولدانۋ, كوممۋنيكاتيۆتى قارىم-قاتىناسقا ءتۇسۋ, جەكە, جۇپپەن, توپتا جۇمىس ىستەي بىلۋگە باۋلۋ. جاڭا ءبىلىم بەرۋ باعدارلاماسى سىني تۇرعىدان ويلاۋعا, شىعارماشىلىقتى قولدانا بىلۋگە جانە ونى ءتيىمدى جۇزەگە اسىرۋ ءۇشىن قاجەتتى وقىتۋ ءادىس – تاسىلدەرىن ۇيرەتەدى.
ەلباسىمىز ۇسىنىپ وتىرعان قازىرگى عالامدىق جاڭارتۋلار مەن زاماناۋي وزگەرىستەر شەڭبەرىندەگى ءبىلىم بەرۋدىڭ ماقساتى – الەمدىك ساپا دەڭگەيىندەگى جاڭا يننوۆاتسيالىق ءبىلىم كەڭىستىگىن كۇرۋ جانە جاس ۇرپاقتى ابسوليۋتتىك جالپىادامزاتتىق قۇندىلىقتار نەگىزىندە ادامگەرشىلىككە تاربيەلەۋ. قوعامدىق قاجەتتىلىك پەن تاريحي كەزەڭ جۇكتەپ وتىرعان بۇل ماقساتتىڭ جۇزەگە اسىرىلۋى ءبىلىم الۋشىلاردىڭ وزىندىك ۇلتتىق ساناسى, ازاماتتىق ايقىنداماسى, ينتەللەكتۋالدىق وي-ءورىسى, جاۋاپكەرشىلىك سەزىمى, جالپى مادەنيەتى جانە شىعارماشىلىق قابىلەتتەرىنە بايلانىستى ەكەندىگى ءسوزسىز.
بۇگىنگى ءبىلىم بەرۋ جۇيەسى مودەرنيزاتسيالانعان زاماندا كوپ ءتىلدى مەڭگەرۋگە نازار اۋدارىلىپ, جان-جاقتى جول اشىلىپ وتىر. «كەلەشەككە كەمەل بىلىممەن» دەپ ەلباسى ن.نازارباەۆ ۇستانىم ەتكەندەي, الەمدىك ءبىلىم كەڭىستىگىنىڭ قۇپيالارىنا ءۇڭىلىپ, قوعامعا بەيىم, ءوز قابىلەتىن تانىتا الاتىن, جان-جاقتى دامىعان, بىرنەشە ءتىلدى مەڭگەرگەن قۇزىرەتتى تۇلعانى قالىپتاستىرۋ باستى ماقساتتاردىڭ بىرەگەيى بولىپ وتىر. سونداي-اق ءۇشتىلدى وقىتۋ – زامان تالابى. ۇشتىلدىلىك – باسەكەگە قابىلەتتى ەلدەر قاتارىنا اپارار باسپالداقتاردىڭ ءبىرى. وسى ورايدا مەكتەبىمىزدە سەمينارلار, ءتۇرلى كوۋچينگتەر, جارىس ساباقتارى وتكىزىلىپ وتىراتىندىعىن ايتا كەتكەنىمىز ءجون.
نەگىزىنەن وقۋ مەن بىلىمدەگى تىڭ سەرپىلىستەردىڭ ماقساتى – ءححى عاسىر داعدىلارىن دامىتۋعا باعىتتالعاندىعىندا, ياعني مۇعالىمدەر الدىنداعى ۇلكەن مىندەت عىلىم مەن تەحنيكانىڭ دامۋىنا سايكەس وقۋشىنىڭ ءبىلىمى تەرەڭ, ويى ۇشقىر, قابىلەتتى, الەمدىك ستاندارت دەڭگەيىندە جۇمىس ىستەي الاتىن, قۇزىرلى تۇلعانى قالىپتاستىرۋ بولۋى كەرەك. وسى تۇرعىدا مۇعالىم ۇزدىكسىز ىزدەنىستە ءجۇرۋى ءتيىس.
قارلىعاش قاراباسوۆا,
ى.التىنسارين اتىنداعى ورتا مەكتەپتىڭ مۇعالىمى
قوستاناي وبلىسى,
امانگەلدى اۋدانى
