ماڭعىستاۋ وبلىستىق مەملەكەتتىك كىرىستەر دەپارتامەنتى كەدەندىك باقىلاۋ باسقارماسىنىڭ تاۋارلاردى جەتكىزۋ بويىنشا باقىلاۋ ءبولىمىنىڭ جەتەكشى مامانى اسىلبەك قالماقباي, اۆتوماتتاندىرىلعان ۋاقىتتى قاداعالاۋ جۇيەسىنىڭ ارقاسىندا مەملەكەتتىك قىزمەتشىلەردىڭ ۇستەمە جۇمىسى ايتارلىقتاي ازايعانىن ايتادى.
-مەن 2016 جىلى «Yessenov Univercity» وقۋ ورنىن «زاڭگەر» ماماندىعى بويىنشا ءتامامدادىم. ەڭبەك جولىمدى ماڭعىستاۋ وبلىستىق ادىلەت دەپارتامەنتىندە باستادىم. وسىدان 2 جىل بۇرىن وبلىستىق مەملەكەتتىك كىرىستەر دەپارتامەنتىنە اۋىسقان بولاتىنمىن. بۇرىندارى جۇمىس ۋاقىتى اياقتالعانىنا قاراماستان كەيدە قالۋعا نەمەسە دەمالىس كۇندەرى شىعۋعا تۋرا كەلەتىن كەزدەر ءجيى بولاتىن. ال قازىر بۇل كۇندەر ارتتا قالدى. 8 ساعاتتىق جۇمىس ۋاقىتىنان كەيىن كومپيۋتەر اۆتوماتتى تۇردە ءوشىرىلىپ, ۋاقىتىندا ۇيگە قايتامىز, دەيدى ول.
قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتى وكىلدەرىنىڭ ايتۋىنشا, مەملەكەتتىك قىزمەتشىلەردى ۇستەمە جۇمىسقا تارتۋ دەرەكتەرىن الدىن-الۋ بويىنشا بىرقاتار مەملەكەتتىك مەكەمە باسشىلارىمەن ءتۇسىندىرۋ جۇمىستارى جۇرگىزىلگەن. اتالمىش شاراعا ادەپ جونىندەگى كەڭەس مۇشەلەرى مەن سىبايلاس جەمقورلىققا قارسى ستراتەگياسىنىڭ ىسكە اسىرىلۋىنا سىرتقى تالداۋ جاساۋ جانە باعالاۋ جونىندەگى ارنايى مونيتورينگتىك توپ مۇشەلەرى قاتىستىرىلعان. بۇرىندارى ۇستەمە جۇمىستارعا ءجيى جول بەرەتىن مەملەكەتتىك مەكەمەنىڭ ءبىرى – ماڭعىستاۋ وبلىستىق مەملەكەتتىك كىرىستەر دەپارتامەنتى بولاتىن, بۇگىندە ەڭبەك تارتىبىنە بايلانىستى جۇمىس رەگلامەنتىن ساقتاۋ جانە قىزمەتشىلەردىڭ جۇمىستان تىس ۋاقىتتا بولۋ فاكتىسىنىڭ ورىن الماۋى قامتاماسىز ەتىلۋدە. بۇل تۋرالى ماڭعىستاۋ وبلىسى مەملەكەتتىك كىرىستەر دەپارتامەنتىنىڭ ادەپ جونىندەگى ۋاكىلى داۋىلباي وڭداسىنوۆ ايتىپ بەردى.
- شۇعىل جۇمىستار بولا قالسا, باسشىلىقتىڭ رۇقساتىمەن عانا جۇمىس ۋاقىتىنان كەيىن 2 ساعاتتان ارتىق قالۋعا رۇقسات ەتىلمەيدى. سەبەبى مەملەكەتتىك قىزمەتشى ۋاقىتىندا دەمىن الۋى كەرەك. ال بوس ۋاقىتىندا سپورت زالعا بارىپ شىنىعۋعا, كىتاپ وقۋعا نەمەسە قىدىرۋعا, سونىمەن قاتار كينوعا, تەاترعا بارۋعا مۇمكىندىك بولادى. ەڭ باستىسى وزدەرىنىڭ وتباسىنا بارىپ, بوس ۋاقىتتارىن تۋىستارىنىڭ قاسىندا وتكىزە الادى. ياعني, مەملەكەتتىك قىزمەتشىلەردىڭ قۇقىقتارىن بۇزباۋعا كەرىسىنشە ولاردى قورعاۋ باعىتىنداعى جۇمىستار الداعى ۋاقىتتا جالعاسىن تابا بەرمەك, دەدى ول.
جۇمىس بەرۋشىلەر زاڭنىڭ ورىندالىسىن باقىلاۋدا ۇستاعانى دۇرىس, سەبەبى قىزمەتشىنى ارتىق ەڭبەككە تارتۋ مەكەمەنى اكىمشىلىك شىعىنعا دا باتىرادى. ال بۇعان دەيىن ورىن العان زاڭ بۇزۋشىلىقتار بويىنشا, ۋاكىلەتتى ورگان مەكەمە باسشىلارىنىڭ جاۋاپكەرشىلىگىن قاراۋ جونىندە وبلىستىق ەڭبەك باسقارماسىنا ماتەريالدار جولداعان. ناتيجەسىندە قىزمەتشىلەردى ۇستەمە جۇمىسقا تارتۋ دەرەكتەرى بويىنشا ماڭعىستاۋ وبلىستىق اۋىل شارۋاشىلىعى جانە قوعامدىق دەنساۋلىق ساقتاۋ باسقارماسىنىڭ جاۋاپتى تۇلعالارىنا قر اكىمشىلىك قۇقىق بۇزۋشىلىق تۋرالى كودەكسىنىڭ 89 بابىنا سايكەس ايىپپۇل سالىنعان.
گۇلايىم شىنتەمىرقىزى,
«Egemen Qazagstan»
ماڭعىستاۋ وبلىسى
