تەكسەرۋ نەگىزىنەن اۋىل شارۋاشىلىق ماڭىزى بار جەرلەر مەن كوممەرتسيالىق نىساندار قۇرىلىسىنىڭ سالىنباۋىنا قاتىستى جۇرگىزىلگەن. ەلدى مەكەندەردەگى جەر تەلىمدەرىن ءوز بەتىنشە يەمدەنىپ, ونىڭ اۋماعىن قورشاپ الۋ فاكتىلەرى جوق ەمەس. مۇنداي فاكتىلەر ءجيى كەزدەسەدى. مىسالى, قاراسۋ اۋدانىنداعى شارۋا قوجالىقتارى باسشىلارىنىڭ 3,1 مىڭ شارشى مەتر جەردى زاڭسىز يەمدەنۋىنە قاتىستى 4 مالىمەت انىقتالدى. ولارعا ءتيىستى جازا قولدانىلىپ, 600 مىڭ تەڭگە ايىپپۇل سالىندى.
وتكەن جىلى باسقارما اۋىل شارۋاشىلىق ماڭىزى بار 504,7 مىڭ گەكتار اۋماقتىڭ 76 مىڭ گەكتاردان استامىنداعى ورىن العان زاڭ بۇزۋشىلىقتى انىقتادى. ماسەلەن, جايىلىم جەر بولىپ, وندا جايىلاتىن مال بولماسا, بۇل زاڭعا قايشى دەگەن ءسوز. بۇل تالاپتاردى ساقتاماعانداردىڭ جەرىن سوت ارقىلى ءماجبۇرلى تۇردە قايتارىپ الۋ كوزدەلگەن. بىلتىر اۋىل شارۋاشىلىعى ماقساتىنداعى 456 مىڭ گەكتار اۋماققا قاتىستى 28 نارازى حات جولدانعان بولسا, مەملەكەت مەنشىگىنە 290 مىڭ گەكتارعا جۋىق جەر تەلىمى قايتارىلدى. 130 گا القاپقا قاتىستى قۇجاتتار سوت قاراۋىندا جاتىر.
«بيىل اۋىل شارۋاشىلىق باعىتىنداعى 10,7 مىڭ گەكتار بولاتىن 11 ۋچاسكەنى سوت ارقىلى قايتارىپ الۋ جوسپارلانىپ وتىر» دەدى باسقارما باسشىسى نۇرلان ءابدۋوۆ.
وبلىس اكىمى ارحيمەد مۇحامبەتوۆ كەيبىر اۋداندارداعى جەر پايدالانۋ مەن قورعالۋىن باقىلاۋ بولىمدەرىندە ماماندار جەتىسپەيتىنىن, بۇل ماسەلەنى شەشۋ قاجەتتىگىن دە ايتتى. ەڭ باستىسى جەر بوس جاتپاۋى ءتيىس.
«پايدالانىلماعان جەر دەگەن بولماۋ كەرەك. ونى قايتارۋ ءۇشىن ەسكەرتۋ, قانشاما حاتتار, سوتقا بەرۋدىڭ ۇزاققا سوزىلاتىن پروتسەسس ەكەنىن تۇسىنەمىز. اۋىل ادامدارىنان مالدىڭ ءورىسى جوق دەپ شاعىم كوپ تۇسەدى. مال ۇستاۋ ءۇشىن مەملەكەتتىك باعدارلامالارعا قاتىسىپ, شاعىن نەسيە الاتىندار, مالىن قايدا جايارىن بىلمەيدى. ال كەيبىرەۋلەر جەردى الىپ الىپ, نە ءوزى پايدالانبايدى, نە جۇرتقا بەرمەيدى. مۇنداي بوس جەرلەردى مەملەكەتكە قايتارۋ كەرەك» دەدى ارحيمەد بەگەجان ۇلى.
ءنازيرا جارىمبەت,
Egemen Qazaqstan
قوستاناي
