ءوڭىر باسشىسى اسقار مىرزاحمەتوۆكە ەسەپ بەرگەن وبلىس اكىمدىگىنىڭ ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلدانا جاۋىنبەكوۆا سالاداعى وڭ كورسەتكىشتەردى بايانداپ, قاجەتتى شارالاردىڭ دەر كەزىندە قابىلدانىپ, ىسكە اسىرىلۋىنىڭ ناتيجەسىندە ەكونوميكانىڭ نەگىزگى سالالارىندا وسىمگە قول جەتكىزىلگەنىن تىلگە تيەك ەتتى. ونىڭ ايتۋىنشا, وبلىستاعى قىسقا مەرزىمدى ەكونوميكالىق ينديكاتور 104, 6 پايىزدى, ونەركاسىپتەگى ناقتى كولەم يندەكسى 102,6 پايىزدى, اۋىل, ورمان جانە بالىق شارۋاشىلىعى مەن جالپى اۋىل شارۋاشىلىعى ونىمدەرى 106,1 پايىزعا جەتكەن.
جيىن بارىسىندا وبلىستىڭ بۇل وڭ كورسەتكىشتەرى ەلىمىزدىڭ وزگە وڭىرلەرى اراسىنداعى جوعارى ناتيجەلەردىڭ قاتارىندا ەكەنى ايتىلدى. مىسالى, بولشەك ساۋدا اينالىمىندا وبلىسىمىز 279,3 ميلليارد تەڭگەمەن رەسپۋبليكا وڭىرلەرىنىڭ اراسىندا 3-ورىنعا تۇراقتاسا, سول سياقتى, پايدالانۋعا بەرىلگەن تۇرعىن ءۇي كولەمى جاعىنان دا الدىڭعى قاتاردامىز. ناقتىلاي توقتالساق, وتكەن جىلدىڭ قورىتىندىسى بويىنشا وبلىستا بارلىعى 482,3 شارشى مەتر تۇرعىن ءۇي بەرىلگەن. سونداي-اق, يندۋستريالدىق يننوۆاتسيالىق دامۋدىڭ مەملەكەتتىك باعدارلاماسى اياسىندا 10 ميلليارد تەڭگەگە 6 جوبا ىسكە اسىرىلىپ, 481 جاڭا جۇمىس ورنى اشىلعان.
ەل ەكونوميكاسىنىڭ نەگىزگى لوكوموتيۆتەرىنىڭ ءبىرى – اۋىل شارۋاشىلىعى سالاسى دەسەك, وڭىردە اگروونەركاسىپ كەشەنىن دامىتۋ باعدارلاماسى اياسىندا ەگىستىك القابى ۇلعايىپ, قوي ەتىنىڭ ەكسپورتى ارتىپ, 55 كووپەراتيۆ اشىلعان. اسقار يسابەك ۇلى اۋىل الەۋەتىنىڭ ءوسۋى وبلىس ەكونوميكاسىنا تىكەلەي اسەر ەتەتىنىن ەسكەرىپ, ەلدىمەكەندەردى دامىتۋ كەرەكتىگىن باسا ايتتى. ول ءۇشىن اۋىلدىق وكرۋگ اكىمدىكتەرىنىڭ جۇمىسىن شيراتۋدى تاپسىرىپ, ءار اۋىلدىڭ ەكونوميكالىق-الەۋمەتتىك تولقۇجاتىن جاساۋ جۇمىستارىن تەزىرەك ورىنداۋدى جۇكتەدى.
