سونىمەن قاتار, تۇركىستان قالاسى اۋماعىنداعى 740 گەكتار جەر تەلىمى «جاسىل ايماقتىڭ» تەڭگەرىمىنە الىنىپ, مەملەكەتتىك اكتى الۋ جۇمىستارى جۇرگىزىلۋدە. بۇدان وزگە, اعىمداعى جىلى تۇركىستان قالاسى اۋماعىندا «جاسىل بەلدەۋ» القابىنىڭ جۇمىسى باستالادى. بۇل تۋرالى وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا تۇركىستان وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى ءىلياس قۇرامىسوۆ مالىمدەدى.
سونداي-اق, وتكەن جىلى مەملەكەتتىك ورمان قورىن 1 ملن. 593 مىڭ گەكتارعا ۇلعايتۋ جوسپارى 101 پايىزعا ارتىعىمەن ورىندالىپ, ورمانمەن كومكەرىلگەن القاپ كولەمى 1 ملن. 604 مىڭ گەكتارعا جەتكەن
«2018 جىلى وڭىردە 15 500 گەكتارعا كوشەت وتىرعىزىلدى. 104 گەكتار تاۋلى جانە توعايلى القاپقا, 600 گەكتار قۇمدى القاپقا سەكسەۋىل كوشەتتەرى ەگىلدى. 7 مىڭ گەكتارعا سەكسەۋىل تۇقىمى سەبىلدى. سونىمەن قاتار, 5 682 گەكتار جەردە تولىقتىرۋ جانە 18 256 گەكتاردا كۇتىپ-باپتاۋ جۇمىستارى جۇرگىزىلدى. وتكەن جىلى وتىرار ورمان شارۋاشىلىعىنىڭ 66 مىڭ گەكتار اۋماعىندا ورنالاسقان قاراتاۋ ورمانشىلىعىنا تابيعي-عىلىمي نەگىزدەمە جاسالىندى. اتالعان اۋماقتا ەرەكشە تابيعاتىمىزدى كەلەشەك ۇرپاققا جەتكىزۋ جانە سيرەك كەزدەسەتىن اڭ-قۇستارىمىزدى قورعاۋ, كۇزەتۋ ماقساتىندا تۇران مەملەكەتتىك وڭىرلىك تابيعي پاركىن اشۋ جوسپارلانۋدا», - دەدى ءىلياس شويبەك ۇلى.
سىرداريا وزەنىنىڭ بويىنداعى تۇقىمباقتا جارتىلاي ەركىندىككە جىبەرىلگەن بۇقار بۇعىلارىنىڭ سانى بىلتىر 9 باسقا ارتىپ, 155-كە جەتتى. ولاردىڭ 84-ءى ىشكى قورشاۋدا, 71-ءى ەركىندىكتە ءجۇر. 2018 جىلى بۇكىلالەمدىك تابيعات قورىمەن (WWF) وڭىرلىك پاركتەن 5 باس بۇعى ىلە-بالقاش مەملەكەتتىك تابيعي رەزەرۆاتىنا جەرسىندىرىلدى.
وبلىستا جىلدان جىلعا جەر قويناۋىن پايدالانۋ سالاسىنىڭ ينۆەستيتسيالىق تارتىمدىلىعى جوعارىلاپ كەلەدى. جەر قويناۋىن پايدالانۋشىلار ەسەبىنەن ءوڭىردىڭ الەۋمەتتىك سالاسىنا 2018 جىلى 1 ملرد. 226 ملن.تەڭگە قاراجات اۋدارىلعان. ونىڭ 92 ميلليونعا جۋىعى كەڭ تارالعان پايدالى قازبالاردان ءتۇسىپ وتىر. ال, ورماندى جانە ەرەكشە قورعالاتىن تابيعي اۋماقتاردى پايدالانۋدان 31 ملن. 52 مىڭ تەڭگە, جانۋارلار دۇنيەسىن پايدالانۋدان 132 ملن. 621 500 تەڭگە ءتۇسىم ءتۇسىرىلدى.
