ءباسپاسوز جيىنىندا ع.تۇرسىنباەۆ «ب» كورپۋسى لاۋازىمىنا ۇمىتكەر تۇلعالار ءۇشىن جەكە قاسيەتتەرىن باعالاۋعا ارنالعان تەستىلەۋدە جاۋاپتاردىڭ راستىق دەڭگەيى 50% كەم بولماۋى ءتيىس ەكەنىن مالىمدەدى. ەگەر كورسەتكىش ناتيجەسى تومەن بولسا ۇمىتكەر جەكە قاسيەتتەرىن باعالاۋدىڭ راستىق دەڭگەيىنەن وتپەدى دەپ تانىلادى جانە ءبىر ايدان كەم ەمەس مەرزىمنەن كەيىن قايتا وتۋگە مۇمكىندىك الادى ەكەن.
«1 اقپاننان باستاپ, دەپارتامەنت قىزمەتشىلەرى وڭىرلەردەگى تەستىلەۋ ورتالىعىندا تەستىلەۋ اكىمشىسى رەتىندەگى قىزمەتىن توقتاتتى. بۇل قىزمەتتى «مەملەكەتتىك قىزمەتتىڭ پەرسونالىن باسقارۋ ۇلتتىق ورتالىعى» اق-نىڭ تەستىلەۋ وپەراتورى اتقاراتىن بولادى جانە وسى ۋاقىتتان باستاپ «ب» كورپۋسىنىڭ بوس لاۋازىمىنا ۇمىتكەرلەر كونكۋرس جاريالاعان مەملەكەتتىك ورگانعا زاڭنامانى ءبىلۋ تۋرالى سەرتيفيكات پەن جەكە قاسيەتتەرىن باعالاۋ قورىتىندىسىن وتكىزبەيدى» دەدى ول.
سونداي-اق, كوممۋنيكاتسيالار قىزمەتىندە بەلگىلى بولعانداي, «ب» كورپۋسى لاۋازىمدارىنىڭ ۇلگىلىك بىلىكتىلىك تالاپتارىنا ەڭ تومەنگى لاۋازىمداردان بولەك, جوعارى لاۋازىمدار ءۇشىن دە ەڭبەك ءوتىلى قاجەت ەتىلمەيدى ەكەن. اتاپ ايتقاندا, مەملەكەتتىك ورگاندارداعى باس مامان لاۋازىمىنا جوعارى ءبىلىم بولسا جەتكىلىكتى, ال جەتەكشى مامان لاۋازىمىنا جوعارى نەمەسە ورتا بىلىمنەن كەيىنگى ءبىلىمى بار تۇلعالار ءۇشىن ورنالاسۋ قۇقىعى بەرىلگەن.
وسىناۋ وزگەرىستەردىڭ ناتيجەسىندە لاۋازىمدىق ساناتتار بويىنشا قويىلاتىن تالاپتار ءبىرشاما جەڭىلدەتىلگەنىن حابارلاعان جەتەكشى بۇل جۇمىستاردىڭ ناتيجەسىندە مەريتوكراتيا قاعيداتتارىن نىعايتۋ مۇمكىندىكتەرى ارتقانىن ايتتى.
