كەز كەلگەن ادامنىڭ جۇرەگىن ءدىر ەتكىزەر وقيعانىڭ ەل امان, جۇرت تىنىشتا ورىن العانى كوپشىلىكتى الاڭداتپاي قويمادى. سۇم اجال ايتپاي كەلەدى دەسەك تە, بەيكۇنا بالالاردىڭ ءولىمى كۇپتى ويلاردى دا تۋعىزدى. تەك ەلوردادا عانا ەمەس, مۇنداي كورىنىس ەلىمىزدىڭ كەز كەلگەن ايماعىندا ورىن الىپ جاتاتىنى راس. ونىڭ ءبارى ءار ادامدى «نەلىكتەن» دەگەن جاۋابى تابىلماس ويلارعا جەتەلەيدى. الايدا بەس بىردەي ءبۇلدىرشىننىڭ كەنەتتەن وتقا ورانۋى كەزدەيسوقتىق ەمەس سەكىلدى. ورتكە قارسى كۇرەس مەكەمەسى ءتيىستى قىزمەتىنىڭ ءوز جۇمىسىنا سالعىرت قاراۋى ما دەيمىز. قايعىلى وقيعاعا كىم جاۋاپتى دەگەندە, 100 مىڭ ادامعا شاققاندا ورتتەن قايتىس بولعاندار تۋرالى الەمدىك 2016 جىلعى ستاتيستيكاعا كوز جۇگىرتسەك, ءبىزدىڭ ەلىمىز 68-ورىندا عانا ەكەن. دەمەك, توتەنشە جاعدايلار جۇمىسىندا توقىراۋ بار. مۇنى استانا قالاسىنىڭ اكىمى باقىت سۇلتانوۆ تا جاسىرمادى. اكىم: «بۇل سىزدەردىڭ تىكەلەي جۇمىستارىڭىز, ارقاشان مەن ايتىپ وتىرۋىم كەرەك پە؟ باياعىدا تەكسەرىس جۇرگىزۋ كەرەك ەدى, مىندەتتى تۇردە قايعىلى وقيعانى كۇتەسىزدەر مە؟! بۇل - توتەنشە جاعدايلار دەپارتامەنتىنىڭ قاتەلىگى. سىزدەر جەكە سەكتوردا تۇراتىن ءار ادامدى تانۋىڭىز كەرەك» دەدى.
وسىعان وراي, باقىت سۇلتانوۆ شۇعىل جيىن وتكىزىپ, بەس بالا قايتىس بولعان ءورتتىڭ شىعۋ جايىن جان-جاقتى انىقتاۋدى تالاپ ەتتى. «وسى جاعدايعا دۋشار بولعان وتباسىنا قايعىرا كوڭىل ايتامىن. قالا باسشىلىعى وقيعا ورنىندا بولدى, قازا تاپقان بالالاردىڭ اتا-اناسىمەن پسيحولوگتار جانە الەۋمەتتىك قىزمەت ماماندارى جۇمىس ىستەۋدە. زارداپ شەككەن وتباسىنا قالالىق الەۋمەتتىك قورعاۋ باسقارماسى تاراپىنان ماتەريالدىق كومەك كورسەتىلدى. «سارىارقا» اۋدانى اكىمىنە جەرلەۋ ءراسىمىن ۇيىمداستىرۋدى جانە وتباسىنا ۋاقىتشا باسپانا بەرۋدى, جانعان ءۇيدى تەز ارادا قالپىنا كەلتىرۋ ءۇشىن قاراجات ءبولۋدى تاپسىرامىن» دەدى قالا اكىمى. ال توتەنشە جاعدايلار دەپارتامەنتى باستىعىنىڭ مىندەتىن اتقارۋشى مارعۇلان امانباەۆ وسىعان دەيىن كوكتال-1 تۇرعىن الابىندا ءورت جانە باسقا دا توتەنشە جاعدايلاردىڭ الدىن الۋ ءۇشىن پروفيلاكتيكالىق جۇمىستار جۇرگىزىلگەنىن ايتتى. «سول كەزدە توتەنشە جاعدايلار دەپارتامەنتىنىڭ قىزمەتكەرلەرى بۇل ۇيگە بارعان بولاتىن, ولقىلىقتاردى جويۋ ءۇشىن ەسكەرتپە بەرىلگەن» دەدى ول. الايدا كەشە تۇنگى ساعات 02:34-تە استانا قالالىق تجد «101» پۋلتىنە تۇسكەن حاباردا «شىڭعىستاۋ كوشەسى, 5 مەكەنجايدا ورنالاسقان شارۋاشىلىق قۇرىلىسى ورتەنىپ جاتقانى ايتىلعان كورىنەدى. ال استانا قالاسى اكىمدىگىنىڭ ءباسپاسوز قىزمەتى جەكە ءۇي اۋماعىنداعى شاعىن ءۇي ورتەنگەنىن جەتكىزدى.
ارينە, اپاتتىڭ, وقىس وقيعالاردىڭ الدىن الاتىن پروفيلاكتيكالىق جۇمىستار تالاپقا ساي جۇرگىزىلىپ تۇرسا, مۇنداي قايعىلى وقيعالار بولماس پا ەدى دەيمىز. قالا اكىمى باقىت سۇلتانوۆ اۋدان اكىمدەرى مەن توتەنشە جاعدايلار دەپارتامەنتى جانە پوليتسياعا بىرلەسە وتىرىپ, جەكە سەكتورداعى ءار ۇيگە بارىپ, ءورت قاۋىپسىزدىگىن ساقتاۋ جونىندە تەكسەرىس, ءتۇسىندىرۋ جۇمىستارىن جۇرگىزۋدى تالاپ ەتتى. سونداي-اق قۇزىرەتتى ورگانداردان بولعان جايدىڭ بارلىق ءمان-جايىن تولىق انىقتاۋ تاپسىرىلدى. بۇل قاتاڭ ەسكەرتپەنى قۇزىرەتتى ورگاندار باسشىلارى كەلەشەكتە جادىنان ەش شىعارماسا ەكەن دەيمىز.
الەكساندر تاسبولات,
«Egemen Qazaqstan»
