شىمكەنت قالاسىنداعى №8 گيمنازيانىڭ 6-سىنىپ وقۋشىسى نۇريمان ءادىلحان وسى تاقىرىپتى زەرتتەپ كورىپتى. ءسويتىپ ءبىلىم جانە عىلىم مينيستىرلىگى مەن «دارىن» رەسپۋبليكالىق عىلىمي پراكتيكالىق ورتالىعى ۇيىمداستىرعان XIV «زەردە» عىلىمي جوبالار بايقاۋىنا ۇسىنعان.
«بۇل تاقىرىپتى تاڭداعان سەبەبىم, 2 جىل بۇرىن «قالقانقۇلاق» اتتى تەلەحيكاياعا تۇسكەنمىن. ستۋديادا كوپ ۋاقىتىمدى انيماتورلاردىڭ جانىندا وتكىزدىم. قاعاز بەتىنە سالىنعان سۋرەتتەردىڭ كوگىلدىر ەكراندا كورسەتۋ جولدارىن كوردىم. ول پروتسەسس مەنى وتە قاتتى قىزىقتىردى. جوبامدى تامىز ايىنان باستاپ دايىندادىم. ءبىز تەحنيكا دامىعان زاماندا ءومىر ءسۇرىپ جاتىرمىز. بالالارعا ارنالعان انيماتسيالىق فيلمدەر جەتەرلىك. ولار وتاندىق جانە شەتەلدىك بولىپ ەكىگە بولىنەدى. جوبا بارىسىندا فيلمدەردىڭ پايداسى مەن زيانىن, وتاندىق جانە شەتەلدىك مۋلتفيلمدەردىڭ ايىرماشىلىعى مەن ەرەكشەلىكتەرىن زەرتتەپ, شىعۋ تاريحى جانە نەگىزىن قالاۋشىلاردى توپتاستىردىم. ەكرانعا دەيىنگى جۇمىستار جانە قازاق تىلىندەگى تۋىندىلاردىڭ دۇرىس سويلەۋگە, ءتىلدى ۇيرەنۋگە ارنالعان جولدارىن قاراستىردىم» دەيدى بايقاۋدا «مۋلتفيلمدەردىڭ پايداسى مەن زيانى» جوباسىمەن باس جۇلدەگە يە بولعان نۇريمان نۇرلان ۇلى.
قيال-عاجايىپقا نەگىزدەلگەن كوپ سەريالى "قالقانقۇلاق" تەلەحيكاياسىندا اقىلدى باقبەرگەننىڭ ءرولىن سومداعان نۇريمان ءادىلحان كەلەشەكتە قازاق كينوسى مەن مۋلتيپليكاتسيا ونەرىن دامىتۋعا ۇلەس قوسقىسى كەلەدى. شىمكەنت قالاسىنان قاتىسقان 22 وقۋشى اقمولا وبلىسىنىڭ شۋچە قالاسىندا وتكەن رەسپۋبليكالىق بايقاۋدان جۇلدەمەن ورالدى.
عالىمجان ەلشىباي,
«Egemen Qazaqstan»
شىمكەنت
