سەمەيدە ايەل ادامدار اراسىنداعى ءسۇت بەزى وبىرىنان كەيىن جاتىر موينى قاتەرلى ىسىگى ەكىنشى ورىندا تۇر. جىل سايىن 80-گە جۋىق قىز-كەلىنشەك قاۋىپتى دەرتكە شالدىعادى. وكىنىشتىسى, ناۋقاستاردىڭ كوپشىلىگى اۋرۋدىڭ باستاپقى بەلگىلەرى بىلىنگەندە ەمەس, دەرت اسقىنعان كەزدە دارىگەرگە كەلەتىن كورىنەدى. سوندىقتان دارىگەرلەر 30-70 جاس ارالىعىنداعى ايەل ادامدار جىل سايىن مەديتسينالىق تەكسەرىستەن وتكەنى دۇرىس دەپ سانايدى.
«جاتىر مويىنى وبىرىن ۋاقىتىندا انىقتاۋعا مۇمكىندىك بار. بۇگىندە ءاربىر ايەل ءوز تۇرعىلىقتى مەكەنجايى بويىنشا ەمحاناعا بارىپ, تەكسەرىلە الادى. بۇل كابينەتتەردى اشۋداعى ماقسات - وبىر دەرتتەرىنىڭ تۇرلەرىن ەرتە كەزەڭدە انىقتاۋ. مىسالى, جاتىر موينى - كوزبەن قاراپ, ناقتى تەكسەرۋگە بولاتىن ورگان. ءبىر اناليز تاپسىرسا جەتكىلىكتى. جانە ول قىمبات ەمەس»,-دەيدى سەمەي قالاسىنىڭ يادرولىق مەديتسينا جانە ونكولوگيا ورتالىعى ديرەكتورىنىڭ ورىنباسارى نۇرگۇل جۇمىقباەۆا.
نۇرگۇل جۇمىقباەۆانىڭ سوزىنشە, جاتىر موينى وبىرىنىڭ پايدا بولۋىنا ادام پاپپيلوماسى ۆيرۋسى باستى سەبەپ. تۇقىم قۋالاۋشىلىقپەن دە تارالىپ جاتادى. اسىرەسە, وتىز جاستان اسقان نازىك جانداردىڭ ءجيى گينەكولوگ مامانعا قارالىپ تۇرعانى دۇرىس. سەمەيدە 7500 ادام ءتۇرلى وبىر دەرتىمەن تىركەۋدە تۇر. ال جىلىنا 1500 ادام جاڭا وبىر دەرتىمەن تىركەۋگە الىنادى. سوندىقتان, ونكولوگيالىق ديسپانسەر ماماندارى جىل سايىن سكرينينگتىك باعدارلامادان وزگە اشىق ەسىك كۇندەرىن ءجيى وتكىزۋدى قولعا العان. بۇگىندە اشىق ەسىك كۇنىنە كەلەتىندەردىڭ سانى ارتقان. شامامەن 800-دەن استام ادام تەگىن تەكسەرۋدەن ءوتىپ, ناتيجەسىندە وبىر دەرتىنە شالدىققان 3 ناۋقاس انىقتالادى.
