«وسى باعدارلاما اياسىندا ەكى ءجۇز وقۋ ورنى, ناقتىراق ايتساق, 20 جوعارى وقۋ ورنى مەن 180 كوللەدج 1-2 ماماندىق بويىنشا جاڭا قۇرال-جابدىقتارمەن جابدىقتالادى» دەدى مينيستر.
بۇل وقۋ ورىندارى ءبىلىم بەرۋمەن قاتار 1-2 ماماندىق بويىنشا باسقا وقۋ ورىندارى ءۇشىن قۇزىرەت ورتالىعىنا اينالاتىنىن ەسكە سالعان ۆەدومستۆو باسشىسى, جاڭا قۇرالدار ساتىپ الىپ, شەتەلدىك ارىپتەستەرمەن كووپەراتسيانى جانە جاڭا وقۋ باعدارلامالارىن دامىتۋ قاجەت ەكەنىنە توقتالدى.
«ەڭبەك جانە حالىقتى الەۋمەتتىك قورعاۋ مينيسترلىگى «اتامەكەن» پالاتاسىمەن بىرگە 100-دەن اسا قاجەت ماماندى انىقتايدى, ولار ءبىلىم بەرۋ ۇيىمدارى ءۇشىن ساتىپ الاتىن جابدىقتى تاڭداۋعا نەگىز بولادى.
جابدىقتى ساتىپ الۋ مەحانيزمى دايىن. ليزينگ تەتىگى ارقىلى قارجىلاندىرۋ 7 جىلعا بەرىلەدى, «برك-ليزينگ» ءۇشىن سىياقى جىلىنا 11 %-دان اسپايتىن بولادى.
كوللەدجدەر ليزينگتى تولەۋ ءۇشىن 7 جىل ىشىندە اقشانى تولىق الادى دەپ جوسپارلانىپ وتىر. جوو-لارعا ليزينگ تولەمى بويىنشا رەسپۋبليكالىق بيۋدجەتتەن قارجى ءبولۋ ازىرشە قارالماعان. ويتكەنى, ءبىز ولارعا بىلتىرعى جىلى بارلىق تەحنيكالىق ماماندىقتار بويىنشا گرانت باعاسىن ءۇش ءجۇز قىرىق بەس مىڭنان 600 مىڭعا دەيىن كوتەردىك» دەدى ەرلان ساعاديەۆ.
باعدارلاما اياسىندا جاڭارۋعا ءتيىستى جابدىقتار مەن تەحنيكالار ءتىزىمىن «اتامەكەن» ۇلتتىق پالاتاسى جانە «برك-ليزينگ» اكتسيونەرلىك قوعامىنىڭ كەلىسىمى بويىنشا «كاسىپقور» حولدينگى بەكىتەتىن بولادى.
ءمينيستردىڭ ايتۋىنشا, قاتىسۋدىڭ مىندەتتى شارتى – كوللەدجدەر ءۇشىن 5%, جوعارى وقۋ ورىندارى ءۇشىن 10% قوسا قارجىلاندىرۋ بولادى دەپ جوسپارلانىپ وتىر.
سونداي-اق «كاسىپقور» حولدينگى شەتەلدىك جانە وتاندىق مامانداردى تارتۋ بويىنشا شارالار قابىلدايدى. كوللەدجدەر ءۇشىن ماماندار 2 وقۋ جىلىنا دەيىن تارتىلاتىن بولادى.
جالپى, 3 جىلدا باعدارلامانى ىسكە اسىرۋ ءۇشىن رەسپۋبليكالىق بيۋدجەتتەن 57,9 ملرد تەڭگە ءبولۋ تالاپ ەتىلەدى. بيىل – 8,0 ملرد تەڭگە – ليزينگ تولەمدەردى وتەۋگە 7,3 ملرد تەڭگە, شەتەلدىك جانە وتاندىق مامانداردى تارتۋعا 0,7 ملرد تەڭگە قاجەت.
ال 2020 جىلى 27,8 ملرد تەڭگە – ليزينگ تولەمدەردى وتەۋگە 16 ملرد تەڭگە, شەتەلدىك جانە وتاندىق مامانداردى تارتۋعا 1,88 ملرد تەڭگە, «ليزينگ» برك كاپيتالداندىرۋعا 10 ملرد تەڭگە; 2021 جىلى – 22,1 ملرد تەڭگە – ليزينگ تولەمدەردى وتەۋگە 16 ملرد تەڭگە, شەتەلدىك جانە وتاندىق مامانداردى تارتۋعا 1,17 ملرد تەڭگە, «ليزينگ» برك كاپيتالداندىرۋعا 5 ملرد تەڭگە جۇمسالادى.
«جاس مامان» باعدارلاماسىن ىسكە اسىرۋدىڭ ناتيجەسىندە 3 جىل ىشىندە 20 جوو مەن 180 كوللەدجدىڭ نەگىزگى ماماندىقتارىن جاڭعىرتۋ جۇزەگە اسىرىلاتىن بولادى, زاماناۋي جابدىقتاردىڭ 400-دەن استام جيىنتىعى ساتىپ الىندى, 210 مىڭنان استام بىلىكتى كادر دايارلانىپ, 15 مىڭنان استام وقىتۋشى بىلىكتىلىگىن ارتتىرادى» دەدى ءبىلىم جانە عىلىم ءمينيسترى.
