«ەت ەكسپورتىن ارتتىرۋ بويىنشا بەرىلگەن تاپسىرمانى ورىنداۋ ءۇشىن ەتتى مال شارۋاشىلىعىن دامىتۋ باعدارلاماسىن ىسكە اسىرۋ جالعاساتىن بولادى. وعان قارجى ءبولىندى جانە ناقتى ينديكاتيۆتەر ايقىندالدى, ول ءۇشىن: 1,2 ملن. باس ءىرى قارا مالدى تۇقىمدىق تۇرلەندىرۋ; بورداقىلاۋ الاڭدارىنا 353,6 مىڭ باس بۇقاشىق جەتكىزۋ; 100,0 مىڭ باس ءىرى قارا مال (اكەلۋ جوسپارلانىپ وتىرعان ەلدەر: اۋستراليا, اقش, كانادا, وڭتۇستىك امەريكا, ەۋروپا جانە رەسەي) جانە 415,75 مىڭ باس ۇساق مال ساتىپ الۋ قاجەت», دەيدى ءو. شوكەەۆ.
ءمينيستردىڭ ايتۋىنشا, 2019 جىلى 30 مىڭ توننا سيىر ەتىن ەكسپورتتاۋ جوسپارلانىپ وتىر. شالعايداعى مال شارۋاشىلىعىن دامىتۋ ماقساتىندا 2018 جىلى قۇدىقتاردى سالۋ جوسپارى 722 بىرلىكتى قۇراسا, ناقتى 1873 بىرلىك (259%) قۇدىق سالىندى. ونىڭ ىشىندە 1369 قۇدىقتى سالۋعا 6082 ملن. تەڭگە سۋبسيديا بەرىلدى.
ناتيجەسىندە 2244,4 مىڭ گەكتار جايىلىم, ونىڭ ىشىندە 186,5 مىڭ باس ءىرى قارا مال, 531,6 مىڭ باس ۇساق مال, 57,4 مىڭ باس جىلقى, 34,3 مىڭ باس تۇيە سۋ كوزىمەن قامتاماسىز ەتىلدى 2019 جىلى رەسپۋبليكا بويىنشا 1069 بىرلىك قۇدىق سالۋ جوسپارلانۋدا. قۇدىق سالۋعا كەتكەن شىعىننىڭ 80%-ىن مەملەكەت سۋبسيديالايدى. وعان بيىل 4,8 ملرد. تەڭگە كوزدەلگەن.
سونداي اق مەملەكەت باسشىسىنىڭ استانا قالاسىندا شۇجىق وندىرەتىن زاۋىت سالۋ جونىندەگى تاپسىرماسىنىڭ شەڭبەرىندە «ەرەيمەنتاۋ اقباس» كومپانياسى زاماناۋي ەت كومبيناتىن سالۋ جوباسىن ىسكە اسىرۋدا.
«جوبانىڭ قۇنى 5,4 ملرد. تەڭگەنى قۇرايدى. ەت كومبيناتى جىلىنا 20 مىڭ توننا ەت وڭدەيدى. كاسىپورىنعا ەۋروپادا وندىرىلگەن جابدىقتار ورناتىلادى. وندا مال سويۋ, شۇجىق ونىمدەرى مەن ەت كونسەرۆىلەرىن ءوندىرۋ جۇزەگە اسادى. 150 ادامعا جۇمىس ورنى اشىلاتىن بولادى», دەيدى مينيستر.
دايىن ءونىمدى رەسەي, قىتاي جانە تاياۋ شىعىسقا ەكسپورتتاۋ جوسپارلانىپ وتىر. وبەكتىنى سالۋ ءۇشىن استانا قالاسىنىڭ اكىمدىگى 3,2 گەكتار جەر ۋچاسكەسىن ءبولدى. قازىرگى ۋاقىتتا قۇرىلىس جۇمىستارى باستالدى. ەت كومبيناتى 2019 جىلدىڭ 4 توقسانىندا ىسكە قوسىلاتىن بولادى.
