بۇل كورمەدە وزبەكستاننىڭ زاماناۋي بەينەلەۋ ونەرى وزىندىك كوركەمدىلىگىمەن ەرەكشەلەنىپ, قىلقالام شەبەرلەرىنىڭ تۋىندىلارى قازاق الاڭىندا جاڭا قىرىنان ۇسىنىلدى. كورمەگە فايزۋللا احماداليەۆ, حۋرشيد زياحانوۆ, نودير شوابدۋراحيموۆ, اليشەر اليكۋلوۆ, ۆالەريا ەنينا, ۆيكتوريا تروشينا, ديلوروم مامەدوۆا, باحتيور وبيدوۆ, ابدۋحاكيم كاريموۆ, ديلمۋرود يۋلداشەۆ, ۋمار راجابوۆ سياقتى تانىمال سۋرەتشىلەر مەن جاس اۆتورلاردىڭ سوڭعى بەس جىل ىشىندە تۇسىرگەن 38 سۋرەتى قويىلعان.
فوتوونەر – كوپجانرلى, ءومىردى ءار قىرىنان تانىتاتىن, وزىندىك سيپاتى مەن شىعارماشىلىق قولتاڭباسى قالىپتاسقان سالا. «زاماناۋي وزبەكستان» فوتوكورمەسى ا.جۇماەۆ, ۆ.گونچارەنكو, ح.شوراحمەدوۆ, ۆ.شلوسبەرگ, ۆ.ۆياتكين, ۆ.سوكولوۆ سىندى شەبەرلەردىڭ 100 فوتوسۋرەتىنەن تۇرادى. كورمەدەن وزبەك بەينەلەۋ ونەرىنىڭ سوڭعى ون جىلداعى زاماناۋي سيپاتىمەن قاتار, ۇلتتىق تاريحتىڭ وتارلاۋ كەزەڭىنەن كەيىنگى ۇلتتىق بەينەلەۋ ونەرى مەكتەبىنىڭ قالىپتاسۋىنا دەيىنگى ءارتۇرلى ديسكۋرستارىن, كەلەشەك ۇرپاق ءۇشىن وزەكتى سانالاتىن ماڭىزدى كوزقاراستار مەن مىندەتتەردىڭ كورىنىسىن ويمەن باعامداپ, ءسۇيسىنىپ تاماشالاۋعا مۇمكىندىك بار.
وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسىنىڭ كەڭەسشىسى تيمۋر راحيموۆ: قازاقستاندا وزبەكستان جىلىن وتكىزۋ كەزىندە 200-دەن استام ءتۇرلى شارا ۇيىمداستىرىلىپ, كەڭىنەن ناسيحاتتالعان وزبەك ەلىنىڭ تاريحى, مادەنيەتى قازاقستاندىقتار تاراپىنان ۇلكەن قولداۋ تاپتى.وسىنداي مادەني شارالار ارقىلى ەكى ەل اراسىنداعى بايلانىس قارقىندى تۇردە داميتىنىنا سەنەمىن. بۇگىنگى كورمە دە كوپشىلىكتىڭ كوڭىلىنەن شىعادى دەپ ۇمىتتەنەمىز», دەپ رازىلىعىن جەتكىزدى.
باعاشار تۇرسىنباي ۇلى,
«Egemen Qazaqstan»
