تالعات تەمەنوۆتىڭ كەيىپكەرى گۇلناز كوپتەگەن كورەرمەننىڭ جادىندا. «ماحاببات ستانساسى» ءفيلمىنىڭ ىشكى تابيعاتىن ۇستاپ تۇرعان ادەمى سەزىم شىنايى سۋرەتتەلگەن. جۇرەككە جەتەتىن تۋىندى. ال ەكرانعا اراعا جىلدار سالىپ جارىققا شىققان ەرنار نۇرعاليەۆتىڭ «تاعدىر ستانساسى» ءفيلمىنىڭ ايتارى باسقا.
گۇلناز – كىلتتى كەيىپكەر. ەكى فيلمگە دە ورتاق – ۇندەستىك. شىعارماشىلىق بايلانىس. ىشكى دۇنيەسىندەگى سىرىن كەيىپكەر گۇلنازدىڭ تىلىمەن جەتكىزۋ. ونىڭ ءۇنى – مەنىڭشە, بايان ماقساتقىزىنىڭ ومىرىندە ماڭىزدى ءرول اتقارعان. شىعارماشىلىق العاشقى قادامى. اكتەرلىك ەڭبەگى.
شىعارماشىلىق ۇدەرىس – كۇردەلى. وندا ەشنارسەگە كەپىلدىك جوق. ونەردىڭ ادامدارى – تاۋەكەلشىل كەلەدى. ولار رۋحتىڭ كۇشىنە سەنەدى. الاپات سەزىمدەردى باسىنان وتكەرەدى. وسى كۇي باياندى ءوزىنىڭ ونەر جولىنداعى ۇستازى, وزىندىك ورنى بار تالعات تەمەنوۆتىڭ اۆتورلىق تۋىندىسىنداعى ءوزى سومداعان كەيىپكەر گۇلنازدىڭ بەينەسىنە قايتا ورالۋعا, ونىڭ تىلىندە قوعاممەن قايتا سىرلاسۋعا ىقپال ەتكەن.
«تاعدىر ستانساسىنداعى» گۇلنازدىڭ ءۇنى كەرىسىنشە, كۇردەلى. بۇل ءفيلمنىڭ تابيعاتى مەن ايتارىن ءتۇسىنۋ ءۇشىن سەزىمتال دا, ورەلى تۇيسىك كەرەك. بۇل دا ايەل تابيعاتىنىڭ ءتىلىن تۇسىنگەندەي كۇردەلى. اشىپ ايتپاسا دا, سەزىمىمدى ءتۇيسىنىپ ال دەيتىن جۇمباق الەم. فيلم ايىپتاۋدى قاجەت ەتپەيدى. كەرىسىنشە, ماحابباتسىز دا ءبىرىن-ءبىرى الداپ كۇنەلتۋدىڭ جولىن ۇيرەنگەن قوعامنىڭ سەزىمدەرىنىڭ بەتپەردەسىن استىرتىن تۇردە شەشەدى.
بۇگىنگى قوعامعا شىنايى ماحاببات تاقىرىبىنا ارنالعان فيلمدەر جەتىسپەيدى. بۇل جۇرەكپەن تۇسىنىسۋدەن گورى, جەككورىنىشتىڭ انايى تىلىندە كوپ ارتىق سوزگە قۇمار قوعامنىڭ دياگنوزى. ءتۇسىنىسۋ – جۇرەككە, ايىپتاۋ – كوپ جاعدايدا, ازعىندىققا جول اشادى.
ماحاببات – ماسشتابتى. ول تەك ەكى جاستىڭ اراسىنداعى سەزىممەن ولشەنبەيدى. بەلگىلى ءبىر يدەياعا دەگەن ماحاببات تا بولۋى ابدەن مۇمكىن. بۇل دۇنيەدە ماحابباتپەن جاسالعان دۇنيە – قۇندى. «تاعدىر ستانساسى» گۇلنازدىڭ بەينەسىنە ەرەكشە سۇيىسپەنشىلىكپەن جاسالعان تۋىندى.
جاستىق شاق, بالالىق ماحاببات, تازالىق, ۇلكەن ءومىر, تاڭداۋ, تاعدىر, وكىنىش, مويىنداۋ. وسىنىڭ ءبارى فيلمدە ەرەكشە سەزىممەن بەرىلەدى. ماحابباتپەن وتباسى قۇرۋدىڭ ماڭىزى تۇسىندىرىلەدى. ۇلكەن قاتەلىكتەردىڭ تۇپكى نەگىزىندە تاڭداۋدىڭ شەشۋشى رولگە يە ەكەندىگىنىڭ مىسالىن كورسەتەدى. تاڭداۋ – ادامنىڭ تاعدىرىنا اسەر ەتەدى. فيلمدە ادامنىڭ تاڭداۋىنىڭ بەيسانالىق دەڭگەيدەگى ءرولىنىڭ ماڭىزى كورسەتىلەدى. قالادىم, تاڭدادىم دەگەنىڭ كەيدە – جۇرەگىڭنىڭ امىرىمەن ءبىر بولماۋى مۇمكىن.
فيلم ماعىناسىنىڭ استارىندا جاسىرىنىپ جاتقان باستى قۇپيا – گۇلنازدىڭ تاڭداۋى. ونىڭ تاعدىرىنا ىقپالى. شەشىمى. ماجبۇرلىلىگىنىڭ سەبەبى. تاعدىرىنا تاققان ايىبى. امالىنىڭ جوقتىعى. شاراسىزدىعى.
ومىردەگى شەشىمدەرىنىڭ سالدارى – بالالارىنىڭ ومىردە بىرگە جولىعۋىمەن تۇسىندىرىلەدى. وتكەنگە وكىنىش – ۇمىتكە قايتا جالعاسادى. بالالارىنىڭ ءبىر-بىرىنە دەگەن ماحابباتىن ساقتاۋعا ىقپال جاساۋ – بۇل فيلمدە اتا-انالارىنىڭ باستى ورتاق شەشىمى بولىپ تابىلادى.
ءفيلمنىڭ جارىققا شىعۋىنا تالعات تەمەنوۆتىڭ كەيىپكەرى گۇلنازدىڭ ىقپالى زور. ايەل زاتىنىڭ بولمىسىن اشا العان اۆتوردىڭ شەبەرلىگى. ونىڭ تابيعاتىنا ءتان نازىكتىگىن بەينەلەي العان سۋرەتكەرلىگى.
بۇگىنگى كينودا وسىنداي ەرەكشە تۋىندىلاردىڭ يدەياسىن قايتا جاڭعىرتۋ ءۇردىسى قالىپتاسقان. بۇل – قالىپتى ۇدەرىس. تۇپنۇسقالىق كەيىپكەرمەن قايتا قاۋىشۋعا دەگەن قۇشتارلىق. تاقىرىپقا دەگەن ساعىنىش. مۇمكىن يدەيالىق داعدارىس؟! قانداي جاعداي دا بۇل ءتاسىل ونەردەگى تۇلعالارعا ويىن جەتكىزۋگە جاسالعان شىعارماشىلىق مۇمكىندىك. يدەيانىڭ قۇندىلىعى. تاقىرىپتىڭ وزەكتىلىگى.
«ماحاببات ستانساسى» – العاشقى ماحاباتتى ساقتاۋعا دارمەنسىز بولعان شاراسىزدىقتى بەينەلەسە, «تاعدىر ستانساسى» – ءوز تاعدىرلارىنىڭ قۇربانىنا اينالعان اتا-انانىڭ بالالارىنىڭ ءبىر-بىرىنە دەگەن سەزىمىن ساقتاۋعا جاسالعان كەمەل شەشىمىن اشىپ كورسەتۋىمەن قۇندى.
ءبىر-بىرىنە قادام جاساۋ. كەشىرۋ. ماحابباتقا قۇرمەتپەن قاراۋ. ءتۇسىنۋ. وسىنىڭ ءبارى «تاعدىر ستانساسى» فيلمىندە اشىلعان.
گۇلزات كوبەك,
كينوتانۋشى, ونەرتانۋ PhD دوكتورى
