تاياۋدا اقمولا وبلىستىق ىشكى ساياسات باسقارماسىنىڭ قولداۋىمەن «رۋحاني جاڭعىرۋ» باعدارلاماسىنىڭ وڭىرلىك جوبالىق كەڭسەسىنىڭ ۇيىمداستىرۋىمەن زەرەندى اۋدانىنىڭ ساكەن سەيفۋللين اۋىلىندا «تاي – اتقا, ات – مۇراتقا جەتكىزەر» اتتى جاباعى ۇيرەتۋدەن ەستافەتالىق بايقاۋ وتكىزىلدى. ەرەجەگە سايكەس 5-8 سىنىپ ارالىعىنداعى وننان استام وقۋشى ءوزارا باق سىناستى.
تۇڭعىش وتكىزىلگەندىكتەن بە ەكەن, بۇل ءبىر ەلدىڭ دەلەبەسىن قوزدىرعان قىزىق جارىس بولدى. تاماشالاۋعا تاياعىنا سۇيەنىپ قاريالار دا كەلىپتى. جىلقى جالىندا وسكەن جۇرتتىڭ ىلكىدەگى عاجايىپ قاسيەتىنىڭ جۇقاناسى ءالى بار ەكەن. اۋىل بالاسى ءاماندا پىسىق. ۇركە شاپشىپ, جۇگەن-نوقتانى باسىنا تيگىزگىسى كەلمەي شورتانداي شاپشىعان كۇيلى جاباعىلاردى ءاپ-ساتتە قۇلاعىنان باسىپ ۇستاپ, قۋتىڭداپ ءجۇر.
تاماشالاۋعا كەلگەن حالىقتىڭ اتويلاعان ۇنىنەن قۇلاق تۇنادى. اسپانعا قارعىپ, جەرگە تۇسكەن, باسىن ەكى اياقتىڭ ورتاسىنا تىعىپ الىپ تۋلاعان اساۋ جاباعىدان قۇلاماي قالعاندارى دا, تۋلاسىنا شىداي الماي توپ ەتىپ جىعىلعاندارى دا بولدى. باس-اياعى بىرنەشە ساعاتقا سوزىلعان بايقاۋ قورىتىندىسىن بىلۋگە اسىققان حالىق اۋىلدىڭ مادەنيەت ۇيىنە جينالدى. جاباعىعا باس ءبىلدىرىپ, جالىنا جابىسىپ, جۇلدەگەر اتانعاندارعان ارنايى ديپلوم مەن سىيلىقتار تابىس ەتىلدى.
جوعارىدا ءبىر سوزىمىزدە بۇل جارىستى ەستافەتالىق بايقاۋ دەپ اتاعان بولاتىنبىز. كەلەسى كەزەك ءبىرجان سال اۋدانىندا.
بايقال ءبايادىل,
«Egemen Qazaqstan»
زەرەندى اۋدانى,
اقمولا وبلىسى
