قولدا بار دەرەكتەر بۇگىنگى تاڭدا وبلىستاعى تۇرعىندار سانىنىڭ 33 پايىزى سپورتپەن اينالىساتىنىن ايعاقتايدى. مۇنى تومەن كورسەتكىش دەۋگە بولمايدى. ايتسە دە بۇل تابىس پەن مۇمكىندىك شەگى ەمەس ەكەنى تاعى دا ايان. وبلىس سپورتشىلارىنىڭ سوڭعى جىلدارى حالىقارالىق باسەكەلەر مەن سايىستاردا جوعارى ناتيجەلەرگە قول جەتكىزە الماي جۇرگەنىنىڭ باستى سىرى مەن سەبەبى نەدە؟ مۇمكىن وبلىستا جەرگىلىكتى اتقارۋشى ورگاندار تاراپىنان سپورتتىڭ ماتەريالدىق-تەحنيكالىق بازاسىن جەتىلدىرۋ مەن نىعايتۋعا بولىنەتىن قاراجات جەتكىلىكسىز شىعار. جوق, بۇلاي ەمەس سەكىلدى. ويتكەنى تەك سوڭعى ەكى جىلدىڭ ىشىندە ايماقتا 60-تان استام سپورت نىسانى سالىنعان. ونىڭ ىشىندە «جەكپە-جەك سارايى», «دوستىق» باسسەينى جانە بەس بىردەي فۋتبول الاڭى بار «سپورت» كەشەنى حالىقارالىق تالاپتار مەن نورمالارعا تولىقتاي جاۋاپ بەرە الادى. اتالعان جاڭا نىسانداردىڭ دەنى مەملەكەت-جەكەمەنشىك ارىپتەستىگى شەڭبەرىندە ىسكە قوسىلعان.
مۇنىڭ سىرتىندا بيۋدجەتتەن تىس كوزدەر ەسەبىنەن دە قوسىمشا سپورت عيماراتتارى بوي كوتەرىپ كەلەدى. سونداي-اق جاتتىقتىرۋشىلار مەن كاسىبي بىلىكتىلىگى جانە شەبەرلىگى جوعارى ماماندارعا قاجەتتى جاعدايلار تۋعىزۋ ىسىنەن دە كىنارات تابا المايسىز. سوندا قالاي بولعانى؟ وڭىردە سپورتتى دامىتۋعا جۇمسالعان شىعىنداردىڭ قايتارىمى نەگە تومەن؟ وسى ورايدا وبلىستا بۇگىنگى كۇنى كاسىبي جانە بۇقارالىق سپورت تۇرلەرىن دامىتۋ ىسىندە جان-جاقتى ءارى جۇيەلى جۇمىستار جۇرگىزىلمەي كەلگەنىن اشىق ايتۋعا تۋرا كەلەدى.
ايتالىق جوعارىدا اتالعان جاڭا سپورت نىساندارىندا بالالار مەن جەتكىنشەكتەردىڭ وزدەرى قالاعان سەكتسيالارعا قاتىسۋىنا تولىق جاعدايلار تۋعىزىلعان. ءتىپتى جەرگىلىكتى بيلىك تاراپىنان قاجەتتى قاراجات تا بولىنگەن. ولاردىڭ قانشاسى سەكتسيالارعا قاتىسىپ ءجۇر, قانشاسى قاتىسپاي ءجۇر؟ سپورت سالاسىنا جەتەكشىلىك جاسايتىن جاستار مەن سپورت مەكتەبىنىڭ باسشىلارى بۇل ماسەلەگە باستارىن اۋىرتا بەرمەيتىنى بايقالادى. ءتىپتى كەرەك دەسەڭىز سپورت مەكتەپتەرىندەگى جۇمىس كەستەسى دە تولىق ناقتىلانباي جۇرگەنىن قانداي قيسىنعا سىيعىزۋعا بولادى.
ايماقتا تەك سوڭعى ەكى جىلدىڭ ىشىندە دەنەشىنىقتىرۋ جانە سپورت باسقارماسىنىڭ باسشىلارى ءۇش رەت اۋىسىپتى. باسقارماعا وتكەن جىلى تاعايىندالعان باسشى مەيرامبەك ماحامبەتوۆ ءوڭىر سپورتىنىڭ ءوسىپ-وركەندەۋى ءۇشىن وزگەرىس اكەلە الا ما؟ بۇل ساۋالعا قازىرگى كۇنى كەسىپ-ءپىشىپ جاۋاپ قايتارۋ ەرتەرەك سەكىلدى. الايدا ونىڭ ءوڭىر سپورتىنىڭ كوكجيەگىن كەڭەيتۋ ىسىندەگى العاشقى قادامدارى مەن وي-تۇجىرىمدارى بەلگىلى ءبىر دەڭگەيدە سەنىم تۋعىزا الادى دەمەكپىز.
جاس ماماندارعا تاجىريبەلىك تۇرعىدان كومەك قاي كەزدە دە قاجەت. بۇل ءۇشىن وبلىستا ابىروي-بەدەلى مەن بىلىكتىلىگى جوعارى سپورت ارداگەرلەرىنەن تۇراتىن ارنايى كەڭەستىڭ قۇرىلعانى دا قولداۋعا ابدەن تۇرارلىق ءىس. بۇگىنگى كۇنگە دەيىن ونىڭ بىرنەشە وتىرىسى وتكىزىلگەن. قازىر وڭىردە بالالار مەن جاسوسپىرىمدەر جانە جاستار مەن ستۋدەنتتەر اراسىنداعى سپورتتىڭ دامۋى كەنجەلەپ قالعان. ارداگەرلەر كەڭەسىنىڭ مۇشەلەرىن تولعاندىرىپ وتىرعان باستى ماسەلەلەردىڭ ءبىرى دە وسى. ايتالىق قازىرگى كەزدە سپورت مەكتەپتەرىنىڭ قۇرال-جابدىقتارمەن قامتىلۋى وتە تومەن دەڭگەيدە. ناقتى دەرەكتەرگە سۇيەنسەك وبلىستا بۇل كورسەتكىش 8,5 پايىز دەڭگەيىنەن استپايدى. ال قاجەتتىلىك 91,5 پايىزدى قۇراپ وتىر.
سونداي-اق وڭىردەگى وليمپيادالىق رەزەرۆتى دايارلاۋ ورتالىعىنىڭ قىزمەتىندە دە شەشىمىن تاپپاي جۇرگەن ماسەلەلەر جەتكىلىكتى. مۇندا جەرگىلىكتى ورگاندارمەن كەلىسىم جاساۋ ارقىلى شەتەلدىك جاتتىقتىرۋشىلارمەن شارت جاساسۋ مۇمكىندىگى قاراستىرىلعان. الايدا بۇگىنگى كۇنگە دەيىن ورتالىق تاراپىنان اتالعان باعىتتاعى جۇمىستار جۇيەلى تۇردە جۇرگىزىلمەي كەلەدى. ورتالىق قىزمەتى تۋرالى اڭگىمە قوزعاعان كەزدە جەرگىلىكتى بىلىكتى مامانداردى جۇمىسقا تارتۋ جونىندەگى ىستەردى دە ۇمىت قالدىرۋعا بولمايدى. وسى ماقساتتا وبلىستا ولاردى ىنتالاندىرۋ ءۇشىن 250-300 مىڭ تەڭگە ەڭبەكاقى تولەۋ جونىندە كەلىسىمشارتتار جاساۋ كوزدەلگەن. سونىمەن بىرگە قازىرگى كەزدە وبلىستاعى سپورت سالاسىنا ناقتى جوسپارلاۋ جۇيەسىن جولعا قويۋ ماسەلەلەرى قاراستىرىلعان. بۇگىندە وڭىردە سپورتتىڭ وليمپيادالىق تۇرلەرى –جەڭىل اتلەتيكا مەن سپورتتىق گيمناستيكانى جانە سەمسەرلەسۋدى دامىتۋعا كوڭىل بولە باستاعانى بۇعان دەيىن ورىن الىپ كەلگەن ىركىلىستەردىڭ ىزدەنىستەرگە جول بەرە باستاعانىن كورسەتەدى. سونداي-اق وڭىردە وليمپيا ويىندارىنىڭ تىزىمىنە كىرگەن سۋ سپورتى تۇرلەرىن دامىتۋ, بۇل باعىتتا ارنايى سەكتسيالار اشۋ ءۇشىن دە تىڭ شارالار كەشەنى بەلگىلەنگەن.
وبلىستاعى سپورت سالاسىندا بۇعان دەيىن ورىن الىپ كەلگەن ىركىلىستەردىڭ تاعى ءبىر سەبەبى اۋىل سپورتشىلارىن مورالدىق جانە ماتەريالدىق تۇرعىدان قولداۋ مەن ولاردىڭ جارىسقا قاتىسۋىن قارجىلاندىرۋ ءىسىنىڭ جەتكىلىكسىزدىگى بولسا, قازىرگى كۇنى بۇل ءىس تە ءوز شەشىمىن تاۋىپ كەلەدى. ءسوز جوق, مۇنىڭ ءوزى اۋىل سپورتىن دامىتۋدىڭ باستى تەتىگىنىڭ ءبىرى ەكەنى ايدان انىق. تۇتاستاي العاندا قازىرگى كەزدە كاسىبي جانە بۇقارالىق سپورتتى دامىتۋ ىسىندە وڭىردە ىركىلىستەردەن گورى, ىزدەنىستەر باسىم تۇسە باستاعانى ۇلكەن سەنىم تۋعىزادى.
تەمىر قۇسايىن,
«Egemen Qazaqstan»
اقتوبە
