2018 جىلى جەلتوقساندا نورا دجەرۋتو, كارولين كيپكيرۋي, دەيزي دجەپكيمەي, شەدراك كوەچ جانە ولاردىڭ باپكەرى كەننەت كەپيەگو روتيچ قازاقستان ازاماتتىعىن الدى.
ۇيىم وكىلدەرىنىڭ ايتۋىنشا, 2019 جىلدان باستاپ اتلەتتەر شىعىس قازاقستان وبلىسى قۇراماسىنىڭ اتىنان ونەر كورسەتەتىن بولادى.
«قازىرگى ۋاقىتتا فەدەراتسيا «سپورتتىق ازاماتتىقتى» راسىمدەۋ شارالارىن باستاپ كەتتى. ولاردى حالىقارالىق جەڭىل اتلەتيكا فەدەراتسياسى (IAAF) ءوز ەرەجەلەرىنە ساي تىركەيتىن بولادى. IAAF رەيتينگىنە سايكەس قازىرگى ۋاقىتتا نورا دجەرۋتو 3000 مەترگە كەدەرگىلەرمەن جۇگىرۋ بويىنشا ەكىنشى ورىندا تۇر, ال كارولين كيپكيرۋي - بەس مىڭ مەترگە جۇگىرۋدەن سەگىزىنشى ورىندا, ون شاعىرىمعا جۇگىنرۋدەن ءبىرىنشى ورىن, ءۇش مىڭ مەترگە جۇگىرۋدەن ەكىنشى ورىندا. ءوز كەزەگىندە دەيزي دجەپكيمەي ءۇش مىڭ مەترگە جۇگىرۋدەن ونىنشى ورىندا», - دەلىنگەن فەدەراتسيانىڭ رەسمي جاۋابىندا.
جەڭىل اتلەتيكادا سوڭعى وتكەن قازاقستان بىرىنشىلىگىندە شقو اتىنان بەس كەنيالىق سپورتشى ونەر كورسەتتى. ەلىمىزدىڭ باس باپكەرى گريگوري ەگوروۆ اتلەتتەردىڭ قازاقستاندىق ازاماتتىعىن العانىن راستادى. الايدا ءمان-جايىمەن بولىسۋدەن باس تارتتى. ايتا كەتەيىك, روتيچ «التاي اتلەتيكس» كلۋبىندا باپكەر-مەنەدجەر قىزمەتىن اتقارادى.
