وبلىستىق پوليتسيا دەپارتامەنتىنىڭ قىزمەتكەرلەرى جەرگىلىكتى تۇرعىندارعا عالامتور الاياقتارىنان ساق بولۋدى ەسكەرتتى. مامانداردىڭ ايتۋىنشا, الاياقتار ادامدارمەن ينتەرنەت ارقىلى جازىسىپ, ولاردىڭ سەنىمىنە كىرەدى دە, شوتىندا قارجى بار-جوعىنا كوز جەتكىزەدى. سونىمەن قاتار, الاياقتار قۇرباندارىن كوپشىلىك ءجيى پايدالاناتىن Kolesa.kz, Krisha.kz, OLX.kz سەكىلدى ينتەرنەت الاڭدارىنان ۇستايدى. وسى سايتتاردا كيىم, قوسالقى اۆتوبولشەكتەر, جىلجىمايتىن م ۇلىكتەر , تاعى باسقا قاجەتتەر ساتىلادى. الاياقتار ادامدارعا الدىن الا اقشانى ەلەكتروندىق ءاميان, بانك شوتتارىنا ەكسپرەسس-تولەم تەرمينالدارىنان اۋدارۋعا كوندىرەدى. ولار اقشاسى تۇسكەن سوڭ جوق بولىپ كەتەدى.
الاياقتاردىڭ تاعى ءبىر ءتاسىلى قۇرباندارىن تەلەفونمەن سويلەسۋ, حابارلاسۋ ارقىلى تابادى. ولار الاتىن تاۋارلارى ءۇشىن اقشاسىن قۇربانىنىڭ بانك شوتىنا اۋدارۋعا كوندىرىپ, ونىڭ بارلىق بانك مالىمەتتەرىن, جەكە باس قۇجاتتارىن, ءپارولىن الىپ الادى. الاياقتار الگى ادامنىڭ اتىنا جوعارى پروتسەنتپەن نەسيەلەر راسىمدەيدى, نەمەسە شوتىنداعى اقشاسىن قاقشىپ الىپ وتىرادى. پوليتسيا دەپارتامەنتىنىڭ ەسكەرتۋىندە سوڭعى كەزدەرى سايتتاردا بانكتەردە ناشار نەسيە تاريحى بارلارعا, ياعني بانكتەردە بۇرىن نەسيە قارىزى بولعاندارعا ءىرى كولەمدە نەسيە الۋعا كومەك بەرەتىنى جونىندە جارنامالار قاپتاپ كەتكەنى, ولاردان ساق بولۋ جونىندە ايتىلادى. عالامتوردا, الەۋمەتتىك جەلىلەرگە ورنالاستىرىلعان ەشقانداي كۇدىك تۋعىزبايتىن جالعان اككاۋنتتار كوبەيىپ كەتكەن. قوستاناي وبلىستىق پوليتسيا دەپارتامەنتى عالامتور الاياقتارىنان ساق بولۋ ءۇشىن عالامتورداعى حابارلاندىرۋلارعا اڭعال سەنە سالماۋعا, باسقا پايدالانۋشىلاردىڭ جازعان پىكىرىنە نازار اۋدارۋعا, تاۋار ساتۋشىنى كەزدەسۋگە كوندىرۋگە, الەۋمەتتىك جەلىلەردە ساتىپ الۋ-ساتۋ كەلىسىمىن راسىمدەمەۋگە, ولارعا تەرمينال ارقىلى اقشا اۋدارماۋعا, بانك كارتوچكاسى مەن سمس كود-تاردى ەشكىمگە ايتپاۋعا, تانىمايتىن ادامداردىڭ ءوتىنىشى بويىنشا بانكوماتتاردا قوسىمشا قىزمەتتەردى قوسپاۋعا, ەگەر الاياقتارعا الدانىپ قالعانىن بىلگەن جاعدايدا تەز قۇقىق قورعاۋ ورگاندارىنا حابارلاۋعا كەڭەس بەرەدى.
ءنازيرا جارىمبەت,
Egemen Qazaqstan
قوستاناي
