فورۋم الدىندا «Zhas Project» جوباسىنا قاتىسقانداردىڭ كورمەسى ۇيىمداستىرىلدى. وندا وسى جوباعا قاتىسۋشىلاردىڭ جۇمىستارى كورىندى. ءتۇرلى سالادا جاستار قولىنان ءىس كەلەتىنىن كورسەتە ءبىلىپتى. جوباعا قاتىسىپ العان ءبىر ميلليون تەڭگەگە ءىس باستالعان.
«وسى ىستەرىڭدى توقتاتپاۋعا, ءارى قاراي دامىتۋعا شاقىرامىن. بيزنەستى دامىتۋعا ەكونوميكانىڭ ءتۇرلى سالاسىندا مەملەكەتتىك باعدارلامالار بار. ەلباسى ايتقانداي, ۋاقىت ءبىر ورنىندا تۇرعان جوق, سونشالىقتى جىلدامدىقپەن قوعام دامىپ, ءومىر وزگەرىپ بارادى. تەك كاسىپكەرلەر عانا ەمەس, العا ۇمتىلعان بارلىق ادامدار ۋاقىت ىرعاعىنا ىلەسە ءبىلۋى ءتيىس. جاستار جىلى اركىم ءوز الەۋەتىن كورسەتۋ, يگىلىكتى ىستەرىن جۇزەگە اسىرۋ ءۇشىن ولارعا بارلىق قامقورلىق, قولداۋ جاسالادى. سونى ۋاقىتىلى, ۇتىمدى پايدالانا بىلۋلەرىڭىز كەرەك. ءبىلىم الۋعا, باسپانالى بولۋعا, وتباسىن قۇرۋعا, جۇمىس تابۋعا ۇمتىلعان جاسقا مۇمكىندىكتىڭ بارلىعى قاراستىرىلعان» دەدى جاستاردىڭ ايماقتىق فورۋمىنا قاتىسقان وبلىس اكىمىنىڭ ورىنباسارى مارات جۇندىباەۆ.
ليساكوۆ قالاسىندا تۇراتىن ايعانىس ونەربەكوۆا «Zhas Project» جوباسىنىڭ گرانتى ارقىلى «ونەر» ستۋدياسىن قۇرىپ, ءبىر ۇيدەگى اعاسىن, ءوزىن, ءىنىسىن, ءسىڭىلىسىن جۇمىسپەن قامتىدى. ولار قالالىقتاردى وتباسىلىق مەرەكەلىرندە كاسىبي سۋرەتكە, بەينەتاسپاعا ءتۇسىرىپ, تويعا دايىنداپ قىزمەت كورسەتەدى. ايعانىس وسى بيزنەس ءتۇرىن الداعى ۋاقىتتا كەڭەيتە تۇسەتىنىن ايتتى. جوباعا قاتىسقان ءار جاستىڭ ءىسى قىزى ءارى جۇرتشىلىققا كەرەك قىزمەت ءتۇرى دەر ەدىك. ءبىر مەڭدىعارا اۋدانىنىڭ وزىندە 11 جوبا جۇزەگە اسىپ, 34 جاس جۇمىسپەن قامتاماسىز ەتىلگەن, ال قامىستى اۋدانىندا 10 جوبا جۇزەگە اسقان. التى ايدىڭ ىشىندە ولارعا 124 ميلليون تەڭگە گرانت بەرىلگەن. قازىر وبلىستا وسى جوبانى جاستارعا ءتۇسىندىرۋ, ويىنداعى باستاماسىن قالاي ىسكە اسىرۋدىڭ جولدارى جونىندە تالىمگەرلىك وقىتۋ جۇمىستارى جۇرگىزىلەدى. وبلىستا 20 تالىمگەر ىرىكتەلىپ الىندى, ولاردىڭ اراسىندا وقىتۋشىلار, ۇكىمەتتىك ەمەس ۇيىمداردا تاجىريبەسى مول ادامدار, بيزنەس وكىلدەرى بار.
ء«بىزدىڭ ماقساتىمىز جاستارعا ءوزىنىڭ بولاشاعىنا سەنىمدىلىك قالىپتاستىرۋ, ويلارىن جۇزەگە اسىرۋىنا تاجىريبە بەرۋ بولىپ تابىلادى. فورۋمعا قۋاتتى ينۆەستورلاردى جانە جاستار كاسىپكەرلىگىن قولدايتىن مەملەكەتتىك ورگاندار وكىلدەرىن شاقىردىق. ءاربىر جاس ءوزىنىڭ ويىنداعى ماقساتىن ەرتەڭگە قادىرماي, دەر ۋاقىتىندا جۇزەگە اسىرۋعا تالاپتانۋى قاجەت. جاستار جىلى وعان مۇمكىندىك بەرەدى, سونى ءتۇسىنىپ, بەلسەندىلىك تانىتۋى قاجەت» دەيدى «Zhas Project» جوباسىنىڭ ايماقتىق ۇيلەستىرۋشىسى ەرلان تولەتاەۆ.
فورۋمعا استانا قالالىق جاستاردى دامىتۋ كورپۋسى جوباسىنىڭ گرانتتار بويىنشا ۇيلەستىرۋ اگەنتتىگىنىڭ مامانى ينارا كارىباەۆا قاتىسىپ, وبلىستاعى جاقسى ىسكە كۋا بولعانىن ايتتى جانە جاستارعا تابىس تىلەدى.
ءنازيرا جارىمبەت,
«Egemen Qazaqstan»
قوستاناي
