مۋزەي جەتەكشىسى امانجول اسەنقىزىنىڭ ايتۋىنشا, وقۋ-ءبىلىم, تاربيە باعدارلاماسىن جۇزەگە اسىرۋعا «شاڭىراق» دەپ اتالاتىن ەتنوگرافيالىق جانە تاريحي, ولكەتانۋ باعىتىندا ۇلەس قوسىپ كەلەدى. قازىر 6 بولىمنەن تۇراتىن مۋزەيدە 3 مىڭداي جادىگەر ساقتاۋلى.
ءوزىمىز كورگەن «ۇلتتىق قازىنا» بولىمىندە كيىز ءۇيدىڭ ۋىق, كەرەگە, شاڭىراق, تۋىرلىق, ۇزىك, تۇڭلىك, تۇسكيىز, باسقۇر, الاشا, ۋىق باۋ, تاڭعىش باۋ, اعاش توسەك, كورپە, جاستىق, ابدىرە, بەسىك, بالا توسەگى, اشا باقان, دومبىرا, جوزى (ۇستەل), سىرماق, كىلەمشە, توسەنىش بارلىعى كورىنىس تاپقان.
بۇرىشتاعى شكافتا ويۋ-ورنەكتەرى كوز تارتارلىق, سىڭعىرى ەرەكشە كۇمىس جۇزىك, ساقينا, بىلەزىك, وڭىرشە, تۇمارشا, سىرعا, سالپىنشاق, قاپسىرمالاردىڭ نەشە ءتۇرى ءىلىنىپتى.
كەلەسى بولىكتە ءمۇيىز سىرناي, ءمۇيىز تۇتىكشە, اسىق, توپايدان جاسالعان قولونەر تۋىندىلارىن كوردىك. ونىڭ قاسىندا ءى919 جىلعى قىزىلجار اۋىلىندا تۇرعان ساتاي اتامىزدىڭ كونە دومبىراسى ءىلىنىپ تۇر.
بۇرىشتا – كادىمگى شي, وراۋلى شي, اق شي تۇر. توقىلعان شي ادەمى كورىنەدى. اعاش توستاعان, تەگەش, وجاۋ, قوس بۇيرەكتى وجاۋ, ءتۇرى كونە ىدىستار.
– بۇل اعاشتان جاسالعان ماي شايقاعىش, مارقۇم ساعىنتاي اتانىڭ قولدان جاساپ, قولدانعان زاتى, دەدى امانجول اپاي.
ال تۇيە تەرىسىنەن جانە تەمىر, زەرگەرلىك بۇيىمدار جاسايتىن ۇستانىڭ كورىگى, تاس ديىرمەن, كەلى-كەلساپ سياقتى كونە زاتتاردى تولەۋحان, جومارت, گۇلحان سيياقتى اعا-اپايلارىمىز اكەلىپ تاپسىرعان ەكەن.
اۋىل ماڭىنان تابىلعان بۇعى مەن مامونتتىڭ مۇيىزدەرى جوعارىدا تۇر.
سونىمەن بىرگە مەكتەپتىڭ شاعىن مۋزەيى ەلباسىنىڭ «رۋحاني جاڭعىرۋ» ماقالاسىندا جازىلعانداي «تۋعان جەر», «ولكەتانۋ» باعىتىنا ساي جۇمىس جاساپ, وقۋشىلارعا تۋعان ولكەنى تانىتۋعا, تاريحىن بىلۋگە ارنالعان بىرنەشە ءبولىم بويىنشا جۇمىستار اتقارۋدا.
مۋزەي جەتەكشىسى امانجول اسەنقىزى 1992 جىلى بايان ولگەي ايماعىنان العاشقى لەكپەن اتامەكەنگە ورالعان قانداستارىمىزدىڭ ءبىرى. پەداگوگ-زەرتتەۋشى دەگەن اتاقتىڭ يەگەرى. ءومىرىنىڭ 35 جىلىن ۇستازدىققا ارناعان ەكەن.
فاريدا بىقاي,
«Egemen Qazaqstan»
پاۆلودار وبلىسى,
قىزىلجار اۋىلى
