جاتتىقتىرۋشىنىڭ ايتۋىنشا, وتكەن جىلمەن سالىستىرعاندا بياتلونشىلار ءبىرشاما العا باسقان.
- كەشە دانيل بەلەتسكيدىڭ مارەگە التىنشى بولىپ كەلگەنىن بىلەسىزدەر. ول 4 اتۋ الاڭىنان ەش قيىندىقسىز ءوتتى. مۇمكىن, فۋنكتسيونالدىق دايىندىق جەتپەي قالعان شىعار. اياعى شارشاعان سياقتى. الايدا, بۇل بالا الەم چەمپيوناتىنا العاش رەت قاتىسىپ تۇر. سوندىقتان, ونىڭ كورسەتكىشىن جوعارى باعالايمىن.
وتكەن جىلمەن سالىستىرعاندا, كوماندا مۇشەلەرى الدەقايدا جاقسى ناتيجە كورسەتۋدە. الەم چەمپيوناتىنىڭ ەكىنشى كۇنى عانا اياقتالدى, بارلىق باسەكەلەر ءالى الدا. جاقسى ناتيجە كورسەتەمىز دەگەن ويدامىن. ويتكەنى, بىزدە جاقسى سپورتشىلار جوق ەمەس. ەرەسەكتەر اراسىنداعى سىنالىپ ۇلگەرگەن رومان ەرەمين كەشە ءوزىن كورسەتە المادى. ال احاتوۆانىڭ مارەگە 15-ءشى بولىپ كەلگەنى ونىڭ جاسوسپىرىمدەر سىنىنداعى ۇزدىك كورسەتكىشى.
الەم چەمپيوناتىنداعى قارسىلاستاردىڭ بارلىعى دا ازۋلى. نورۆەگيا, فرانتسيا, گەرمانيا سپورتشىلارىنىڭ شوقتىعى بيىك. كەشە قىتايلىق قىزدىڭ جارىستا جەڭىمپاز اتانعانىن بۇكىل الەم كوردى. بۇگىندە قىتاي قۇراماسىندا فرانتسيالىق مامان جۇمىس ىستەۋدە. ولار ءوز جەرىندە 2022 جىلى وتەتىن وليمپيادا ويىندارىنا دايىندىقتى الدەقاشان باستاپ كەتتى. مىنەكي, الداعى ماۋسىمداردا قارسىلاستارىمىزدىڭ قارقىنى وسە تۇسپەك.
بەلەتسكيگە تاعى دا جارايسىڭ دەگىم كەلەدى. ونىڭ مۇنداي جارىستارعا ءبىرىنشى رەت قاتىسقانىن ەسكەرسەك, ناتيجە جامان ەمەس.
بۇگىن ەستافەتاشىلار جارىس جولىنا شىعادى. بىزدەن ەرلەر اراسىندا باۋەر, ماكسيموۆ جانە كيرەەۆ سىنعا تۇسەدى. قىزداردان ەگوروۆا, شيشيكوۆا جانە پوزدنياكوۆاعا سەنىم ارتامىز.
ەلگە كەلگەن سوڭ دا ءبىزدى ءىرى دودالار كۇتىپ تۇر. 2002-2003 جىلى تۋعان سپورتشىلاردى وڭتۇستىك ساحاليندە وتەتىن «ازيا بالالارى» باسەكەسىنە الىپ بارامىز. كەيىن شۆەتسيادا جاسوسپىرىمدەر اراسىنداعى الەم كۋبوگىنىڭ ءتورتىنشى كەزەڭى وتسە, نورۆەگيادا ەۋروپا چەمپيوناتى باستالادى. وسى ءۇش جارىستى ابىرويمەن وتكىزىپ, ەلگە ورالۋ ماقساتى تۇر الدىمىزدا, - دەيدى ميحايل دۋدچەنكو.
