– ەرلان اعامىزدىڭ كيىكتىڭ لاعىن كوتەرىپ تۇرىپ تۇسكەن سۋرەتتەرىنەن مەنىڭ كوزىمە جاس ىركىلدى. قانداي شىنايىلىق دەسەڭشى! فوتوسۋرەتشى دە وسى ءساتتى وبەكتيۆكە ءساتتى ىلگەن ەكەن. مەن تۇنىمەن ۇيىقتامادىم, ءپلاستيليندى الدىم دا قورىقشىنىڭ وسى ءبىر بەينەسىنىڭ ءمۇسىنىن جاساۋعا وتىردىم, جاساپ شىقتىم, – دەيدى اسەل.
سۋرەتشى قىزدىڭ اپاسى بۇل ءمۇسىن مەن ءسىڭلىسىنىڭ جالپى شىعارماشىلىعى تۋرالى جازىپ, الەۋمەتتىك جەلىلەرگە سالا قويادى. ءمۇسىندى كورگەن كوپتەگەن كىسىلەر اسەلگە حابارلاسىپتى. اسىرەسە ەرلاننىڭ قارىنداسى, قورىقشى جۇمىس ىستەگەن مەكەمەنىڭ باسشىسى حابارلاسىپ, ءساتتى شىققان دۇنيەگە راحمەت ايتىپتى. الەۋمەتتىك جەلىدە كوزدى اشىپ-جۇمعانداي جىلدامدىقپەن تاراعان ءمۇسىندى كورگەندەر ءالى دە اسەلگە حابارلاسىپ, قورىقشىعا وسىنداي ەسكەرتكىش قويۋ كەرەك دەگەن ءوز پىكىرلەرىن ايتىپ جاتىر ەكەن.
قوستاناي مەملەكەتتىك پەداگوگيكالىق ينستيتۋتىنان (بۇگىندە ۋنيۆەرسيتەت) سىزۋ جانە بەينەلەۋ ونەرى ماماندىعى بويىنشا ءبىلىم العان اسەل قازىر ءوزى تۋىپ-وسكەن ليساكوۆ قالاسىنداعى «بولاشاق» بالاباقشاسىنداعى بالدىرعاندارعا «بەينەلەۋ ونەرى مەن مودەلدەۋ» ۇيىرمەسىن جۇرگىزەدى. اسەلدىڭ حالقىمىزدىڭ ەتنوگرافياسىن تەرەڭ زەرتتەۋگە ۇمتىلۋى, ونىڭ ءوز شىعارمالارىنان كورىنىس تابۋى بەلگىلى ونەر ساڭلاقتارىنىڭ دا نازارىنا ىلىگىپ, جاقسى باعاسىن الىپ ۇلگەردى. ەسىمى سىرت ەلدەرگە ءماشھۇر سۋرەتشى, مەملەكەتتىك سىيلىقتىڭ لاۋرەاتى ەربولات تولەپباي قوستانايعا كەلىپ, كوركەمسۋرەت گالەرەياسىن ارالاپ كورەدى. كوپ جۇمىستىڭ ىشىنەن اسەل سالعان «كەلىن» سۋرەتىنىڭ تۇسىنا كىدىرىپ, ونى جوعارى باعالاپتى. كوركەمسۋرەت گالەرەياسى قىزمەتكەرلەرى ارقىلى اسەل شىعارماشىلىعىنا تابىس تىلەپ, باتاسىن بەرىپ كەتىپتى.
ەرلىكپەن قازا تاپقان قورىقشى ەرلان نۇرعاليەۆتىڭ ارىپتەستەرى مەن تۋىستارىنىڭ, جالپى كوپشىلىكتىڭ حابارلاسۋى اسەل تىلەۋلەننىڭ شىعارماشىلىعىنا قانات بىتىرگەندەي بولدى. ول ەندى ەرلان نۇرعاليەۆتىڭ ءمۇسىنىن ساپاسى باسقا, كەپتىرسە قاتىپ قالاتىن پلاستيليننەن قايتا جاساپ شىعۋدى ويلاستىرىپ وتىر.
– ەرلىك ۇمىتىلمايدى. مەن دە ەرلىكتى ءوز شىعارمامدا دارىپتەپ, قورىقشىعا ماڭگى ءومىر سىيلاعىم كەلەدى, – دەيدى اسەل.
ءنازيرا جارىمبەت,
«Egemen Qazaqstan»
قوستاناي وبلىسى,
ليساكوۆ قالاسى
