ال ءوڭىر بويىنشا «تسيفرلاندىرۋ باعدارلاماسى» اياسىندا اتقارىلعان جۇمىستار «نۇر وتان» پارتياسى وبلىستىق فيليالىنىڭ باقىلاۋىندا.
– «نۇر وتان» پارتياسى ايماقتاردا ءىت-سىنىپ پەن ءىت-ورتالىق اشىپ, جاستاردى تسيفرلى ورتاعا بەيىمدەۋ مەن وقىتۋ جۇمىستارىن نازارعا الىپ وتىر. بىلتىر تالدىقورعان قالاسىنداعى اگروتەحنيكالىق جانە پوليتەحنيكالىق كوللەدجدەردىڭ بازاسىندا ەكى ءىت-ورتالىق اشىلىپ, وندا ىنتالى جاستار تەگىن ءبىلىم الۋدى باستاعان. وقۋشىلار سارايىندا دا وسىنداي ورتالىق جۇمىس ىستەيدى. جالپى جەتىسۋ جەرىندە بالالارعا ارنالعان وقۋ ورتالىعىنىڭ سانى كوبەيىپ, الداعى جىلدا دا 62 ءىت-سىنىپ پەن روبوت تەحنيكاسىنا ارنالعان 19 كابينەت اشىلادى, – دەيدى «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى عالياسقار سارىباەۆ.
جالپى ءبىز جەتىسۋ مەكتەپتەرىندە ءىت-سىنىپ, coworking-ورتالىقتار مەن روبوت تەحنيكاسى كابينەتتەرى كوپتەپ اشىلىپ جاتقانىن ۇنەمى جازىپ كەلەمىز. بۇل باعىتتاعى شارالار ورتالىقتان الىستا ورىن تەپكەن اۋىل مەكتەپتەرىندە جۇزەگە اسقانى قۋانتادى. مىسالعا, وتكەندە عانا كەگەن اۋدانىنداعى مەكتەپتە coworking-ورتالىق اشىلعان ەدى. قازىر اۋىل وقۋشىلارى 3D-مودەلدەۋ, انيماتسيالار جاساۋ, بەينەمونتاجداۋ باعىتى بويىنشا ءدارىس ۇيرەنىپ, جاڭا تەحنولوگيالارعا بەيىمدەلۋدە. ولار از ۋاقىتتىڭ ىشىندە روبوت تا قۇراستىرىپتى. نەگىزى كەگەن اۋدانى بويىنشا اشىلاتىن IT-سىنىپتار سانى بيىل تاعى كوبەيىپ, جالپى سانى بەسكە جەتپەكشى.
ءدال سونداي جاڭا ۇلگىدەگى ءىت-سىنىپ جاقىندا ىلە اۋدانىنىڭ نۇرعيسا تىلەنديەۆ اۋىلىنداعى №26 ورتا مەكتەپتە دە پايدالانۋعا بەرىلدى. مەكتەپتەگى ەرەكشە ورىن رەتىندە بالالاردىڭ قىزىعۋشىلىعىن وياتقان سىنىپتا بالالار تسيفرلى تەحنولوگيا الەمىنە قادام باسىپ, روبوت قۇراستىرۋعا تالاپتانادى. ولار ءىت-سىنىپتىڭ اشىلۋىنا كەلگەن قوناقتارعا وزدەرى قۇراستىرعان العاشقى روبوتتارىن دا كورسەتىپ ۇلگەردى.
– بۇگىندە قازىرگى زامانعى ءىت تەحنولوگيالاردى قولدانۋمەن قاتار باعدارلامالاۋ نەگىزدەرىن وقىتۋ مەكتەپتەردە كەڭىنەن ءجۇرىپ جاتىر. اسىرەسە, اۋىل مەكتەپتەرىنە بەتبۇرىس جاساپ جاتىرمىز. نۇرعيسا تىلەنديەۆ اۋىلىندا اشىلعان ءىت سىنىپتا وقۋشىلار روبوتتەحنيكانى تەرەڭدەپ مەڭگەرىپ, قاراپايىم الگوريتمدەردى جاساۋ, باعدارلامالار مەن WEB-سايتتار, كومپيۋتەرلىك ويىندار, انيماتسيالار قۇرۋ داعدىلارىن ۇيرەنۋ ماقساتىندا تەگىن قوسىمشا ساباقتارعا قاتىسا الادى, – دەيدى ىلە اۋداندىق ءبىلىم ءبولىمىنىڭ باسشىسى ءلاززات كاتكەەۆا.
قالماحانبەت مۇقامەتقالي,
«Egemen Qazaqstan»
الماتى وبلىسى
