بۇل جيناقتا ونىڭ بالالىق شاعىنان باستاپ ازاماتتىق قالىپتاسۋ كەزەڭى, عىلىم سالاسىنداعى ىزدەنىستەرى, سونىڭ ناتيجەسىندە تالانتىمەن تانىلۋى, اردىڭ ءىسى سانالاتىن ادەبيەتتەگى نەبىر داۋ-دامايلاردا شىنايى پىكىرىن جەتكىزىپ, جەتەلىلىك تانىتقان ساتتەرى, ادالدىقتىڭ تۋىن كوتەرە ءجۇرىپ شىققان بيىگى, ساكەنتانۋعا قوسقان ۇلەسى, تۇلعالىق دارەجەگە جەتكەن ءومىر جولى قامتىلعان.
عالىمنىڭ عىلىم جولىنداعى جەتكەن بيىگى از ەمەس. ايتسە دە مۇنى تاعى دا ءوز پىكىرىمەن ايقىنداي تۇسەلىك. «ادال ەڭبەكپەن الاتىن اتاقتىڭ ءبارىن الدىم, ال قۋلىق-سۇمدىقپەن, سايلاۋمەن كەلەتىن اتاقتار مەندە جوق. سولاردى المادىم دەپ ونشا باسىم دا اۋىرمايدى», دەگەن ەكەن.
اقيقاتىندا پروفەسسور تۇرسىنبەك كاكىش ۇلىنىڭ عىلىم جولىندا كورگەن قيىندىقتارىنىڭ دا از ەمەستىگىن كىتاپ اۆتورى جان-جاقتى كورسەتكەن. ايتالىق, قازاقتىڭ ۇلى جازۋشىلارى مۇحتار اۋەزوۆتىڭ جوعارى باعاسىن الىپ, عىلىمي جۇمىسىن قورعاۋ كەزىندە ءسابيت مۇقانوۆتىڭ وپپونەنت بولىپ, ونىڭ ادەبيەت تاريحىن زەرتتەۋدەگى ەڭبەكتەرىن جوعارى باعالاۋى, كورنەكتى ادەبيەتتانۋشىلار ە.ىسمايىلوۆ پەن ن.عابدۋلليننىڭ ارقاشان زەرتتەۋ جۇمىستارىنا باعىت-باعدار بەرىپ وتىرۋى زەرتتەۋ جولىنداعى العىرلىعىن بىلگەندىكتەن بولسا كەرەك.
ادەبيەت تاريحى مەن سىننىڭ تاريحىن زەرتتەي ءجۇرىپ, ساكەن سەيفۋللين اقتالعان جىلداردان كەيىن, ول تۋرالى وننان استام كىتاپ جازۋى, ءسويتىپ ساكەنتانۋعا قوماقتى ۇلەس قوسۋى, ءسابيت مۇقانوۆتىڭ, وزگە دە قالامگەرلەردىڭ شىعارمالارىنا تەرەڭ تالداۋ جاساۋى, زامان بولمىسىن ايقىن بەرۋى زەردەلى عالىمنىڭ ەڭبەكقورلىعىن كورسەتەدى.
عۇمىرنامالىق كىتاپتاعى الۋان ءتۇرلى كەزەڭدەردىڭ وقيعاسىن عۇلاما عالىمنىڭ ءومىر جولىنا, ەڭبەكتەرىنە سۇيەنە وتىرىپ تالداۋ وزگە ازاماتتاردىڭ پىكىرلەرىن ەسكەرۋ ارقىلى جان-جاقتى كورىنەدى.
ءسوز تۇيىنىنە كەلسەك, مۇحتار اۋەزوۆ ونىڭ عىلىمي ەڭبەگىنە توقتالعاندا بۇرا تارتپاي: «دۇرىس ىستەگەنسىڭ. ەستى ادام سولاي جاساعانى ءجون. اسىرەسە, ءبارىن ءوزىم تاپتىم, ءوزىم ايتتىم دەپ كەۋدە سوعار كوكە قىرتتار كوبەيىپ بارادى. ەشكىمگە ەلپىلدەمەي, جالىنىپ-جالباڭداماي جۇرگەنىڭە سىرتتاي ريزا ەدىم, مىنا پىكىرلەرىڭ قوماقتى ەكەن, شىراعىم. ەشكىمنەن يمەنبە, جاقتاۋشى بولماسا دا, قالىس قالاتىنىنا سەنە بەر, ۇندەمەيدى ەشكىم دە», دەپتى. وسىنىڭ ءوزى تۇرسىنبەك كاكىش ۇلىنىڭ بۇكىل بەينەسىن دايەكتەپ تۇر ەمەس پە؟ ال ءسابيت مۇقانوۆ ديسسەرتاتسياسىنا جەتەكشىلىك جاساپ, ءتۇيىن ءسوزىن ايتقاندا: «عىلىمعا كەلەتىندەر وسى تۇرسىنبەكتەي بولاتىن بولسا, اتاق-دارەجەنى قينالماي-اق بەرە بەرىڭدەر», دەگەن.
مىنە, عالىمنىڭ عۇلامالاردان العان باتاسى وسىلاي بولسا, مىنا كىتاپ سونى ايداي ايقىن كورسەتىپ, قازاق عىلىمىنا وزىندىك ۇلەس قوسقان تۇلعانىڭ بولمىسىن جان-جاقتى اشقانىمەن ايرىقشا.
سۇلەيمەن مامەت,
«Egemen Qazaqstan»
