سۋرەتكەرلىك سالاعا سان ءتۇرلى قىرىمەن قايتا-قايتا ورالىپ, تالانتىن نىعارلاۋدان تانباعان, قىلقالام ونەرىنىڭ تانىمال وكىلى زۇلقاينار قوجامقۇلوۆتى ءوز ورتاسى ءبىراز ۋاقىتقا جوعالتىپ العانداي بولعان. بەينەلەۋ ونەرى سالاسىندا 30 شاقتى جەكە كورمەسىن وتكىزىپ, سۋرەتكەرلىكتىڭ قاي جانرىنا تۇرەن سالسا دا تولايىم تۋىندىلارىمەن ءوزىن مويىنداتقان, كەشەگى كسرو سۋرەتشىلەر وداعىنىڭ بەلدى مۇشەسى بوس جاتپاعان ەكەن. ايتپەسە, ارىپتەستەرى ءۇشىن كەنەپ-بوياۋىنان ءبىرجولا قول ۇزگەندەي كورىنگەن زۇلقاينار قوجامقۇلوۆ ءوزى ءۇشىن ونەردىڭ جاڭا سوقپاعىن تاڭداپ ۇلگەرىپتى.
توننالاعان تەمىر-تەرسەكتەردى, اۆتوموبيل, موتوتسيكل, ۆەلوسيپەدتەردىڭ كادەگە جاراماي قالعان بولشەكتەرىن كۇندىز-ءتۇنى ونەرگە اينالدىرۋمەن كۇندەرى ءوتىپتى. مايلى بوياۋدى باعىندىرعان قولدار تەمىردى امىرىنە كوندىرىپ, قايتالانباس مۇسىندەردى تۇلەتە بەرگەن. الماتىداي مەگاپوليس قالانىڭ ءار تۇسىندا پايدا بولعان, بۇرىن-سوڭدى بەلگىسىز توسىن ارت-نىساندار قالا تۇرعىندارىن عانا ەمەس, ونەرتانۋشىلاردى دا ەلەڭ ەتكىزدى. ويتكەنى تالانتتى سۋرەتشىنىڭ زاماناۋي ستيمپانك تەحنيكاسىن وزىنە باعىندىرىپ قانا قويماي, ونى ۇلتتىق بولمىسىمىزبەن ۇندەستىرۋى, جۇمىستاردىڭ اۋقىمدىلىعى ءتانتى بولۋعا تۇرارلىق ەدى.
زۇلقاينار قوجامقۇلوۆتىڭ جۇمىستارىن وقتا-تەكتە كورمەلەردە كوزىمىز شالىپ جۇرسە دە, مىڭداعان ۇساق بولشەكتەرى تۇتاس ءبىر ءتىرى اعزاعا اينالىپ, تىرىلگەنىن كورگەندە قالا تۇرعىندارىمەن قوسىلا قۋاندىق. الماتىلىقتار تەمىر تۋىندىلاردى لايىقتى قارسى الدى.
سۋرەتكەر ءوزىنىڭ بويىنداعى سۋرەتكەرلىك ونەر, جەتى بالانى وسىرگەن ىسمەر اناسىنان دارىدى دەپ بىلەدى. اكەلەرى ەرتە قايتىس بولادى. قوجامقۇلوۆتىڭ وزىنەن تاراعان التى بالاسى دا قازىر شىعارماشىلىق ونەردىڭ اينالاسىندا جۇرگەن تانىمال ادامدارعا اينالدى.
– مەكتەپتە وقىپ جۇرگەندە پەيزاجدار سالۋمەن بولدىم. الماتى كوركەمسۋرەت ۋچيليششەسىندە وقىپ جۇرگەندە ويلارى بارىنشا اشىق تا انىق قاستەەۆ, ايتباەۆ, پەتروۆ-ۆودكين سىندى قىلقالام شەبەرلەرىنە ەلىكتەدىم. مەن ۇنەمى ىزدەنىس ۇستىندە جۇرەمىن. ءبىر باعىتتا جەتى جىلدان استام عانا جۇمىس ىستەي الامىن. سودان كەيىن ءستيلىم, باعىتىم, ءپالسافام مەن پىكىرىم تۇگەلىمەن وزگەرەدى. ءوزىمدى ەكسپەريمەنتالدى سۋرەتشىمىن دەپ ەسەپتەيمىن. مەنىڭ شەبەرحانام – بۇل مەنىڭ لابوراتوريام, – دەيدى زۇلقاينار.
كەيىنگى كەزدە پوپ-ارت ستيلىمەن اۋەستەنگەن سۋرەتشىنىڭ ەڭبەگى دە زايا كەتكەن جوق. ءوزىنىڭ شىعارماشىلىق قارىم-قابىلەتىنە ءتان ۇردىسپەن دىنمۇحامەد قوناەۆ, نۇرسۇلتان نازارباەۆ, ولجاس سۇلەيمەنوۆ, باۋىرجان مومىش ۇلى, باتىرحان شۇكەنوۆ سىندى تۇلعالاردىڭ ەموتسياسى بەينەلەگەن تولىق گالەرەياسىن, ارناۋلى كورمەدە كوپشىلىككە ۇسىندى.
ال ساتىمەن جۇزەگە اسقان ستيمپانك ستيلىنە كەلەتىن بولساق, سۋرەتشى ءوزىنىڭ ەڭ العاشقى جۇمىسىن مەتسەنات, كاسىپكەر الدار تۇڭعىشباەۆتىڭ يدەياسىمەن ورىنداعانىن ايتادى. ونەردى باعالايتىن كاسىپكەر قوجامقۇلوۆتىڭ تۋىندىلارىنا بۇعان دەيىن دە نازار اۋدارىپ كەلگەن.
– الدار مۇقاجان ۇلى ونەردى, ءتىپتى مەنەن دە جاقسى تۇسىنەدى. العاشقى تەمىر ءمۇسىن سونىڭ ۇسىنىسىمەن بەس جىل بۇرىن جاسالدى. ودان كەيىن قازىر مۋزەيدىڭ الدىندا تۇرعان «وگىز» تۋدى. بارلىق اۆتوبولشەكتەردى ستو-لاردان بىرتىندەپ جينادىق. كەرەگىن ساتىپ الۋمەن بولدىق. قىسقاسى, جەردە بوسقا شاشىلىپ جاتقان تەمىر-تەرسەك جوق, – دەيدى زۇلقاينار.
بەس ساۋساقتاي بەلگىلى كەڭەستىك سوتسرەاليزمنەن باس تارتىپ, توڭكەرىس جاساعان سۋرەتشى ءۇشىن بۇل دا تاۋەكەل. ارينە, سازبالشىقتان ءمۇسىن جاساۋ الدەقايدا وڭاي بولار ەدى. بىراق كۇردەلى كروسسۆورد سياقتى تەمىردى ءتۇيسىنۋ, ونىڭ ءاربىر ءتۇيىرىن مۇلتىكسىز باعىندىرۋ تالانتى ەكىنىڭ بىرىنە بۇيىرماعان. ايتپەسە, تمد كەڭىستىگىندە ستيمپانك ستيلىنە اۋىز سالعاندار بولعانىمەن, وعان مونۋمەنتالدى تۇرعىدا ءامىرىن جۇرگىزە بىلەتىن ءمۇسىنشى جوقتىڭ قاسى.
ماسەلەن سالماعى ءتورت توننا تارتاتىن ءبىر عانا «مەرگەندى», ياعني ساداق تارتىپ تۇرعان قوبىلاندى باتىردى دۇنيەگە اكەلۋ ءۇشىن ەكى-ءۇش جىل عانا ەمەس, ەپتىلىگى زەرگەرلەردەن ءبىر مىسقال دا كەم ەمەس قوس دانەكەرشى مەن قوس بىردەي كومەكشى جۇمىس ىستەگەن. قازىر «مەرگەن» ءال-فارابي داڭعىلىندا تۇر. تىرناقالدى تەمىر تۋىندىسى «دالا پاتشايىمى» AUL RESORT كەشەنىن بايىتىپ تۇر.
ال ورتالىق مەملەكەتتىك مۋزەيدىڭ الدىنا قويىلعان «قۋات» نەمەسە «وگىز» اتالاتىن ارت-نىسانى قارا كۇش پەن توزىمدىلىكتىڭ عانا ەمەس, اسقاق رۋحتىڭ دا نىشانى.
كۇندىز دە, تۇندە دە, قىستا دا, جازدا دا تىنىمسىز ىزدەنىپ, ەڭبەكتەنگەن, قارتايمايتىن ونەرگە قىزمەت ەتىپ كەلە جاتقان زۇلقاينار قوجامقۇلوۆتىڭ تولاسسىز يدەيالارى كلاسسيكالىق ونەردىڭ ۇلكەن وزگەرىستەردى باستان كەشىپ وتىرعانىن ايگىلەيدى.
ايناش ەسالي,
«Egemen Qazaqstan»
الماتى
