قالانىڭ كورىكتى نىساندارىنىڭ ءبىرى رەتىندە بوي كوتەرگەن عيمارات ماڭىندا ستۋدەنتتەرگە ارنالعان سپورت كەشەنى, سونداي-اق جاتاقحانا بار. ودان بولەك قالانىڭ باسقا شاعىن اۋداندارىندا ورنالاسقان قوس جاتاقحانادا ۋنيۆەرسيتەت ستۋدەنتتەرىمەن بىرگە قىزمەتكەرلەر دە مەكەن ەتكەن. ال كوللەدج ستۋدەنتتەرىنىڭ اتالعان ۋنيۆەرسيتەت ستۋدەنتتەرىنە قىزىققاننان باسقا امالى جوق بولاتىن.
باعاسى ۇشىنىپ تۇرعان پاتەر جالداۋدى ەكىنىڭ ءبىرىنىڭ قالتاسى كوتەرە بەرمەيتىن بولعاندىقتان, تىعىرىققا تىرەلىپ ابدىراعان اتا-انا مەن داعدارعان ستۋدەنت جاستاردى كورىپ ءجۇرمىز. اۋىلدان كەلىپ, قالانىڭ كوشپەندىسىنە اينالعان بالالاردىڭ باسىن سۇعار جايلى جاتاعى جوق, ياعني ساباعىنىڭ دا ءسانى بولماسى انىق. بۇل سوڭعى جىلدارى پايدا بولعان جاعداي ەمەس, كەرىسىنشە جىلدار بويىنا قوردالانعان, بىرنەشە بۋىن تۇلەكتەردى تەنتىرەتكەن, شەشىمى مەملەكەتتىك دەڭگەيدە قولعا الىنباسا, وڭايلىقپەن وڭ ناتيجە بەرە قويمايتىن ماسەلەگە اينالعان بولاتىن.
مەملەكەت باسشىسىنىڭ بەس الەۋمەتتىك باستاماسى بۇل جاعدايعا قوزعاۋ سالدى. ەلىمىزدىڭ تۇكپىر-تۇكپىرىندە جاتاقحانامەن قامتۋ ماسەلەسى قولعا الىنىپ, جاستاردىڭ جاعدايىنا قان جۇگىردى. باستامانىڭ جاستار جىلىمەن جالعاسۋى دا كوڭىلگە كوپ ءۇمىت ۇيالاتادى.
اقتاۋ قالاسىندا ماڭعىستاۋ ونەر كوللەدجىنىڭ اشىلعانىنا جيىرما جىلعا جۋىقتاپ قالدى. ولكەدەگى ونەرگە قۇشتار ۇلانداردى جيىپ, سان ءتۇرلى ماماندىق بويىنشا ۇلكەن الەمگە قاناتتاندىرىپ جۇرگەن وقۋ ورداسىنىڭ جەتىستىكتەرى جەتەرلىك, تۇلەكتەرى دە وسال ەمەس. ءار جىلدارى تۇلەپ ۇشقانداردىڭ اراسىنان بۇگىندە رەسپۋبليكاعا تانىمال بىرقاتار ونەر جۇلدىزىن اتاپ ايتۋعا بولادى. كوللەدج اشىلعالى بەرى ماڭعىستاۋدىڭ الىس اۋداندارى مەن ەلىمىزدىڭ وزگە وڭىرلەرىنەن كەلىپ وقيتىن ستۋدەنتتەردىڭ مۋزىكالىق اسپاپتارى مەن جۇكتەرىن ارقالاپ, جاتاقحانا تابا الماي ءجۇرۋى كوز ۇيرەنگەن كورىنىسكە اينالعان. اقتاۋداعى وزگە كوللەدجدەردىڭ جاتاقحانالارىنا جاۋتەڭدەپ, ورىن وزدەرىنەن اۋىسسا عانا تابالدىرىعىنان جاسقانا اتتاعانىن بۇگىندە اتپال ازامات بولىپ, ەڭبەك ەتىپ جۇرگەندەرى جىر ەتىپ ايتىپ وتىرادى. ول جاتاقحانالارداعى تۇرمىستىق جاعدايدىڭ ءماز ەمەس ەكەندىگى تاعى بار...
جىلدار بويى جاتاقحانا جايى جىر بولعان ماڭعىستاۋ ونەر كوللەدجىن جاقسى جاڭالىق كۇتىپ تۇر. ەلباسىنىڭ تاپسىرمالارىن جۇزەگە اسىرۋ اياسىندا اقتاۋ قالاسى 3 «ب» شاعىن اۋدانىنان جەكە كاسىپكەر ش.گۋسەينوۆتىڭ كومەگىمەن 250 ورىندىق جاتاقحانا اشىلىپ, ستۋدەنتتەر يگىلىگىنە ۇسىنىلماق. 1993 جىلى ىرگەتاسى قالانعان عيمارات ءۇش قاباتتى, اۋماعى − 1956,6 شارشى مەتر. زاماناۋي جيھازدارمەن جابدىقتالعان ءار بولمە 2 جانە 6 ادامعا ارنالعان. ءار قاباتتا بارلىق قاجەتتىلىكتەرمەن جابدىقتالعان اسحانا, سونداي-اق جۋىناتىن بولمەلەر قاراستىرىلعان. ءبىرىنشى قاباتتا ستۋدەنتتەر ءۇشىن دەمالىس بولمەسى, وقۋ زالى, كىر جۋاتىن بولمە مەن كيىم ۇتىكتەۋ بولمەسى بار, سىمسىز عالامتور جەلىسى ورناتىلعان.
جالپى, اعىمداعى جاعداي بويىنشا ماڭعىستاۋداعى 21244 كوللەدج ستۋدەنتتەرىنىڭ 11086-سى اۋىلدىق جەردىڭ ستۋدەنتتەرى. قازىرگى تاڭدا قاراقيا كاسىپتىك كوللەدجىندە 200 ورىندىق, ماڭعىستاۋ پوليتەحنيكالىق كوللەدجىندە 200 ورىندىق, ماڭعىستاۋ وبلىسىنىڭ مەديتسينا كوللەدجىندە 40 ورىندىق جاتاقحانا بار, ءۇش جاتاقحانادا 394 ستۋدەنت قامتىلعان. وڭىردە ءالى جاتاقحانانىڭ جايىن باس اۋرۋىنا اينالدىرعان ستۋدەنتتەر ازايعان جوق. قازىرگى تاڭدا جاتاقحاناعا قاجەتتىلىك 1064 ورىندى قۇرايدى. سوندىقتان 2019 جىلى ءۇش جاتاقحانا پايدالانۋعا بەرىلىپ, 710 ستۋدەنتكە ءتورىن ۇسىنباق. ماڭعىستاۋ وبلىستىق ءبىلىم باسقارماسى باسشىلىعىنىڭ ايتۋىنشا, جاتاقحانامەن قامتۋ ءىسى جالعاسىن تابۋ ارقىلى 2021 جىلدىڭ سوڭىنا دەيىن بارلىق ستۋدەنت جاتاقحانامەن تولىق قامتىلاتىن بولادى.
جايلى جاتاقحاناعا يە بولعان ستۋدەنتتەر ساباققا تىڭعىلىقتى دايىندالىپ, بولاشاققا تىڭ قادام جاسايدى دەپ سەنەمىز.
گۇلايىم شىنتەمىرقىزى,
«Egemen Qazaqstan»
ماڭعىستاۋ وبلىسى
